Hagayi 1
1
Awantu awakuwizwa ukulimbuzya ing’anda yakwe Leza
1Mumwaka wachitiwili, uwawufumu wakwe Dariasi, mumwezi wachitimutanda, pawanda wakutalika uwamwezi, izwi lyafumile ku Mfumu e Leza aliya kumutumwa Hagayi. Amazwi yalinji ayakunena umulasi wa mwe Yuda, e Zerubabeli umwanakwe Shealitieli, nukunena Joshua esimapepo mukulu umwanakwe Jehozadaki. 2Imfumu e Leza wamaka yonsi ati, Awantunye waa wakuti isi ampindi nzima iyakulimbuzizya ing’anda yakupepela Leza.
3Swinya Imfumu e Leza wamaka yonsi anena umutumwa Hagayi ati, 4Mwe wantu wane-mwe, ngamuno chani chino mwenji mungalanga mukwikala mung’anda nzima, pane ing’anda yane iyakumpepela yamongoka? 5Lolani chino chawaponela! 6Mwatanda amalezi mavule, ukuwa mwasinza tutichinye. Muli nichakulya, ukuwa chitavula chino mungikuta. Muli nipala lyakung’wa, ukuwa lisi alivule lino mungang’wa mukolwe. Muli nivizwalo, visi avivule vino vingawapa ichilungula. Nawino akawomba umulimo wachilambu atanga apochelele indalama mvule izyakuwombela. 7Lolani chino chawaponela! 8Kanonzi yanji mumyamba mukakome amazengo. Mulimbuzizye ing’anda yane iyakumpepela, apano ngasechela pano mukumpepa ndivino nazipila ukupepwa.
9Mwalolelanga ukulonga nkani, ukuwa vili vitichi. Swinya pano mwasezyanga ivizawalo ukutwala kumwinu, navipusile. Ngamuno chani chino nachitizile wowo? Nachitizile wowo muno ing’anda yane iyakumpepela yamongoka, pano mwenji mwensi mukuwombesya mukuzenga ing’anda zinu. 10Muno achochonye achino kusi imvula, pasi chino chingamela. 11Naleta ichilala munsi-pamyamba yamwenemo, muvyalo vyamalezi, ivyamiti yavikomwa-pavizawalo vyonsinye vino vikamela mumusili, pawantu napavinyamana, napevyonsinye vino mukakwelezya ukulima.
12Ngapano Zerubabeli nu Joshua, nawantu wonsi wane wapususile kuwuzya, awachita chino Imfumu e Leza wawo wawanenile ukuchita. Watinile, awatontela umutumwa Hagayi, intumi ya Mfumu e Leza. 13Hagayi anena awantu amazwi ya Mfumu e Leza ati, Nandi ndawa namwe-avino nalayilizya. 14Imfumu e Leza ayinjila mumyezo yawantu wonsi awaya mukuzenga ing’anda yakumupepela; e Zerubabeli, umulasi wamwe Yuda, nu Joshua esimapepo mukulu, nawantu wonsi wane wapususile kuwuzya. Awatalika ukuwomba umulimo wakuzenga ing’anda yakupepela Imfumu e Leza wamaka yonsi, e Leza wawo, 15pawanda wachiti amakumi yawili namanda yani ayamwezi wachitimutanda wamwaka wachitiwili uwawufumu wakwe Dariasi.
Currently Selected:
Hagayi 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
