Galatians 1
1
1E kalata wee wafuma kwe nenye ne Pauli ne muntu ntisilwe numuntu ukuti imbe nemupostile, nanti we Leza-nye atatumile umuntu wumwi kukwizanjita, ukuwa nisilwe nu Yesu Klistu nu Leza Mukwasi, wino wamuzyulupuzile kumfwa. 2Nawanawitu wonsi wane wali nani koo wakulamuka ama Klezia ya mwe Galatiya, apaliponga nani.
3Sivyo e Leza Umukwasi ni Mfumu e Yesu Klistu awafwile inkumbu awape umutende.
4E Klistu-nye umwenecho kukutupususya kuwuwipe wampindinye yoo,
wayipile muno aluwembu lwitu, ndimuno ukulonda kwakwe Leza witu Umukwasi kuli. 5Kwakwe weliwe kuwe uwukankala umuyayaya! Amen.
Ilandwe Zima lyonga-nsu
6Nkuzunguka namwe! Muno mukongoloka nanti kuzimba kwakwe wino wawisile nikumbu-nkumbu zyakwe Klistu, mwasamalila kwilandwe linji. 7Ukuwa kweni kusi Ilandwe Zima linji, navwanjila chonye-choo muno kuli awantu wamwi wane wakuwavundula muno wakwelezya ukupilula Ilandwe Zima ilyakwe Klistu. 8Ukuwa chingatenga nanti asweswenye, nanti amungeli wino wafuma mwiyulu, wiza wawawilila Ilandwe linji ilusye lino twawawilizile, ndi ayize apanzizwe kukulowa! 9Ndimuno twavwanjizile kali, avino nkunyochelela swinya: ndi wumwi wiza wawawitila Ilandwe linji ilusye lino mwapochelezile, ndi ayize apanzizwe kukulowa!
10Wuzye pano nkutaka choo mukuti nkasi awantu wambanzye? Awe! Nkulonda ukuwanzwa nu Leza! Wuzye mukuti nkasi ndumbililwe nawantu? Ukuwa ndi avino nchili indi, ntanga imbe nemupyunzi wakwe Klistu.
Uwupostile wakwe Pauli
11Mwewanawitu, nkasi mbanene kuno Ilandwe Zima lino nkawila litafuma kumuntu. 12Ntalipochelezile ukufuma kumuntu wumwi, swinya pasi umuntu nanti wenga wino wansambilizizye. Ukuwa we Yesu Klistu wambumbulizile.
13Amuno mwivwa imiwele yane yino nalinji mwenemo pano nalinji muchipepelwe chachi-Yuda, mwivwa vino nayimvyanga nanti nkumbu awantu wi Klezia lyakwe Leza swinya nawombesyanga nkaninye ukuti ndilovye. 14Nalutilizizye nkaninye pa wa Yuda wanji awankwatwa iyiliyonga nani mukukonka ichipepelwe chachi-Yuda. Nalutilizyanga ukulemasya nkaninye imyata yakwe watatakulu.
15Ukuwa Leza kunkumbu zyakwe, wampawuzile kuchali, anjita ukuti imbe nemupyunzi wakwe. Napo pane welenginie, 16ukumbumbulila Umwanakwe, alyakuti ndawizya Ilandwe lyakwe izima kumakandi, ntatela inje kumuntu wumwi ukuti akampe ilango, 17nanti akwe Yerusalemu-nye kuno kwalinji awasolwa wane wantanjilizile pakutalika ntatela inje kweneko. Ukuwa nayile ku Arabia nanti kuzinguluka, ngapano nyochela kwe Damasika. 18Yalile pano imyaka yasila yitatu apano inja kwe Yerusalemu ukuti nkivwe vimwi kwe Peter, inja njikala nawe amasabata yawili. 19Ntatela ndolane nawapostile nawanji suka ndiwe Jemusi, umunyina wa Mfumu.
20Chino nkuwalika achakusimichila. Nsinakuwipa uwufi, e Leza-nye awili kalola wane!
21Ngapansizi inja mumasyo yakwe Sirai namwe Silisia. 22Pampindinye yoyo awa Klistu wama Klezia ya mwe Yudeya wachilinji ukundola ichilungampumi, 23Wanjivwanga awowo kuno wakuti, Umuntu wino watuyimvyanga, kanonzi wee awino akuwizya ivyisuwilo lino weliwe walondanga ukulilovya! 24Achaleka awachindika Leza muno anene.
Currently Selected:
Galatians 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
