2 Timothy 2
2
1Ukuwa wenji, mwanane sivyo e Leza wino akatufwila inkumbu mwakwe Klistu Yesu akuwomesye. 2Sunganga amazwi yano wivwile nkuwizizya awantu wavule, usambilizye awantu wane wasuwila uleke wayamanye, alyakuti nawo wasambilizye awantu wanji.
3Ale nawenye yimbanga, uwe wemusika musuwilwa uwakwe Klistu Yesu. 4Uwe ngati wemusika wino akaIwisya namaka yonsi ukuti asechelesye musika mukulu wakwe, wino asipungana nivintu vino awamutwaya wakachita. 5Amuno wano wakachimvyana pakusamala uluwilo watanga wapochelele ichilambu ndi watatontezile amasundo muno yawezile. 6Umulimi wino akawombesya namaka akapochelela ivizawalo vizima ivyakutalika. 7Ale, yelenganianga vino nkutaka, amuno Imfumu yandi ileke uwe namaka yakwiluka ivintu vyonsi.
8Yizukanga e Yesu Klistu, wino wazyulupuzilwe kumfwa, wino walinji awapachiwanza chakwe Davidi. ndimuno nkawizizya Ilandwe zima. 9Nkayimba muno akuwizya Ilandwe zima, swinya nkanyepwa niminyololo ngati nesimilandu. Ukuwa Ilandwe zima lyeni litanyepwa, 10achaleka muno achonyechoo nkuzizimichizya muvintu vyonsi muno awapostile wakwe Leza, alyakuti nawonye wize watulwe nu Klistu Yesu, wapochelele nuwukankala wamuyayaya. 11Yaa amazwi yakusimichila yano yati:
Ndi twafwa nawe,
swinyanye tuliwawa nuwumi nawe.
12Ndi twazizimichizya,
swinyanye tuliwapanzya apaliponga nawe.
Ndi twamukana, nawenye alikukana.
13Ndi swemintasuwila,
weni akulanga amusuwilwa wape,
amuno atanga ayiwipe umwenecho.
Umuwomvi wakusimichila
14Yisuzyanga awantu wako chonyechoo, uwawasochela nkaninye paminso yakwe Leza ukuti watize walwisyania amazwi. Ukulwisyania kwamazwi kusifungula ichizima chimwi, ukuwa kukakonona awantu wane wakwivwa. 15Uwawombesya alyakuti uwe nulumbili luzima pankolelo pakwe Leza, uwe wemuwomvi wino asiwa ninsoni pakuwomba umulimo wakwe, wino akasambilizya ichetenye amazwi yakusimichila ayakwe Leza. 16Ukuwa awalewuka ukuvwanga-vwanga kuwipe nimipanzi yavye. vino vikasunchilizizya awantu ukutali nu Leza. 17Amuno imisambilizizye yawo ililunduluka ngati ankonko yino ikalya umuwili. E Himenesi nga nu Filetasi awasambilizyanye wawili wane wakachita wowonye. 18Wasya inzila yakusimichila wakapungania isuwilo lyakwe wano wasuwila wamwi wakuti ukuzyulupuka kwitu kwasila kali. 19Ukuwa ulufula luwome luno Leza wazenga lutanga luyinganwe; namazwi yawalikwa penepo yati: Imfumu yamanya wane awakwe; nayakuti: Nawensi wino akuti ne wa Mfumu wazipila ukuleka inzila mbipe zyonsi.
20Mung'anda nkulu muli iviya vyamisango yonsi iviyo nindweso: vimwi avyakwe silivara nu golide, navinji avyamiti nivyivu; vimwi avyakuwombela pampindi nsontolwe, navyo vinji avyakuwombela mumpindi zyonsi. 21Achaleka ndi wumwi wayiswefya wafuma kwakwe vyonye-vyoo iviwipe, angawombelwa mumwata wuzima, amuno ye wimichilwa wawa amuntu wakusimichila kwakwe Yisikulu, wino angawombelwa kumulimo wonsi uwuzima. 22Ukuwa lewukanga ukukumbuchila kwavyawulumendo, uwalwila uwulungamane, isuwilo, ulukundo, numutende, apaliponga nawamyezo miswepe wane wakalilila Imfumu ukuti awavwe. 23Ukuwa utize uwawa nimipanzi pane utamanyile chimwi; amuno wamanya kuno amazwi mawipe yakaleta ulombwa. 24Umuwomvi wa Mfumu atazipila ukuwa nimipanzi. Wazipila ukuwa ninkumbu nawantu wonsi, wazipila awa amusambilizya muzima e chimyamya, 25wino akazizimichizya wane wakumukatuchila ukuti watontolokwe wamanye ukusimichila, 26Ngapano welengania ichete wafyutumuke kuchipingo cha Muwipe, wino wawalemile aleka wamutontela.
Currently Selected:
2 Timothy 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
