Galatians 3
3
Amasundo pamwi isuwilo
1Mwe Wa Galatiya watumpemwe! Ng'uwawavina waweni? Mwewantu mwanenilwe ichete chete imfwa yakwe Yesu Klistu pawuchingane! 2Telani munene ichintu chonga-nye nsu: wuzye mwapochelezile e Muzimu Mwimichile muno mwawombanga ukulonda kwamasundo, pamwi nche akukwivwa ivyilandwe zima? 3Ngachino mungalanga muchili mwatumpila wonye-woo achani? Mwatalisile nu Muzimu wakwe Leza; ngamuno chani chino kanonzi mukasi mupelelechezye namaka yinu? 4Wuzye fwandi vyonsi vino mwasambililanga vyalinji avyavye? Akapelu! 5Wuzye Leza akapa Muzimu swinya achita ivizungusyo mwakwe mwemwe muno mukatontela masundo, pamwi nche amuno mukakwivwa amusuwila Ilandwe zima?
6Awowonye amawaliko matele yavwanjila ivyakwe Abrahamu ukuti, Wasuwilanga Leza, swinya muno alisuwilo Leza wamupochelezile ngati amulungamane. 7Achaleka fwandi, mwazipila ukumanya kuno awantu wane wali nisuwilo awali wana-wana wakwe Abrahamu. 8Amazwi Matele yavwanzile kali kuno Leza alilungamika amakandi muno alisuwilo. Achaleka amazwi matele ayano yawilizilwe kwe Abrahamu kali-kali ayakuti, Mwakwe wewe amuno Leza alipepela imyiko yansi yonsi. 9Abrahamu wasuwizile apepwa nukupepwa; achaleka nawonsinye wane wasuwila wapepwa ndivino weliwe.
10Wano imyezo yawo yeyamila kukutontela amasundo watipwa. Amuno amawaliko matele yawalikwa yati, Amutipwe wensi wino wapotwa ukutontela penye amasundo yonsi yano yawalikwa mwekalata! 11Ukuwa, chamanyikwa kuno pasi nanti wenga wino akalungamikwa nu Leza muno amasundo; amuno amawaliko matele yavwanga yati, Wensi wino wizawalungamikwa nu Leza muno alisuwilo aliwa nuwumi. 12Ukuwa amasundo yateyamila kwisuwilo. Ukuwa, nkandi ndivino amawaliko matele yataka yati, Umuntu wensi wino akuchita chonsi chino amasundo yakutaka aliwela nuwumi muno masundo.
13Ukuwa Klistu watukomola kukutipwa kuno kukaletwa namasundo, weliwenye awino watipwa muno asweswe; amuno amawaliko matele yawalikwa yati, Amutipwe nu Leza wensi wino wasayikwa pamuti. 14Klistu wachisile wowonye alyakuti Leza apepe amakandi ndimuno walayilizizye Abrahamurahamu muno we Klistu Yesu, alyakuti muno alisuwilo tupochelele e Muzimu wino Leza walayilizizye.
Amasundo nilayilizyo lyakwe Leza
15Wanawitu, nkasi mbalanjilizye muno awantu wakachitila: Ponsi pano awantu wawili wazumilizyania kwechimwi ndi wawalichilana nukuwalichilana ilayano, pasi wumwi wino angonona ilayano nanti akulyonjelezya atanga ayonjelezye. 16Achaleka Leza walayilizizye Abrahamu nuwikwata lyakwe. Amazwi matele yasinakuti Nawikwata lyako kuno akuli kusula, awantu wavule. Ukuwa yakuti nakuwikwata lyako, chino umuntu wenga, wino we Klistu. 17Chino nkutaka achoo: Leza walayile alayilizya ukufisya ilayano lyolyo. Amasundo yano yachisilwe pano imyaka yasila imyanda yini namakumi yatatu (430), yatanga yonone ilayano yavulunganie ilayilizyo lyakwe Leza. 18Amuno ndi chino Leza akupanga chikafuma kumasundo, fwandi ye chisifuma kwilayilizyo lyakwe. Ukuwa Leza wapile Abrahamu uwila amuno wamulayilizizye.
19Ngafwandi, amasundo yalinji nachani? Yonjelezizwe kukulanjizya ukutinsyania, iviwipe vino awantu wakachita ukuti vi lange vilipo asuke uwikwata lyakwe Abrahamu wino watasilwe ayizye-yize. Amasundo yatumilwe nawangeli, numuntu wino walinji ankombe. 20Nga inkombe ayachani ndikuli umuntu wenga? Lelo Leza weni aliwenganye-nsu.
Umulimo wamasundo
21Wuzye fwandi amasundo yakavulungania amasundo yakwe Leza?
Awe, nanti katichi-tichi! Amuno ndi amasundo yatele yapwa yano yangapa awantu uwumi, apano umuntu angalungamikwa nu Leza muno amasundo. 22Ukuwa amawaliko matele yavwanga yati, Insi yonsi yakumpizwa namaka yaluwembu, alyakuti uwila wuno walayilizizwe muno alisuwilo mwakwe Yesu Klistu wupwe wane wakusuwila.
23Ukuwa pano isuwilo lyachilinji ukwiza, amasundo yatwiyalizile swensinye muvingololo, lisuke isuwilo lino lyanga liwumbulike pansizi lize. 24Achaleka twasungwanga namasundo asuka Klistu ayiza, alyakuti tulungamikwe nu Leza muno alisuwilo. 25Achino kanonzi pano isuwilo liza, tutalemwa namasundo.
26Muno alisuwilo mwensinye mwewanakwe Leza mwakwe Klistu Yesu. 27Mwensinye mwabatizizwe mwakwe Klistu, achaleka mwakola Klistu. 28Achaleka pasi uwusyano wamu Yuda nanti alikandi, umuzya nanti amwanangwa, umonsi nanti amwanachi; mwensinye awuliwonga amuno muli mwakwe wenga e Klistu Yesu. 29Achaleka fwandi mwewakwe Klistu, ye apano mwe likwata lyakwe Abrahamu, ye mulipochelela chino Leza waliyilizizye.
Currently Selected:
Galatians 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
