Zakariya 1
1
Imfumu e Leza akwita awantu wakwe
1Mumwezi wachitikananimonsi wamwaka wachitiwili uwawufumu wakwe Dariasi wa mu Persia apano izwi lyayile kwe Zakariya umutumwa. (Zakariya-nye weyo walinji amwanakwe Barakiya, swinya walinji amwizikulu wakwe Ido.)
2Imfumu e Leza wamaka yonsi wanenile Zakariya ukuti anene awantu ukuti, Nenenye, ne Mfumu e Leza, navitizilwe wasokulu nkaninye. 3Ukuwa kanonzi nkuti, Nyokani mwize kwenene, nani nandi nyoke kwemwemwe. 4Mutize muwe ngati awasokulu. Awatumwa wakali wawasochelanga, awawanena ukuti watize wawembuka, nukulandalila ukuchita uwuwi. Ukuwa watatela wanjivwe nanti akuntontela wantontele. 5Ngakanonzi wasokulunye wawo walikwi? Wuzye awatumwa wawo weni wachili awapuma? 6Ukuwa naponye uwusoche wane namasundo yane yano nawanenezile mumilomo yawawomvi wane awatumwa yafisile nakwe wasokulu, Pakupelelechezya awatontolokwa awamanya kuno nenenye nalwane, ne Mfumu yamaka yonsi, nawasunzile ukulingana nimyata yawo, mbasunda ndimuno napanzizizye ukuwachita.
Umutumwa alota ivyakwe wakavwalo
7Mumwaka wachitiwili, pawanda wachiti amakumi yawili namanda yani ayamwezi wachitikumi numwezi wonga uwawufumu wakwe Dariasi (umwezi wuno wakutanji Shebati), Imfumu e Leza wantumile nizwi muchilota uwusiku. 8Indola umungeli wa Mfumu e Leza akwelezile pekavwalo muwenzu. Kavwalonye weyo ayimilila mumiti yimwi imifupi iyamumupata. Napansizi pasyalichile wakavwalo wanji, wumwi walinji amuwenzu, numuwuye walinji amutiswe, nga nuwamanzyoto. 9Imbuzichisya Imfumu e Leza inti, Mulali, nga wakavwalonye waa wakusula chani?
Wantolelezile ati, Nandi nkunene chino wakusula. 10Imfumu e Leza watumile wakavwalonye wawo kukuyanengula insi.
11Wakavwalo wanenile umungeli awati, Twaliwila insi yonsi pane yapakula, twazana kuno insi yonsinye yachimba, isi nawino angayitula.
12Ngapano umungeli ati, Oko we Mfumu Leza pane wavitizilwe Yerusalemu nutwaya twamwe Yuda kanonzi yawa amyaka amakumi munenulambali. Ngawalanga wawavitilwa wowonye nanti kuwafwila inkumbu mpaka kwi?
13Imfumu e Leza atolelela umungeli nizwi lyakusansamusya, 14ngapano umungeli anena ukuti mbumbule chino Imfumu e Leza wamaka yonsi watasile ati, Indi nulukundo kwe Yerusalemu kutaluvile, akaya kane akatele. 15Ukuwa navitilwa imyiko yino isitela iponele mumatamyo. Nalanga pano nazinzimala ukuvitilwa awantu wane, imyikonye yoo iponezya awantu wane imipamba ilutilizya. 16Achaleka niza swinya kwe Yerusalemu ukwizafwila akaya inkumbu. Ing’anda yane iyakumpepela ilizengwa nakaya kalimbuzwe swinya.
17Swinya umungeli anena ukuti mbumbule ukuti, Imfumu e Leza wamaka yonsi akuti utwaya twakwe tuliwa umutende ndimuno twawezile kali, ayize asansamusye Yerusalemu, aleke akayanye kaa kawe akakwe.
Ichilota champembe
18Muchilota ndola impembe zyavinyamana zini. 19Mbuzichisya umungeli ukuti anene chino impembenye zyozyo zyasulanga.
Antolelela anena ati, Ampembe zyamaka yamunsi zino zyasalangania awantu wamwe Yuda, nawa Israeli, nukusalangania awamwe Yerusalemu.
20Nga Imfumu e Leza andanjizya awawomvi wani wano walemile inyondo. 21Imbuzichisya chino awantunye wawo wizile mukuchita?
Antolelela anena ati, Wizile mukutetemya nukumongolania imyiko yino yalemezile insi yakwe Yuda kukanyanyangala isalangania awantu wamwenemo.
Currently Selected:
Zakariya 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
