2 Peter 1
1
1E kalata wee wafuma kwe Simoni Peter, umuwomvi swinya umupostile wakwe Yesu Klistu—
Kwakwe wane wapochelela isuwilo zima nkani apaliponga naswe muno awulungamane wakwe Yesu Klistu wino we Leza witu mbali we Katula,
2Sivyo mumanye Leza nu Yesu Klistu Imfumu yitu, alyakuti inkumbunkumbu numutende viwavula mwakwe mwemwe.
E Leza wino watusola awino watwita
3Amaka yakwe Leza ayano yakatupa ivintu vyonsi vino tukasowelwa alyakuti tumanye Leza tuwamukonka mu miwele yitu, e Leza wino watwisile ukuti tuwakwikala muwukankala wakwe nuwuzima. 4Watupa ivyawila vyawuzi wukulu vino watulayilizizye, alyakuti muno avyawilanye vyoo namwe mupochelele itulwa mulufume kukulowa kuno kuli munsi yonsi muno akulonda kuwipe, mwize mukolane nu Leza. 5Aleni, muno achonye-choo muwak onjelezya uwuzima kwisuwilo lino muli nalyo; nako kuwuzima muwakonjelezya ukumanya; 6nakukumanya muwakonjelezya ukutekana; nakukutekana muwakonjelezya ukuzizimichizya; nakukuzizimichizya muwakonjelezya ukutontela Leza; 7nakukutontela Leza muwakonjelezya uwunyina; nakuwunyina muwakonjelezya ulukundo. 8Vyonye-vyoo avino mwasowelwa, achaleka ndi vyonye-vyoo vyanyama mwakwe mwemwe apano mungawombesya muwe mwewafumachumi kukumanya Imfumu yitu e Yesu Klistu. 9Ukuwa wino asi nivintunye vyoo atela antonko yino isilola, swinya atela wiwilila kuno uluwembu lwakwe ulukali lwapwizwa.
10Achaleka aleni fwandi, wanawitu muwalemasya penye muno Leza wawita wawasola; ndi mwawa wowonye, ye mwalala mwasimpa imisisi nanti kwiza pona nawanda. 11Paponye apano mwize mupochelele ulongo lwakwiza yinjilila muwufumu wamuyayaya uwa Mfumu yitu swinya e Katula e Yesu Klistu.
12Muno achonye-choo nandi ndange nkawizusya ivintunye vyonye-vyoo, chingatenga mwavimanya kali swinya mwasimpa namwisuwilo lino mwapochelela. 13Nkuti chanzipila akuwizusya ivintunye vyoo awowo, pano nchili nemulanzi. 14Manyile kuno ndizula umuwilinye woo wuno wukafwa nanti kuzimba, ndimuno Imfumu yitu e Yesu Klistu waleka namanyila. 15Achaleka fwandi nandi ndemasye, ukuwazanila inzila yakuwizusya nanti niza nafwanye.
Twayilolezile ukuchindamikwa kwakwe Klistu naminso yitu
16Tutawumizile imilumbe pakuwamanyisya ivyakwiza namaka ukwa Mfumu yitu e Yesu Klistu. Twayilolezile uwukankala wakwe naminso yitu. 17Twalinji paponye pano Umonsi wakwe e Leza wamuchindamikanga, pano izwi lyayile kwakwe weliwe ukufuma ku Mukankala mulusye, lino lyatili, Wee a Mwanane umukundwe, nkusechela nawe nkani! 18Twayivwizile nalwitu pano izwinye lyoo lyafumile mwiyulu, pano twalinji nawe pamwamba wamuzilo.
19Achaleka twapanichisya amazwi yano awatumwa watumilwe. Yayonye ayano namwenye mwazipila ukuyalemasya, amuno yali ngati alukozyo luna lukwaka mumfinzi, mpaka akucha pano ukuwala kwalutanda lwamachelo lwati luwawala mumyezo yinu. 20Ukuwa ukulusye vinji vyonsi, yizukanji choo: pasi wumwi wino angayilondololela ivyawutumwa wamawaliko matele. 21Amuno amazwi yawutumwa yasitela yize kukulonda kwamuntu, ukuwa wantu winjililwanga nu Muzimu Mwimichile apano awavwanga amazwi yano yafumanga kwe Leza.
Currently Selected:
2 Peter 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
