Hebrews 11
11
Isuwilo
1Isuwilo akusuwila ivmtu vino tukalolela, akupanichisya ivintu vino visilolwa. 2E Leza wachindisile awantu wakali muno alisuwilo lyawo.
3Akwisuwilo akuno tukamanyila kuno insi namumbali yatumbuzilwe nizwi lyakwe Leza, achaleka vino vikaloleka vyatumbuzilwe nachino chisiloleka.
4Kwisuwilo akuli kuno Ebelo wafimizile Leza inzuwi nzima ukulusye yino Keni wafimile. Muno alisuwilo lyakwe Leza amuwanzya ati amulungamane, amuno e Leza-nye umwenecho wapochelezile ivyawila vino wafimile. Muno alisuwilo Ebelo achili akavwanga, chingatenga wafwa.
5Akwisuwilo akuno kwalesizye Enoki ukufwa, Ukuwa, Leza amusenda mwiyulu, nanti kuti umuntu wumwi amulole swinya, amuno wasenzilwe aya mupela. Amawaliko matele yakutanji, pano Enoki atani asendwe mupela wasechelesyanga Leza. 6Pasi wumwi wino angasechelesya Leza ndi asi nisuwilo. Amuno wensi wino akuya kwe Leza wazipila awe nisuwilo lyakuti Leza apano ali swinya akulambulanga wensi wino akumuvwamba.
7Kwisuwilo akuno kwalesile Nowa ayivwa uwusoche wakwe Leza kuvintu vino vyachilinji ukuloleka. Watontezile Leza, awaza uwato muno weliwenye nichiwanza chakwe wapusuchizile. Achaleka asinila insi yonsi, Leza amulungamika muno alisuwilo.
8Akwisuwilo akuno kwalesile Abrahamu atontela Leza pano wamwisile, aya kunsi yino Leza wamulayilizizye ukumupa. Wachinsile afuma chingatenga atamanyile kuno wayanga. 9Kwisuwilo akuno Leza walesile ayikala munsi yino wamulayilizizye, ayikala mwenemo ngati amunsi yaweni. Wikalanga mung'anda yamahema nu Ayizeki nu Jekapu, muno nawonye wapochelezile ilayilizyo ihlilyonganye ukufuma kwe Leza. 10Amuno Abrahamu walindililanga akaya kano Leza wapimile azenga, akaya kalufula lwamuyayaya.
11Akwisuwilo kuno kwalesile Abrahamu apapa chingatenga wakosile nkaninye nu Sera umuchi walinji ang'umba. Wasuwizile Leza atontela ilayilizyo lyakwe. 12Chingatenga walinji ngati kwela wafwa lelo mwakwe weliwe mwafumile ikwata vule ngati antanda zyamupela, ngati akuvula kwaluselesenga lwamumbali yakwe sumbi luno wumwi atanga apende.
13Akwisuwilo akuno awantunye waa wonsi wafwizile. Watatela wapochelele ivintu vino Leza walayilizizye, ukuwa wavilolezile lwapatali awasechela pakuvi lola, awazumilizya nukuzumilizya kuno walinji aweni wane wasamalizile munsi awowo. 14Awantu wane wakavwanga wonye-woo wakapanichisya kuno wakavwamba insi yawo iyakwikala. 15Watatela welenganie kuvyansi yino wafumile kweneko; amuno ndiwatele welenginie, ngali wanyochezile kweneko. 16Ukuwa, waluchilanga ukuya kunsi nzima indusye, insi yamwiyulu. Achaleka Leza asilola insoni izyakuti wamwita ukuti we Leza wawo, amuno wawayanizya akaya kakwikala.
17Akwisuwilo akuno Abrahamu wafimile umwanakwe e Ayizeki ukuti awe anzuwi, pampindi yino Leza wamwelezizye, E Abrahamu-nye awino Leza wamulayilizizye, ukuwa naponye wazumizile ukufimila Leza inzuwi umwanakwenye weyo wenga-nsu. 18Leza wamunenile ati, Mwakwe Ayizeki-nye amuno uliwela nikwata. 19Abrahamu weni welenginie ukuti Leza walinji namaka ukuzyulupula Ayizeki kumfwa-nga nawuzyenye tungati Abrahamu wapochelezile Ayizeki swinya ukufuma kumfwa.
20Alisuwilo alino Ayizeki walayilizizye ukwiza pepa Jekapu nu Esau.
