2 Peter 2
2
A wasambilizya wawufi
1Kali kwakatusile awatumwa wawafi; achaleka avino namwakwe mwemwenye mulikatuka awasambilizya wawufi. Walileta imisambilizizye yawufi iyakulovya, imisambilizizye yakukana Tatakulu wino wawakomozile nga wayiletelele ukwiwuchizwa kwakulowa. 2Naponye awavule walikonka inzila zyawo zyawukwelengusi; muno vino woliwonye wakachita, awantu wize wavwanjila ukusimichila uluwi. 3Awasambilizya wawufinye wawo, waliwalonchela pamitwe yinu pakuwanena amalandwe yavye. Amuno kanonzi yawa ampindi ntali pano Kapanzya wawo apano ali, nu Kalovya wawo akawalindilila nanti kuponechela.
4Leza atatela alechelezye awangeli wano wawembusile, ukuwa wawasumbizile mwilungu lyamulilo, muno wanyepwa niminyololo mumfinzi, kukulindilila uwanda wipanzyo. 5Leza atatela alechelezye insi nkali, ukuwa waleile intalala munsi kuwantu wawipe; afyusya Nowa mutupu wino wawizyanga ivyawulungamane, afyusya nawantu wanji munenulambali. 6Leza asunda utwaya twakwe Sodomu nu Gomora, atocha numulilo, alyakuti imintawela Leza ilolele vino nawonye chiliwaponela. 7Leza afyusya Loti umuntu muzima, wino walewukanga kuvyawukwelengusi vino wachinzinkania wachitanga. 8E Loti-nye weyo muzima wikalanga nawo swinya amanda yonsi walolanga mbali nukwivwa ivintu viwipe vino vyamuchisanga mumwezo wakwe. 9Achaleka Leza wamanya umwakufyusizya awantu wakwe awazima kukwelezwa kwawo, swinya wamanya ukusunga awawembu kukulindilila uwanda wakupanzwa kwakusundwa kwawo, 10nkani-nkani wawo wano wakachita ivyawukwelengusi vyakulonda kwamiwili yawo wawo wano wakakana amasundo yakwe Leza.
Awasambilizya wawufi wawo, wasinga wali nivilumba, wasipechela ukuchindika uwukankala wawamwiyulu; ukuwa wakawukwelengula. 11Nawangelinye, wano wawoma wakazawana ukulusye awasambilizya wawufi, weni wasiwakwelengula paminso ya Mfumu. 12Ukuwa awantunye waa weni imiwele yawo wakachita ngati anyama zyalonde zino zikakwatilwa ukulemwa nukukomwa; weni wakukwelengulanga ivintu nanti kulowoka; waliyononwa ngati anyama zyalonde; 13walilambulwa ukuyimba kuno wayimvyanga wanji. Weni ukulonda kwawo akwakuchitila chonsi chino wakasi ukuyilosya numusanya wukulola; ukuti watimye ichilaka chamiwili yawo; awakasonzya nsoni pano wayisanzya pachakulya pakwe mwemwe, amuno pano wachili wakuyitevya awalanga wakulandalila ninzila zyawo izyichenjezya! 14Wasilonda ukulolechesya aminso yawo pakwe chinji nkandi pawanachi wazelele watupu; ichilaka chaluwembu lwawo chisisila. Wakakolelela awantu watonte awaleka awalemwa muvipmgo, Imyezo yawo yawelela ukufunuka. Watipwa nu Leza! 15Wafuma munzila njololoke wapambuka wayakunji; wakakonka inzila zyakwe Balamu umwanakwe Beori, wino wakunzile indalama zino walondanga ukupochelela munzila mbipe, 16akalipilwa nukukalipilwa kukuchita uluwembu. Indokwe yino isivwanga yavwanzile izwi ngati alizwi lyamulawa ilesya uwuchipena wamutumwa.
17Awantu wamwatanye woo wali ngati atuntopwezi tuno twakalanguka, swinya wali ngati amawingo yano yakasendwa nichipunga; nu Leza wawayanizya amasyo pansi-pansi mumfinzi. 18Wakavwanga amazwi yachilumba ayawutumpe, awalechelezya ukulonda kuwipe kwa miwili yawo alyakuti wakwemele wano watalika kanonzi ukufuntuka kwewakatinsyania. 19Wakawalayilizya uwanangwa, pano weni wali muwuzya wamyata yakulowa—amuno umuntu wensi akuwanga amuzya kwechino chamuchimvya. 20Amuno ndi umuntu wafyuka kwikombezya wipe ilyamunsi pano wamanya imfumu yitu swinya e Katula e Yesu Klistu, awanyoka awakolowenkana mwenemo swinya awachimba, awantu wamwatanye wowo wawipisya walutilizya napakutalikanye. 21Fwandi changa chiwe kuyenje ndi watanga watele wamanye inzila zyawulungamane ukulusye ukuzimanya swinya ukufuma kwisundo Iyimichile lino wapilwe. 22Chino chaponezile awantunye wawo achakupanichisya kuno umulumbe wasimichila wuno wati, Imbwa ikanyochelela kwechino ilusile, nuwakuti, e kapoli wino asamvile akanyochela aya mukuvumvula mumatipa.
Currently Selected:
2 Peter 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
