2 Wakorinte 10
10
Pauli achinjilila umulimo wakwe
1Nenenye, ne Pauli nkuyilambilizizya nalwane—nemuntu wakutanji nechimyamya swinya uwankumbu pano indi namwe, ukuwa ndanga nemusinamenye pano nafuntuka kwemwemwe. Achaleka nkuwalambilizizya muwuchimyamya ninkumbu zyakwe Klistu; 2nkuti, Mutize muwampatichizya ukuti ndawa nemusinge wonye-woo pano niza; ukuwa ngasinama nkaninye kwe wane wakutunena wakuti tukawomba ivyawuntu. 3Kweni achakusimichilanye twikala munsi; ukuwa tusilwila ivyawuntu wamunsi. 4Ivyanzo vino tukalwila visi avyanzo vyamunsi, ukuwa tukalwila ivyanzo vikalambane ivyakwe Leza, avino tukamongolela amalinga. Tukakonona imipanzi yawufi; 5tukanyunkula ivyavilumba vyonsi vino vikapunuzya ukumanya Leza; tukatonsya amelengania yonsi ukuti yatontele Klistu. 6Ndimwiza mwatutontela nukusimichila konsi, paponye apano tulisunda wonsi wane wasitontela.
7Mwenji ukulola kwinu mukalola ivintu kunzi kutupu. Wuzye pakwe mwemwe pali wumwi wino akuti awakwe Klistu? Ale, fwandi ndi atele ayelenganie vino ali, amuno swe wakwe Klistu ndivino weliwenye ali. 8Amuno nsinakufwa insoni, chingatenga nkuyiwanzya kutaluvile amaka yano Imfumu yatupa—amaka yakuwakatusya, alyakuti tutize tuwamongole mupone pansi. 9Nsinakulonda ukuti chiloleke ngati nkasi ukuwazakazya nawakalata wane. 10Wumwi wandi ati, Wakalata wakwe Pauli awawome nkaninye nukukalala, ukuwa ndi tuli nawe apaliponga, watonta, namazwi yakwe yasinachimwi! 11Umuntu wamwatanye wowo wazipila ukumanya kuno pasi uwusyano wumwi kwevino tukawalika pano tusipo, navino tuliyiza tuchite pano tuli namwe apaliponga.
12Nachawuzimanye, kweni tusi numwezo wakuyisanzya nanti akuyikolania nawamwi wane wakayitumvya nkani. Ye, watumpa wuli! Wakayitumvya wonga awayipima, awayipanzya nukulonda kwawo! 13Ukuwa swenji, ukuyiwanzya kwitu tutanga tuyiwanzye ukuchila muno twawela; nkandi ukupelela pamilimo yino Leza watupa ukuwomba, apaliponga nimilimo yitu yino tukawomba mwakwe mwemwe. 14Achaleka vino namwenye avino muli, tutalutilizizye pano twizile kwemwemwe, pano twawaletezile Ilandwe Zima ilyakwe Klistu. 15Achaleka tusinakuwanzya umulimo wuno wanji wachita ukulusye pane Leza watupimila. Ukuwa kweni tukusuwila kuno mwandi mukule mwisuwilo, alyakuti tuwe namaka yakuwombela umulimo wulusye mwakwe mwemwe, tulange tukuwomba nanti kulutilizya pano Leza watunenela. 16Apano tungawizya Ilandwe Zima munsi zinji zino zili ukutali namwe, ukuwa tutanga tuyiwanzizye kumilimo yino wanji wawomba kali.
17Ukuwa ndimuno Amawaliko Matele yatachila yati, Wensi wino akulonda ukuyiwanzya, wazipila awawanzya vino Imfumu yachita. 18Amuno umuntu awakusimichila ndi Imfumu yamulanguluka, ukuwa umwenecho wenga pole.
Currently Selected:
2 Wakorinte 10: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
