Ephesians 1
1
1E kalata wee wafuma kwe Pauli, wino muno akulonda kwakwe Leza wawa amupostile wakwe Klistu Yesu—
Kuwantu wakwe Leza wane wakakwikala mwe Efeso, wane wakalemasya ukusuwila Klistu Yesu!
2Sivyo e Leza e Tata ni Mfumu e Yesu Klistu awapepa nukuwapa umutende.
Ukupepwa kwakwe Leza muno we Klistu
3Aleni tuwasalifya Leza Umukwasi wa Mfumu yitu e Yesu Klistu. Amuno watupepa, watuminkania apaliponga mwakwe weliwe, watupa ichawila chonsi ichamuzimu munsi yamwiyulu. 4Pano insi yachilinji ukutumbulwa, Leza watwimichizile kali ukuti tuwe swewakwe muno we Klistu, alyakuti tuwe swewatele wane wasi nakasinza pakwe weliwe. Muno alukundo lwakwe, 5Leza welenginie kali-kali ukuti mwakwe Yesu Klistu atupalamizye kweweliwe tuwe swewanakwe — konye-koo akuli kulonda kwakwe kuno wasozile. 6Saleni tuwalumvya Leza kunkumbunkumbu zyakwe, kuwila wakwe wuno watupa mu Mwanakwe umukundwe!
7Twakomolwa nimfwa yakwe Klitu, kuno akuli kuti, twatetelwa uluwembu lwitu. Ye, inkumbu zyakwe Leza zyakula wuli. 8Namano vino watufwizile wonyewoo! Namano yakwe yonsi ninjelu zyonsi. 9Leza wachita chino walondanga, watuwumbulila inkama yakwe yino welenginie kali ukuti achite mwakwe Klistu. 10Ilango lyakwe Leza, lino alifisya pano impindi yiza yafichila, alyakuwunganika ivitumbulwa vyonsi apaliponga, ivyamwiyulu vyonsi nivyamunsi moo, nawe Klistu ayize awe we Katwe wakwe vyonsi.
11ivintu vyonsi vyachisilwe ndimuno ilango lyakwe Leza namelengania yakwe yawela; momonye amuno watusolezile ukuti tuwe swewantu wakwe mwakwe Klistu, achitila ndimuno welenganizizye pakutalika-talika. 12Achaleka, aleni fwandi swewantu twalolelanga Klistu pakutalika, tuwatumvya uwukankala wakwe Leza!
13Namwenye avino chalinji: pane mwivwile amazwi yakusimichila, ayilandwe zima yano yawaletezile itulwa, mwasuwizile mwakwe Klistu, nu Leza ichimanyilo chakwe pakwe mwemwe muno wawapa Muzimu Mwimichile wino walayilizizye. 14Twapanichisizwa nu Muzimu ukuti tulipochelela chino Leza walayilizizye awantu wakwe, swinya Muzimunye watulayilizya kuno Leza alikomola wonsi wane awakwe. Aleni tuwatumvya uwukankala wakwe!
Ipepo lyakwe Pauli
15Muno achonye-choo, nalile nivwa ivyisuwilo linu mu Mfumu e Yesu nivwa nivyalukundo lwinu kuwantu wakwe Leza wonsi, 16ntatela nalechelezya nanti katichi-tichi ukuwasalifizya kwakwe Leza. Nkuwizukanga mumapepo yane, 17ndanga nkulambilizya Leza wa Mfumu yitu e Yesu Klistu, Umukwasi wakuchindamikwa, ukuti awape Umuzimu, wuno wungawapa mana wuwawumbulile Leza, alyakuti mumumanye. 18Nkamulambilizya ukuti muwe namano yakulola ukuwala kwakwe, alyakuti mumanye ukulolela kuno wawitila, mumanye ukupepwa kukulu kuno walayilizya awantu wakwe, 19nukukulisya kwamaka yakwe mwakwe sweswe swewantu tukamusuwila. Amakanye yaa yano yali mwakwe sweswe amaka makulu ayaliyonga 20yano walinji nayo pakuzyulupula Klistu kumfwa, amuwika kwikasa lyakwe ilyandilo munsi yamwiyulu. 21Momonye munsi yamwiyulu mwilewelewe amuno Klistu akapanzya wonsi, amawufumu, nawamaka, nawakankala; wakula walusya awamaka wonsi munsi yonsi nuwukulu iyampindi yoo nayino iliyiza. 22Leza waleka Klistu walyatanjila vyonsi namatamba yakwe, swinya waleka wawa wekatwe wi Klezia wawa a Mfumu nkulu pakwe vyonsi, 23I Klezia alili muwili wakwe Klistu lino lyaleka wafika pakafiko, nawe wafisya ivintu vyonsi pakafiko munsi yonsi nuwukulu.
Currently Selected:
Ephesians 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
