Ephesians 4
4
Kuli umuwili wonga
1Achaleka fwandi, nenenye nemukungwe muno nkawombela Imfumu nkuwalambilizya ukuti muwapita nimiwele yiliyonga yino Leza wawitizile mwenemo. 2Muwayichefya, muwe mwewachimyamya, nukupupuzya amanda yonsi. Muwakundana mbali nukwavwana. 3Muwe numwezo uwuliwonga wuno Muzimu wawapa, numutende wuno wawalemenkania apaliponga. 4Amuno kuli umuwili wonga nu Muzimu wenga, ndivino kuli ukulolela ukulikonga kuno Leza wawitizile. 5Kuli Imfumu yonga, usuwilo lyonga, ibatizyo lyonga; 6kuli Leza wenga Umukwasi wakwe wonsi, Imfumu yakwe wonsi, wino akawombela mwakwe wonsi, swinya ali mwakwe wonsi.
7Ukuwa wila muntu uwakwe sweswe wapochelela ichawila chimwi chino watupa, ukulingana nuwila wakwe Klistu. 8Ndivino Amawaliko Matele yavwanga yati,
Walile wakwela mupela
asenda intapwa mvule;
apa awantu ivyawila.
9Ale fwandi ukukwela mupela chikusula chani? Akuli kuti pakutalika wisile pansi—akuli kuti, pansi-pansi mumusili. 10Achaleka weyonye wino wisile pansi awino wanyosile akwela mupela, mupela-pela alusya namayulunye, alyakuti ayizule akwile monsipyu. 11Weliwenye awino wapile wila muntu ichawila; asontola wamwi awawa awapostile nawo wamwi awawa awatumwa, wamwi awakawizya wilandwe zima, nawo wamwi awachemi nawasambilizya. 12Wachisile wonye-woo alyakuti ayanie awantu wakwe Leza wonsi wize wapyunga mumulimo wakwe Klistu, wawomesya umuwili wakwe Klistu. 13Ngapane sweswe swensi tuwe apaliponga mwisuwilo lyitu nukumanya Umwanakwe Leza; apano yetwakula twawoma twawa swewasongo, twafika pachimo chikulu chakwe Klistu. 14Apano tulitela twafuma kuwana, wane wakasendwa namang'wimbi awatwalwa konsikonsi kuno umuza wasenuchila, umuza wamasambilizyo yawantu wamuchenjelo wano wakatungulula wanji awaleka awawifya muno amuchenjelo wawo. 15Ukuwa, ndi tukuvwanga nukusimichila mulukundo twazipila tukulile mwakwe Klistu wino wekatwe, muvintu vyonsi. 16Mwakwe Klistu-nye amuno ivyawi vyonsi ivyamuwili vyalimbinkanwa apaliponga, umuwili wonsi walimbinkana apaliponga namalimbilwe yonsi yano wuli nayo. Alyakuti pano wila chawi chikuwomba ndimuno chikulondela, umuwili wonsi wukakula awuyiwomya mulukundo.
Uwumi wupya mwakwe Klistu
17Nkuwasochelela mwizina lya Mfumu: ukuti mutize muwawa ndivino amakandi yali, wane imyelenganizizye yawo ayavye-yavye, 18wano amana yawo yafitikwa. Wali ukutali nuwumi wuno Leza akupanga, amuno ukutumba kwawo kwawalesya ukumanya chimwi. 19Ninsoni zyasowela kumwi; wayifyenenchezya kweng'ang'a, wakachita vyonsi ivikombezya nanti kupechela.
20Ukuwa mwenji mutasambilizile ivyakwe Klistu wowonye! 21Nachawuzimanye mwivwile ivyakwe, nga muno mwamukonsile mwasambilizile ukusimichila kuno kuli mwakwe Yesu. 22Achaleka sum bani ivyamyata yinu imikali, yino ikaleka mukwikala ndimuno mwikalilanga kali—uwuntu wukali wuno wanonekanga nukukopekwa kuwipe, 23alyakuti imyezo yinu namelcngania yinu viwe avipya. 24Muzwale uwuntu wupya, wuno welewuzilwe kuwukola wakwe Leza, wuno wayiwumbula muwulungamane namuwutele wakusimichila.
25Aleni kanonzi, tayani uwufi! Muwavwanjilana nukusimichila, amuno swensi awavyawi vyamuwuye numuwuye mumuwili wakwe Klistu. 26Muwala ndi mwavitwa, mutaleka ukuvitwa kwinu akulandalila akuwatwala kukuwembuka; mutize muwavitwa uwanda wonsi. 27Mutize musile Satana umwenko. 28Muleke umung'o aleke ukwiwa awawombela chino akulonda, alyakuti awe nilumbo zima, swinya awakwavwa nawapina. 29Mutize muwavwanga amazwi mawipe. Nkandi amazwi yakwavwilizya, amazwi yano yakawomya nukuchita chino chiyine, alyakuti amazwi yano mukuvwanga yangavwilizya wano wakwivwa. 30Mutize muwaleka Umuzimu Mwimichile wakwe Leza wuwawa namalanda; amuno Umuzimu achili chimanyilo chakwe chino chili pakwe mwemwe, wuno wukupanichisya uwanda wuno Leza alileka muwe mwewanangwa. 31Sumbani uwululu wonsi, ukukalala, nukuvitwa, nintusi pamwi ikwelengulo. Mutize muwawa nakapati kamwi. 32Ukuwa, muwawelana inkumbu muwe nimyezo mizima, swinya muwatetelana, ndivino Leza wawatetela mwemwe mwakwe Klistu.
Currently Selected:
Ephesians 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
