Ephesians 3
3
Umulimo wakwe Pauli wuno wawombezile amakandi
1Achino, nenenye ne Pauli, umukungwe wakwe Klistu Yesu muno mwemwenye mwemakandi nkapepa kwe Leza. 2Nkusuwila kuno mwivwa kuno e Leza, munkumbu-nkumbu zyakwe, awino wampa umulimo woo wakuwachitila mwemwe. 3Leza wawumbuzile inkama yilango lyakwe aleka imanya. (Nawawalichila amazwi matichi pakwe vyonye-vyoo, 4achaleka ndi mwawazya vino nawawalichila amuno mungasambilila vino nilusile inkama yakwe Klistu.) 5Kali-kali awantu watamanyile ivyankamanye yoo, ukuwa kanonzi Leza wayiwumbulila kuwapostile wakwe awatele nakuwatumwa mwakwe Muzimu. 6Inkama ili woo: muno alilandwe zima amakandi wasanzinkana apaliponga nawa Yuda wapepwa nu Leza; wawa amuwili wonga, wasanzinkana mwilayano lino Leza walayilizizye mwakwe Klistu Yesu.
7Muno ankumbu-nkumbu zyawila wakwe Leza, nawa nemupyunzi wilandwe zima, lino wampile namaka yakwe. 8Nenji nemutichi nkani ukulusye awantu wakwe Leza wonsi; ukuwa naponye Leza wampile ulongo lwakutwalila amakandi Ilandwe Zima ilyawuzi wuntapendwa wakwe Klistu, 9ukuti awantu wonsi walole vino Leza alifisya ivyankama yakwe. E Leza, Umwelewuzi wavintu vyonsi, wafisile inkama yakwe kunkulo nkani zyonsi, 10alyakuti kanonzi, muno ali Klezia, awangeli nawakapanzya wamunsi yamwiyulu wamanye amana yamisango misango ayakwe Leza. 11Chino walonzile ukuchita ukufumilila umuyayaya achili chino Leza wachitila mwakwe Klistu Yesu Imfumu yitu. 12Mwakwe wino tuli mwenemo, wino isuwilo litu lili mwakwe weliwe, twawa swewanangwa wakwinjila kwakwe Leza nanti kuvwilika. 13Achaleka nkuwalambilizya ukuti mutafwa ipwepwe muno nkutamichila mwemwe; nkutamika alyakuti mwensi muchindamikwe.
Ulukundo lwakwe Klistu
14Muno achonye-choo. nkusokowala ku Mukwasi, 15wino uwukwasi wonsi awakusimichila, uwamwiyulu namunsi wafuma kweweliwe. 16Nkulambilizya Leza, ukuti awapungulile ukuchindamikwa kwakwe awape amaka mwakwe Muzimu alyakuti muwome nkani mumyezo, 17Klistu ayikale mumyezo yinu muno alisuwilo. Nkulambilizya ukuti musimpe imisisi mulufula lwalukundo, 18alyakuti mwemwenye, apaliponga nawantu wakwe Leza wonsi, muwe namaka yakwiluka vino uwupapatale nuwutali nichimo nga nukuzika vyalukundo lwakwe Klistu vikusula. 19Molimonye, mumanye ulukundo lwakwe Klistu—chingatenga mutanga mulumanye mufike pakafiko—alyakuti mwizuzwe-pwi nu Leza-nye umwenecho.
20Achaleka kwewino wamanya ukuchita nkani ukulusye vyonsi vino tukalenga, nanti avino tukakwelengania, ndimuno amaka yakwe yano yakawomba mwakwe sweswe yawela: 21kwakwe weliwe kuwe uwukankala mwi Klezia namwakwe Klistu Yesu, kunkulo zyonsi, umuyayaya! Amen.
Currently Selected:
Ephesians 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
