Zefaniya 3
3
Uluwembu nitulwa lyakwe Yerusalemu
1Yerusalemu walowa, ekachita wavinyali, akaya kawuchisanguka kano kakakwelengula awantu wamwenemo, 2Kativwa ku Mfumu e Leza, nanti akupochelela isundo lyakwe. Katawika insingo yakwe mu Mfumu e Leza, nanti akulambilizya ukwavwa kwakwe Leza. 3Awantu wakulu awamwenemo wakola ngati avimbwi vino vili ninzala; wakapanzya wakolana nimpumbi zino zili ninzala, awafunuke wano watanga walechelezye ifupa lize lifike mutondo. 4Awatumwa awakachenjezya wasipechela imilimo yawo, nawasimapepo wakakombezya chino achamuzilo, wakanyonganika isundo lyakwe Leza kukuyisechelesya. 5Ukuwa Imfumu e Leza ali mukaya; akachita ivizima vitupu ampela. Wila mutondo-tondo nanti kwiwilila, akapanzizya awantu wakwe nukusimichila. Ukuwa awawembu wane wali mwenemo awalanga wakuchita iviwipe, nanti kulol’ insoni.
6Imfumu e Leza akuti, Napyezile imyiko, njonona utwaya twawo, insya amalinga yawo nutupungu avitalang’anda vitupu. Kanonzi imisolo yawo yayisyalila, yasowa nuwakwikala mwenemo. 7Nelenginie inti inche awantu wandi wantina, wapochelele isundo lyane. Nelenginie inti nche watanga wize wiwilile isambilizyo line nawasambilizizye. Ukuwa nanti kuzimbanye awanyochelela kuvilivyonga.
8Achaleka Imfumu e Leza wati, Fwandi ndindililani. Lindililani wusuke uwanda wize wuno ndikatuka nsumbichile imyiko. Njelenginie ukuwunganika imyiko namawufumu ukuti wivwe uwukali wakuvitwa kwane. Insi yonsi iliyononwa numulilo wawukali wane.
9Apano ndileka imyiko iwampepa nenenye-nsu, nanti kupepa twaleza tunji, wonsinye walintontela. 10Nukutalinye koko ku Ethiopia, awantu wane wane wasalangana waliwandetela ivifimwa. 11Pampindinye yoyo, mwe wantu wane, mutalilol’ insoni zyakuti mwampiluchizile. Ndifumya wensi uwachilumba nuwamufutumwe, mutalitela mumpiluchile swinya, pamwamba wimichile uwa mwe Yerusalemu. 12Ndisya awantu wane wakayichefya mwenemo, wane waliyiza kwenene walonda ukuti mbavwe. 13Awa Israeli wane wasyala wataliwachitila wumwi uluwi, wataliwavwanga uwufi, nanti akuchenjezya. Waliyikala umutende, nanti kutina chimwi.
Ulwimbo Iwakuzevya
14Yimbilanji muwapongomoka nichimwemwe, mwe wa Israelimwe!
Zewelanji nimyezo yinu yonsi, mwe wamwe Yerusalemu-mwe!
15Imfumu e Leza wafumya awalwani winu;
wafuntusya wonsi wane wakawakanuzya.
Imfumu e Leza, Imfumu yawa Israeli, ali namwe;
kanonzi pasi chimwi ichakutina.
16Impindi ikwiza pane waliwanena Yerusalemu ukuti,
Utize uwatina, kaya kakwe Zioniwe!
Utize uning’inie amakasa yako!
17Imfumu e Leza ali nawe,
amaka yakwe yakakuchimvizya.
Imfumu e Leza aliwasechela nawe,
nakulukundo lwakwe alikupa
uwumi wupya.
Aliwakwimbila awazevya pakwe wewe,
18awazevya ngati awantu wane wakulya ivyakuyitopwa.
Imfumu e Leza akuti,
Naleka ukutinia kwakulovya nafumya insoni zinu.
19Impindi ikwiza!
Ndisunda wane wakawakwelengula;
ndipususya awalemale wonsi
nyosye intapwa zyonsi kumwawo.
Ndileka insoni zyawo ukuchindikwa,
ninsi yonsi iyize iwawalumvya.
20Impindi ikwiza!
Ndinyosezya awantu wako wano wasalangana kumwawo,
njize ndakulumvya ulumbililwe munsi yonsi.
Pakupelelechezya ulongo lulikunyochela.
A Mfumu e Leza awino wavwanga.
Currently Selected:
Zefaniya 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
