2 Timothy 4
4
1Inkukumolezya paminso yakwe Leza napaminso yakwe Klistu Yesu, wino alipanzya awantu wonsi, awapuma nawafwe: swinya muno akwiza kwakwe nuwufumu wakwe, nkukukomelezya 2ukuti uwawizya amazwi, ulange ulemasizye ukunena awantu, mumpindi nzipile nimbipenye; ulange ukuwasinila, nukuwakalipila, uwawachinchizya, mbali nukuwasambilizya nukutechelela konsi. 3Impindi iliyiza pano awantu wataliwakwivwa imisambilizizye yakusimichila ukuwa walikonka ukulonda kwawo ukuwipe, waliyilonganichila awasambilizya wavule wane waliwawanena vino wakuluchila ukwivwa. 4Walifutatila ukwivwa ivyakusimichila wapetuchile kuvyili. 5Ukuwa wenji, Timoti, uwayisunga mwevyonsi; uwazizimichizya mukuyimba, uwawomba umulimo wakwe wakawizya wilandwe zima, uwawomba umulimo wonsi uwe wemuwomvi wakwe Leza.
6Ukuwa nenji, ne Pauli, impindi yakulemekwa kwane yapalamila; impindi yafichila iyakuti insye uwumi woo. 7Nachimvya mukusamala uluwilo, nafika napakafiko, nakanonzi ne waa nchili nemusuwilwa. 8Kanonzi ichilambu chakuchimvya kwane chikundindilila, ichisyombo chawulungamane chino Imfumu, ekapanzya mulungamane, alimpa pawandanye wowo—atalimpa nene nenga, ukuwa nawonsi wano wakalindilila ukwiza kwakwe nulukundo.
Vino awantu wamwi wawa
9Wenji vulumuka uyize kwakwe nene nanti kuzimba. 10Demasi weni wapotwa wansamala muno wakunda ivyamunsi yoo waya ku Tesalonika. Kriseni waya ku Galatiya, nu Taitasi waya ku Dalamatiya. 11E Luka mutupu awino indi nawe. Pakwiza uyize usende Marko mwize nawe, amuno nkumulonda ukuti ayize anjavwe ukuwomba. 12Natuma Tikikasi ku Efeso. 13Pano wiza wakwiza uyize undetele ichizwalo chane chino nasile kwe Karipasi mu Trowasi, uyize ulale wandetela namabukunye, nkani-nkani wakalata wamikwela.
14Alekizander emusyani wanchisile uwuwi nkaninye; Imfumu ili landula ndimuno wanchitizile. 15Uwachenjela nawe nkaninye, amuno wakanuzizye amazwi yitu nkaninye.
16Pakuluwulula kwane ukwakutalika pasi wumwi wino wanjimilizile; wonsi wasamazile awansya. Naponye sivyo Leza aleka watawa nuluwi lumwi! 17Ukuwa Imfumu yisile nani impa insimpo, ngapano imba namaka yakuwizizya Ilandwe kumakandi yonsi ukuti yivwe; swinya nafyusizwe kumulomo wachimbwi. 18Swinya Imfumunye ayino yandi imfyusye kumilimo yankota yonsi, asuke ayize ansende ulumi an twale mu Wufumu wamwiyulu. Kweweliwe kuwe uwukankala wamuyayaya! Amen.
Umulamu wakupelelechezya
19Nkulamuka Prisila nu Akwila, swinya nkulamuka awachiwanza chakwe Onesiforasi. 20Erasitasi wasyala mwe Korinte, nani nasi le Trofimasi mwe Mileto, muno walinji amulwale. 21Uyize uyandane pane kutani kuwe achisiku.
E Yubulasi, nu Pudeni, Linusi, nga nu Klaudiya wakukulamuka, nawana witu wonsi wakukulamuka.
22Imfumu iwakusunga mumwezo wako.
Inkumbu-nkumbu zyakwe Leza ziwawa namwe mwensi.
Currently Selected:
2 Timothy 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
