2 Timothy 1
1
1E kalata wee wafuma kwe Pauli umupostile wakwe Klistu Yesu muno akulonda kwakwe Leza. Natumwa kukuwizya uwumi wuno e Leza walayilizya ukupa wane wakusuwila Klistu Yesu nukwikala mwakwe weliwe.
2Kwe Timoti, umwanane umukundwe nkuti.
Sivyo e Leza e Tata nu Klistu Yesu Imfumu yitu awa ninkumbu nawe, awakulolela uluse, nukukupa umutende.
Ukusalifya nukusimpisya
3Nkusalifya Leza wino nkapakata nukusinga kwane konsi, ndivino watatakulu wachitanga, ponsi pano nkakupepela, uwusiku numusanya nkasalifya Leza. 4Muno akwizuka ukulila kwako we Timoti, nkulondesya nkaninye ukuti njize nkulole, alyakuti imbe nichimwemwe. 5Nkula nizuka kuno uli nisuwilo lyenecho, njizuka nisuwilo lino nunyokokulunye e Loisi nga nunyokonye e Yunisi walinji nalyo. Nkupanichisya kuno avino nawenye uli. 6Achaleka nkukwizusya ukuti ulemasye ichawila chakwe Leza chino wakupile pano nawisile amakasa yane pakwe wewe. 7Amuno ichawila chino Leza akutupanga chisi achantete; ukuwa, Umuzimu wakwe wukatwizusya namaka, nulukundo, nukusinga.
8Achaleka utize uwalola insoni, pano ukupanichisizya Imfumu yitu; nanti akuwa ninsoni pakwe nene, nemunyepwe wakwe. Ukuwa zizimichizyanga mukuyimba muno a Ilandwe zima, ndimuno Leza wakupela amaka yakuwizizya. 9Watutula swinya watwita ukuti tuwe swewantu wakwe, asi amuno twachita ichizima chimwi, ukuwa amuno ankumbu nukulonda kwakwe. Watufwizile inkumbu mwakwe Klistu Yesu kali pano ninsi yachilinji ukwelewulwa, 10ukuwa kanonzi zyawumbulika kwesweswe muno akwiza kwakwe Katula witu e Klistu Yesu. Wino wonona amaka yamfwa, wawumbula nilandwe zima lyawumi wuntafwa.
11Leza wansontozile nene ukuwila Ilandwe zima ukuti imbe ne mupostile swinya imbe nemusambilizya, 12achaleka muno achochonye nkuyimba kuvintunye vyoo. Ukuwa indi nisuwilo, amuno namanya wino nasuwila, swinya namanyichisya kuno ali namaka ukusunga ichete chino wandemeka ukwizafika napawandanye wowo. 13Lemasyanga amazwi yakusimichila yano nakusambilizizye, ukuti avino uwe, uwakwikala mwisuwilo namulukundo vino wewe nani twasanzinkana apaliponga nu Klistu Yesu. 14Lemasyanga ivintu vizima vino walemekwa, mumaka ya Muzimu Mwimichile, wino akuwanga naswe.
15Wewe wamanya kuno awantu wonsi awamuchipya chansi ya Asia wampiluchizile awasamala awansya, apaliponga nu Figelo nu Heromogeni. 16Sivyo Imfumu iwa ninkumbu kuchiwanza chakwe Onesiforasi, amuno wansansamusyanga impindi mvule. Atafwanga insoni muno nalinji nemukungwe, 17ukuwa walanga pane wafika mu Roma ayiza mukumvwamba. 18Sivyo Imfumu imufwila inkumbu azifuma kwakwe Leza pawandanye wowo! Swinya wamanya nkaninye ivintu vivule vino wanchitizile mwe Efeso.
E musika wakusimichila uwakwe Klistu Yesu
Currently Selected:
2 Timothy 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
