2 Wakorinte 8
8
Ukufima kwawina Klistu
1Wanawitu, tukasi ukuti mumanye vino inkumbu-nkumbu zyakwe Leza zyachita mu ma Klezia ya mwe Makedonia. 2Walanga welezwa uwuwi nkaninye nintazi mvule; ukuwa ichimwemwe chawo achikula achilutilizya nukufima kwawo kwalinji kusi akwakutaka, chingatenga walinji awasaluke nkaninye, 3Nkuwanena nukusimichila konsi, kuno wafimile nimyezo yawo yonsi, awafima awalutilizya. Nukufima kwawo ukwakuyikundila 4awatulambilizya numutembo ukuti nawonye wayisanzye kukupyunjila awantu wakwe Leza wano wali mwe Yudeya. 5Wachisile awalutilizya ndimuno twawasuwililanga! Icha kutalikatalika wayipile ku Mfumu; nga swinya muno akulonda kwakwe Leza, awayipa nakwakwe sweswenye. 6Achaleka atukomelezya Taitasi, wino watalisile umulimonye woo, ukuti alandalile nawo alange akuwavwilizya mumalizye umulimo wonyewoo walukundo. 7Mwawotoka muvintu vyonsi: mwisuwilo, namukuvwanga, namumano, mukulondesya ukwavwa, nga nukutukunda kuno mwatukunda. Achaleka tukulonda ukuti muwe ninkumbu mumulimo woo uwalukundo.
8Nsinakuwapa isundo. Ukuwa nkulonda mulole vino wanji wali nichangwe chakulonda ukwavwa, nkasi manyichisye pano ulukundo lwinu lwapakula. 9Amuno mwamanya inkumbu-nkumbu zya Mfumu yitu e Yesu Klistu; wino napano walinji amuchindame, wayisaluzile muno amwemwe, alyakuti muno awusaluke wakwe mwemwenye muwotoke.
10Ukwelengania kwane pamulandu woo kuli woo: Chingazipa nkaninye ndi achino mungamalizya umulimo kanonzi, umulimo wuno mwatalisile umwaka wuno wasila. Amwemwenye nalwinu mwatalisile, kusi akuwomba kutupu, ukuwa mbali nukuluchila ukuwomba. 11Aleni swili, muwalukuya numulimo, musuke muwumale! Pimpani nkaninye musuke muwumale ndimuno mwawutalichizile, muwafima vino mulinavyo. 12Ndi achino mukulondesya ukufima, Leza alipochelela ivyawila vinu, alole vino muli navyo. Leza asipechela pavintu vino musi navyo.
13-14Nsinakulonda ukuti wanji wapepuchilwe ngamwemwenye amwewantu mung'wamilwe; ukuwa amuno mwenji pampindi yoo muli nivivule, kweni achizima ukuti muwakwavwilizya wane wakusowelwa. Alyakuti ndinamwe mwiza mwasowelwa pane wali navyo, wangawavwa. Wonye-woo akuli kulingana 15Ndivino Amawaliko Matele yavwanga yati,
Umuntu wino walonzile ivivule
wazanile vili paponye,
numuntu wino walonzile tutichi
atatela azane twachepa twalutilizya.
E Taitasi nawawuye
16Ye, vino tukusalifya Leza wino walesile Taitasi awalondesya ukuwavwa ndivino naswe tuli! 17Asi amuno wivwile chino twamunenile; ukuwa amuno walondesizye umwenechonye wenga nukulonda kwakwe ukuti ayize kwemwemwe. 18Ale weyo, twamutuma numwanawitu wino imilimo yakwe yamanyikwa nkaninye muma Klezia yonsi muno akawizya Ilandwe Zima. 19Swinya umwanawitunye wee, awino wasolwa swinya wimikwa na ma Klezia ukuti awapita naswe, pano tuli numulimo woo uwalukundo lwakuchindamika Imfumu, tuwalanjizya kuno tukuluchila ukwavwa.
20Muno tusinakulonda ukuvundumula intazi twapechela nkaninye imiwomvezye yavifimwa vyankumbu. 21Ukulondesya kwitu akwakuwomba vino viyine, pankolelo pa Mfumu patupu pole, ukuwa napaminso yawantu.
22Achaleka twatuma umwanawitu; apaliponga nawo, twamulolechesya nkani-nye impindi mvule, twazana kuno wakundisya ukwavwa nkaninye, Achaleka vino nawenye kanonzi wawasuwila, akulondesya nkaninye ukuwavwilizya. 23Nu Taitasi weni, wewunji wino tukawomba nawe kukuwavwa mwemwe; ukuwa ivyawanawitu wanji wane twawatuma nu Taitasi, antumi zya ma Klezia izya kuchindamika Klistu. 24Achaleka muwapochelele nulukundo, alyakuti ama Klezia yonsi yazumile mbali nukumanya kuno ukuyiwanzya kwitu kuno tukawawanzya akwakusimichila.
Currently Selected:
2 Wakorinte 8: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
