2 Wakorinte 7
7
1Mwewakundwe wane, amalayilizyonye yaa yonsi yali pakwe sweswe. Achaleka aleni fwandi tuyiswefwe kwevyonsi vino vikakombezya umuwili numuzimu, tuwe swewalungamane, tuwe nakatina kwakwe Leza.
Ichimwemwe chakwe Pauli
2Twinjizyani mumyezo yinu. Tusitela tuwifye kumuntu wumwi, tutalovya umuntu nanti wenga, nanti akuchenjezya wumwi. 3Nsinakuvwanjila choo ukuti mbape umulandu; ukuwa ndimuno mvwanjizile pakutalika, mwewakundwe witunye awakusimichila, tuli apaliponga amanda yonsi, muwumi witu nanti amumfwanye. 4Nawasuwila nkaninye, swinya indi nichilumba mwakwe mwemwe! Mumatamyo yitu yonsi nchili indi ninsimpo, indi nichimwemwe chisi chakutaka.
5Amuno napano twafisile mu Makedonia tutatela tupuze. Twazanile intazi konsinye, ukupokota nawantu wanji, mumyezo yitu mwalinji intete. 6Ukuwa e Leza wino akasimpisya wano imyezo yatonta, watusimpisizye nukwiza kwakwe Taitasi. 7Ukwiza kwakwe kutupu pole, ukuwa nkandi pakwivwa Ilandwe lyakwe kuno mwamusimpisizye. Watunenile kuno mwalondesyanga nkaninye ukuti mundole, atunena nukufwilimana, kwinu kuno muli nako, nakuno mukulonda ukuntula; achaleka nenji ichimwemwe chane chalutilizya kanonzi.
8Amuno ndinaponye kalata wino nawawalichizile wawachisile amalanda, ukuwa kweni insi namalanda muno nachisile wowonye. Ngali nalinji namalanda ndachino naweni kuno fwandi kalata wane walesile amuwa namalanda kukapindi kamwi. 9Ukuwa kanonzi indi nichimwemwe-lelo asi amuno nalesile amuwa namalanda, ukuwa amuno amalanda yano mwalinji nayo yalesile amutontolokwa. Uwulanda winu wachisilwe nukulonda kwakwe Leza, achaleka fwandi tutawachitizile ichiwipe chimwi. 10Amuno uwulanda wuno Leza akapa wukapilula imyezo ilungama kwikomolwa-achaleka muno achocho ntachisile ichiwipe chimwi! Ukuwa amalanda yamunsi yeni yakaleta imfwa. 11Simutele mulole uwulanda wuno Leza wachisile kwemwemwe: vino wawaletela akakope, swinya nukuluchila ukufuma kuwuwipe! Wawaletela ikwelengulo, uwusoche, namelengania mazima, namwenye mwazumizile ukuyipa nukusunda uwuwipe wonsi! Mwayilanjizya kuno musi nakasinza mumulandu wonsi.
12Achaleka, nanti nawawalichizile kalatanye weyo, asi amuno wumwi wachisile ichiwipe chimwi, pamwi amuno wumwi wachitizilwe ichiwipe nawumwi. Ukuwa nawawalichizile ukuti mbasambilizye pankolelo pakwe Leza mumanye ukutuluchila kuno mukatuluchila. 13Achino twasimpisizwe,
Kusi akusimpiswa kutupu; ye twazewezile wuli pano twaweni vino ichimwemwe chakwe Taitasi chalinji muno mwemwenye mwensi mwamusansamusizye. 14Nawawanzizye nkaninye pakwe weliwe, namwenye mutansonzizye insoni. Tusitela tuwawipizya. Muno achochonye, nu Taitasi-nye wapanichisya ukuwanzwa kwinu. 15Achaleka ulukundo luno wawakunda lukulandalila, amuno akwizuka ukutontela kwinu konsi, ye vino mwamupochelezile mbali nukutina nukuzakaza. 16Ye, nkuzewela wuli amuno nawasuwila!
Currently Selected:
2 Wakorinte 7: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
