Hagayi 2
2
Ukuzipa kwa ng’anda-mpya iyakupepela Leza
1Pawanda wachiti amakumi yawili nuwanda wonga wamwezi wachiti-munenulambali wamwakanye wowo, Imfumu e Leza avwanjila mumutumwa Hagayi. 2Anena Hagayi ukuya nena Zerubabeli, umulasi wa mwe Yuda, nukunena Joshua esimapepo mukulu, nukunena awantu wamwiko, ukuti, 3Wuzye pakwe mwemwe pali wumwi wino angizuka vino ing’anda iyakupepela Leza yazifile pakutalika? Ngakanonzi ikuloleka wuli? Ikuloleka kuno ayavye-yavye. 4Ukuwa kanonzi mutize mufwe ipwepwemwensinye. Talikani ukuwomba, amuno indi namwe. 5Pano mwafumile mu Ijeputi, nawalayilizizye inti nandi ndawa namwe penye. Umuzimu wane wuchili wuli namwe, mutize muwatina.
6Patachizimbanga nandi njinganie iyulu ninsi, njinganie insinye nusumbi. 7Ndiyingania imyiko yonsi, ninsawo zyawo zililetwa koo, zyizule mung’anda yane iyakumpepela. 8Esilivaranu golide ivya mumigodi yamunsi avyane. 9Ing’anda yane iyakumpepela iliyemba nkani ilusye inkali. Paponye apano ndipa awantu wane umutende nukusangalala. Avino Imfumu e Leza wavwanga.
Awantu awasochelwa muno wasi awasuwilwa
10Pawanda wachiti amakumi yawili namanda yani yamwezi wachiti mufundikambali wamwaka wachitiwili uwawufumu wakwe Dariasi swinyanye Imfumu e Leza wamaka yonsi wavwanzile kumutumwa Hagayi. 11Ati, Wuzya wasimapepo wapanzye ivyiwuzyo lyoo: 12Wuzye ndiwumwi wasenda umunyamfu wanyama njimichile wafumya kunzuwi, wayifisa kwikope lyamwinjilo wakwe. Ukuwa swinya, ndiwaleka umwinjilo wakwe wakumvya ebuledi, pamwi ichakulya chimwi ichitende, pamwi wakumvya kwipala, nanti akumafuta, nanti akuchakulya chonsinye chinji, wuzye inyamanye yoyo ingaleka nichakulya chinjinye chocho chiwe achimichilwa?
Lyalanga pano iwuzyo lyawuzwa, wasimapepo watolelezile awati, Awe.
13Hagayi anyoka awuzya ati, Wuzye ndi umuntu wakombela amuno alemile ichala. Ukuwa ndi walema ichakulya chakwe chimwi, wuzye ukulemanye koko kungaleka nichakulyanye chocho chikombele?
Wasimapepo watolelezile awati, Echingakombela.
14Nga Hagayi anyoka ati, Imfumu e Leza akuti avino chili nakuwantu wamwikonye woo, navyonsinye vino wali navyo, achaleka vyonsinye vino wakafima pileza vyakombela.
15Imfumu e Leza akuti, Yelenganiani nkaninye kwechino chawaponela. Pano mwachilinji ukutalika ukulimbuzya ing’anda yakumpepela, 16mwayanga palwano lwamalezi amulanga mukusuwila ukuzana wampokoso amakumi yawili, ukuwa akulanga kuli wampokoso ikumi. Mwayanga kwenankalanjilo ukuti mukasembe ipala imfinga amakumi yasano, ukuwa amuzana ipala lyamfinga amakumi yawili. 17Nawatumizile impenya nukukunkunyala ninkuwa ukuti vize vyonone vyonsi vino mukulima, ukuwa naponye mutatela mutontolokwe. 18Kanonzi pawanda woo uwachiti amakumi yawili namanda yani yamwezi wachiti mufundikambali, pano ulufula lwang’anda yakumpepela lwasila, yelenganiani nkaninye kwechino chawaponezile. 19Kusi amalezi yanji yano yasyala, nivyalo vyamikomwa ya misango yonsi, nimiti yavikomwa vyakwenga amafuta, itani ikome. Ukuwa ukufumulila ilelo ukuya nakunkolelo nandi mbapepe.
Imfumu e Leza alayilizya Zerubabeli
20Pawandanye wowo, uwanda wachiti amakumi yawili namanda yani yamwezinye wowo, Imfumu e Leza anena Hagayi amazwi impindi yachitiwili ati, 21Yanga kanene Zerubabeli, umulasi wamwe Yuda, kuno nanenenchela ukuti njinganie iyulu ninsi. 22Nanenenchela ukumongolania amawufumu male amaka yawo. Ndipenula amagereta nawakapisya wamageretanye; wakavwalo walifwa, nawakakwelela wakwe wakavwalo waliwakomana. 23Pawandanye wowo ndikusenda, wewe Zerubabeli muwomvi wane, ndikupa uwufumu pawantu wane. Awewenye nakusola. Avino Imfumu e Leza wamaka yonsi wavwanga.
Currently Selected:
Hagayi 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
