2 Wakorinte 9
9
Ukwavwana kwawina Klistu
1Chisi chakuti ngafwa nukuwawalichila chimwi kuvyawila vino vikutumwa kuwantu wakwe Leza wano wali mwe Yudeya. 2Nawamanya kali kuno mukalondesya ukwavwa, swinya nkawawanzya nkaninye ku wantu wa mwe Makedonia. Nawanenile inti, Awanawitu awa mu nsi yawa Griki weni wakayipamvya ukwavwa ukufumilila mumwaka wuno wasila. Ukuchinchila kwinu kwakatusya imyezo yawo nkaninye. 3Aleni, kanonzi natuma awanawitu wawo, ukuti ukuwawanzya kwitu kutize kuwe akwamazwi matupu. Ukuwa ndivino natasilenye, mwandi muwavwe. 4Naponye, ndiniza-niza nawantu wanji ukufuma ku Makedonia, chingiza chitupe insoni nkaninye namwemwenye apaliponga ndiwazana mutayisengania—pano twawasuwila nkaninye! 5Achaleka nelenginie ukuti nkomelezye awanawitu waa ukuti wakolele wize wayanie lyankani ivyawila vino mwalayilizizye ukufima. Alyakuti pano niza nafika njize nzane vyonsi vilipo, chochonye chililanjizya ukuti mukapa nukulonda kwamyezo yinu, kusi akukupatichizwa.
6Ukuwa yizukani choo: wino akatanda ayelelezya akasinza tutichi; nawe wino akatanda imbeyu mvule akasinza ichakulya chivule. 7Umuntu wensi wazipila ukupa, apela ndimuno akulondela, nanti kukwinuluka pamwi ukuwa namelengania yanji; amuno, Leza wakunda wino akapa mbali nichimwemwe. 8Leza ali namaka ukuwapa alutilizye pano mukulondela alyakuti muwe navyonsi vino mwasowelwa, swinya muwe nivivule mulutilizye kumilimo yonsi mizima. 9Ndivino Amawaliko Matele yavwanga yati,
Ali ninkumbu zyakupa awapina;
inkumbu zyakwe azyamuyayaya.
10Nga e Leza wino akupanga imbeyu kwekatanda amupa nichakulya, awino namwenye aliwapa imbeyu yonsi yino mukulonda ukutanda ukuti ikule, alyakuti mwize musinze ivivule ivyankumbu zinu. 11Alilanga akuwachindamika alyakuti muwawa ninkumbu penye, alyakuti awavule wasalifya Leza kuvyawila vinu vino wakupochelela kwesweswe. 12Amuno umulimo wuno mukuchita wusi amulimo wakupyunjila awantu wakwe Leza watupu, ukuwa swinya wukuleka awavule awasalifya Leza nkani. 13Swinya muno akupanichisya kwa mulimo wuno mukachita awavule waliwatumvya Leza muno akutontela kwinu kwilandwe zima ilyakwe Klistu, lino mukawizya, nakunkumbu zyawila winu wuno mukuwapanga nukupa nawanji awavule. 14Achaleka wandi wawapepela nimyezo yawo yonsi amuno ankumbu-nkumbu zino Leza wawachitila mwemwe. 15Fwandi aleni tuwasalifya Leza kuwila wakwe uwusi wakutaka!
Currently Selected:
2 Wakorinte 9: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
