Galatians 4
4
1Nkunyochelela ichilichonga: umwana wino akalindilila uwupyani wakwe yisi akawa ngati amuzya pano achili amutichi chingatenga ivintu vyonsi vikulanga avyakwe. 2Pano achili amutichi, awantu wanji wakamusunga awamusunjila nivyakwe isuka impindi yino yisi watasile ifika. 3Avino naswenye, twalinji swewazya wakwe wakapanzya wamizimu yamunsi, pano twachilinji ukukula. 4Ukuwa ila impindi yafichila nkani, Leza atuma Umwanakwe. Akwatwa kumwanachi, mbali nukutontela amasundo yachi Yuda, 5alyakuti akomole wane wanyepwa namasundo, alyakuti tuwe swewana wakwe Leza.
6Kukuwalanjizya kuno mwewanakwe Leza, watumile e Muzimu wamwanakwe mumyezo yitu, e Muzimu wino wapundanga akuti, Tara, Tata. 7Achaleka fwandi, kanonzi usi wemuzya swinya, ukuwa wawa wemwana. Achaleka fwandi vino wemwanakwe, Leza alikupa vyonsi vino akalonda ukupa awanakwe.
Pauli akusayila wa Galatiya
8Kali pano mutamanyile Leza mwalinji mwewazya wakwe tuna tusi atwaleza. 9Ukuwa kanonzi pane mwamanyila Leza—pamwi inti, kanonzi vino'nawe Leza wawamanya—ngamukulonda muwanyochelela kuvintu vino visi namaka nakumizimu miwipe wuli? Ngamuno chani chino mukulonda ukuti muwe mwewazya wakwe vyolivyonye swinya? 10Mukapechela amanda yamwi, nimyezi, nimpindi, nimyaka. 11Nkuwasayila nkaninye! Amuno nche umulimo wonsi wuno nawawombela wawa awavye?
12Nkuwalambilizya, wanawitu, mukole nene. Amuno nenji indi ndivino mwemwe. Ukuwa kweni mutambifya chimwi. 13Mukwizuka kuno pakutalika nawawilizile Ilandwe zima; muno nalinji nemulwale. 14Ukuwa mutatela munkwelengule nanti akunkankamula, chingatenga kumwata wakumuwili nawelezizye. Ukuwa, mwampochelezile ndimuno mungapochelela umungeli wakwe Leza; mwampochelezile ngati ne Klistu-nye e Yesu. 15Mwalinji nichimwemwe nkaninye! Ngakwapona chani? Nenenye anemuntu ngawanena ivyinu: ukuti mwanga mufolowole aminso yinu, ndavino chingawa, muyampe nene. 16Wuzye kanonzi nawa nemulwani winu muno nkuwanena ivyakusimichila?
17Awantu wamwi wawo wakuwapepelezya, ukuwa ukulonda kwawo akuwipe. Chino wakulonda achakuti wawapawule wawafumye kwenene, alyakuti muwapepelezyania nawo. 18Ukuwa achizima ukupepelezyania kwechino chiyine — peni choo chazipa penye, pane indi namwe patupu pole. 19Wakundwe wane, wanawatichi! Swinyanye, indi ngati amwanachi wino ali mulupanda, indi nuwulumila uwuliwonga muno amwemwe, isuke imiwele yakwe Klistu iloleke mwakwe mwemwe. 20Chingansechelesya nkaninye ndachino ingalanga indi namwe kanonzi, alyakuti mbachitile chinji. Amuno nkutamika nkaninye muno amwemwe.
Ichilolelo chakwe Hagar nu Sera
21Nkasi ntele mbawuzye mwewantu mukulonda ukuwa mwe wazya wamas undo: wuzye musikwivwa muno amasundo yayila? 22Yakutanji Abrahamu walinji nawanachonsi wawili, wumwi wakwasilwe mumwanachi muzya, winji mumwanachi mwanangwa. 23Umwanakwe wino wakwasile mumwanachi muzya wakwasilwe ndimuno awana wonsi wakakwatilwa, ukuwa umwanakwe uwamumwanachi mwangangwa weni wakwasilwe mwilayilizyo lyakwe Leza. 24Chonye-choo chili ngati amulumbe: awanachinye waa wowili amalayilizyo yawili, wenga (akuli kuti we Hagar), wafumile kumwamba Sinai, wino awanakwe wakwatizilwe kuwuzya. 25E Hagar awili mwamba Sinai wuno wuli mu Arabia, e Hagar ali ngati akaya kakwe Yerusalemu, kano kanonzi kali muwuzya nawantu mwenemo-pwi. 26Ukuwa e Yerusalemu wamwiyulu weni amwanangwa, weni wemayo. 27Amuno amawaliko matele yawalikwa yati,
Zewelenga wemwanachi ng'umbawe!
Pongomokanga uwalila nichimwemwe, wemuntu
usitela uyivwe uwulumila wampapo!
Amuno umwanachi wino wawingwa aliwa nawana wavule
ukulusye umwanachi wino ali kumulume.
28Achaleka, mwe wanawitu, mwe wana wakwe Leza ndimuno walayilizizye, muli ngati we Ayizeki, 29Pampindinye yo yo umwana wino wakwasilwe ndimuno awana wonsi wakakwatilwa wayimvyanga wino wakwasilwe kumuzimu wakwe Leza; avino chili nilelo. 30Ukuwa ngafwandi amawaliko matele yakati wuli? Yavwanga yati, Tayilizya umwanachi muzya apaliponga numwanakwe; amuno umwana wamuzya atalipyana apaliponga numwana mwanangwa. 31Achaleka fwandi, wanawitu, tusi swewana wamwanachi muzya, ukuwa swe wamumwanangwa.
Currently Selected:
Galatians 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