21Akwisuwilo akuno kwalesile Jekapu apepa awanakwe Jozefu wonsi pano wati awafwa; asintilila kunsongo yamulinda wakwe achindika Leza.
22Akwisuwilo akuno kwalesile pane Jozefu wati awalonda ukufwa, avwanga ivyakuchinta kwa wa Israeli ukufuma mu Ijeputi, awakomelezya chino wangiza wachite nivyachala chamuwili wakwe.
23Akwisuwilo akuno kwalesile awakwasi wakwe Musa awamufisa kumyezi yitatu pano wakwatwa. Waweni ukuzipa kwamwana wawo, watalinji nintete zyakuchila isundo lyamfumu.
24Akwisuwilo kuno kwalesile Musa pano wakula, akana ukwitwa amwana wakwe Nakamba umwanakwe Fero. 25Azumilizya ukuti ayimbe apaliponga nawantu wakwe Leza ukulusye ukuchindimuka muchimwemwe chaluwembu ichampindi ntichi. 26Ayelengania ati ukukwelengulwa nintusi muno alizina lyakwe Mesaya chazipa chalusya ukutavuzya ninsawo yonsi yamu Ijeputi; amuno weni walolelanga ichilambu chakunkolelo.
27Akwisuwilo akuno kwalesile Musa afuma mu Ijeputi nanti kutina uwukali wamfumu e Fero; atalondanga nanti akunyochela kweneko, ngati amuntu wino akulola Leza umuntalolwa. 28Akwisuwilo-nye akuno kwalesile Musa ayania ichakulya chakupitililwa akomelezya ukuti uwazi wusansilwe kumapampa yavisakati, alyakuti umungeli wamfwaatize akome wakatotewachonsi awawa Israeli.
29Akwisuwilo akuno kwalesile awa Israeli awalamba Sumbi Muwenzu ngati apamusili wukale; awala nawo awina Ijeputi wati walamba penepo, aminzi ayawafumpachizya,
30Akwisuwilo kuno kwalesile amalinga yakwe Jeriko ayamongoka, pane awa Israeli waliwililanga amalinga kumanda munenulambali. 31Akwisuwilo kuno kwalesile e Rahabu echilende apusuka kukukomwa apaliponga nimintawela Leza yoyo, amuno weni wapochelezile amanengwe ichete-chete.
32Nga navwanga vinji avyani? Navimwi! Amuno insi nimpindi iyakuti mvwanjile ivyakwe Gideoni, nivyakwe Barak i, Samusoni, Jefuta, Davidi, Samueli, nga nivyawatumwa. 33Kwisuwilo akuno wachimvizizye insi zyonsi. Wachisile ichete nga awapochelela chino Leza walayilizizye. Awafumpika ivimbwi imilomo, 34awazimya umulilo wukalambane, awafyuka kulupanga. Chingatenga watalinji namaka awakochela; awawa namaka nkaninye ayakulwila mwisumo awachimvya ivita vyamakandi. 35Kwisuwilo akuno inko zyawanachi zino zyafwile azizyulupulwa, awawa nazyo swinya.
Nawo wanji wano wayimvizwe nuwulumila wukulu wakanile ukuzawayila ukuti wapusuke, awazumila ukufwa ukuti wize wazyulupulilwe kuwumi wenecho. 36Wamwi wakwelenguzilwe nintusi nukumwa nivikoti, nawawo wanji wanyefilwe mung'anda zyavingololo. 37Wamwi wapozilwe namawe, wamwi wawachekanga nusoo awawapandula pawili, wamwi wakomilwe kulupagna. Watawanswanga mumikwela yang'onzi niyambuzi, awawayimvya ichilume-lume, awayimba kutaluvile. 38Awantu wane awamunsi watalingine ukwikala nawo! Wavungulanga koo nakoo mulumpalang'ang'a namumyamba, awalala mumichembo namuvizinji pansi.
39Ye, vino awantu-nye waa walumbililwa muno alisuwilo lyawo! Ukuwa naponye watatela wapochelele chino Leza walayilizizye, 40amuno watuyanizizye ichintu chinji ichizima ukulusye. Ukulonda kwakwe kwalinji akwakuti watanga wafisye uwulungamane woliwo wonga nkandi ndi tuli apaliponga nawo.
Currently Selected:
Hebrews 11: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
