2 Timothy 3
3
Amanda yakupelelechezya
1Yizukanga chonye-choo! Kuno impindi zyawuyimvi ziliyiza mumanda yakupelelechezya. 2Awantu waliyikunda, wawe nichami, nukuyitutuwalika, wakayiwanzye; waliwatukana intusi, imintatontela awakwasi wawo, imintasalifya, imintapepa Leza; 3waliwa awakalale, nanti nkumbu, awachinenia nuwukwakwa, awalombwa, wachisanguka; wane wapata uwuzima; 4waliwa awakayiletelela, awamufulo, wane wakayitutuwalika nichilumba; wane wakundisya ukuyilosya ukulusye Leza; 5kulonde waliwaloleka nagati wakapepa naswe ukuwa awalanga wakukankamula amaka yenecho. Funtukanga kuwantu wamwatanye woo. 6Wamwi wakaselela mung'anda zyawanachi wazoke awawapatichizya wane wang'wamilwa nuluwembu awasowa nukulonda kuwipe kwanyengwa konsi, 7awanachi wane wakalondesya ukusambilila ukuwa nanti kumanya ukusimichila muno kwawela. 8Ndivino Janesi nu Jambresi wane wakatuchizile Musa, avino nawantunye waa wakatuchila ukusimichila-awantu wane wasikwelengania chimwi wano wapotwa isuwilo. 9Ukuwa watalilandalila wafike apatali, amuno uwutumpe wawo wuliloleka kuwantu wonsi, ndivino chalinji kwe Janesi nu Jambresi.
Ukuchinchizya kwakupelelechezya
10Ukuwa vino wanji wakonka imisambilizizye yane, nimyata yane, nuwulu ngamo wane; walolechesya isuwilo lyane, ukupupuzya kwane, ukulundo, ukuzizimichizya, 11ukuyimba, nukulumwa. Wamanya ivintu vyonsi vino vyamponezile mwe Antioki, na mwe Ikoniam, na mwe Listra, pano nazizimichizizye ukuyimba kukulu! Ukuwa Imfumu yamfyusizye mukuyimba konsi. 12Wonsinye wano wakulonda ukukonka e Leza nukupita nu Klistu Yesu wandi wayimvwa; 13ukuwa awantu wawipe weni nawakachenjezya wandi walunduluka wakulutilizya nuwuwipe wawo, wachenjezya wanji mbali nawonye awalanga wakuchenjezwa. 14Ukuwa wenji, Timoti, landalila mukusimichila kuno wasambilizizwe usuwile chikale chiti-ndi. Wamanya wano walinji awasambilizya wako, 15swinya yizukanga kuno ukufumilila uwutichi wako wamanya Amazwi Matele, yano yangakupa amana yakusambilizye ukusuwila. Klistu Yesu nga uyize utulwe. 16Amazwi Matele yonsi yafutilwa numupo wakwe Leza yawa amazwi yano umuntu angawombela kukusambilizya ukusimichila, kukukalipipila amaluvyo, kukusundila ukuwifya, nukusambilizizya imyikalile mizima 17alyakuti umuntu wino akupyunjila Leza afike pakafiko ayipangasye ukuwomba imilimo mizima yonsi,
Currently Selected:
2 Timothy 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
