2 Wakorinte 6
6
1Achaleka amuno tukawombela apaliponga nu Leza, tukuwalambilizya; vino Leza wawafwila inkumbu wonye-woo mutize mulechelezye umulimo wakwe. 2Sitelani mwivwe vino Leza wavwanga wati,
Nakwivwile pampindi nzima
pawandanye wowo nakwavwizye nkutula.
Siteyelezyani! Yoo ayili mpindi yino Leza angatufwila inkumbu ilelonye lyoo awuli wanda wakutulwa!
3Tusinakulonda wumwi azane uluwi lumwi mumulimo witu, achaleka tusinakulonda ukuwika ivyakupunuzya vimwi munzila. 4Ukuwa kweni, mwakwe vyonsi vino tukuchita tukayilanjizya kuno swewawomvi wakwe Leza, nukuzizimichizya kukulu, ukwantazi, namatamyo, mbali nukupupuzya. 5Tumwa, twanyepwa muvingololo, nukufyenenekwa; nukuzunkuntika kusi kwakutaka nukulola wucha pamwi atusowa nakakumyanta. 6Swe watele, tuli namano tukapupuzya swinya tuli ninkumbu; nu Muzimu Mwimichile, nulukundo lwitu ulwakusimichila, 7amazwi yitu ayakusimichila, amuno Leza akatwavwa. Uwulungamane wuno tuli nawo achili chanzo chitu, kukulwisizya nukuyichinjilila. 8Tukachindikwa swinya nukukwelengulwa; tukatukwa intusi swinya atuwanzwa. Wakatuchita ngati swewachawufi, napano tukavwanga ivyakusimichila; 9tuli ngati tutamanyikwa, ukuwa wonsinye watumanya; tuli ngati twafwa, ukuwa ndimuno mukutulolela, swe waa tukunyang'anya. Chingatenga wakatusunda, ukuwa watatukoma; 10chingatenga wakatuchita amalanda, tukawa nichimwemwe penye; tukaloleka swewasaluke, ukuwa tukawotosya awantu wavule, tukaloleka ngati twasowelwa ivintu vyonsi, ukuwa tuli navyonsi.
11Mwewakundwe wane awamwe Korinte! Tukavwanga kwemwemwe nanti
kuvwama, imyezo yitu ilikwasi. 12Tutafisa imyezo yitu kwemwemwe; ukuwa mwenji mwiyala imyezo yinu kwesweswe. 13Kanonzi nkuvwanga namwe ngati nkuvwanga kuwanane; sinamwe yilanjizyani kwesweswe ndivino swenji tukachita kwemwemwe. Yiyulani imyezo yinu!
U wusoche kuvyakuzumilizyania namakandi
14Kusikwezya ukuwombela nukuzumilizyania namakandi, amuno chisi achizima. Amuno wuzye uwuzima nuwuwipe vingawa apaliponga wuli? Nga ukuwala nimfinzi vingikala apaliponga wuli? 15Nga Klistu nu Satana wangazumilizyania wuli? Nga umusuwizi angalanjililana nikandi wuli? 16Nga mung'anda yakupepela Leza munginjila amakolania wuli? Amuno swenji sweng'anda yakwe Leza mumi! Ndimuno e Leza-nye umwenecho watachila wati,
Ndizenga ing'anda yane apaliponga nawantu wane
ndakwikala mwakwe woliwo:
ndiwa ne Leza wawo,
nawo wize wawe awantu wane.
17Achaleka Imfumu e Leza wavwanga wati,
Pawukani muwasye wonga,
muyipawule kwewoliwo.
Mutize muwalemelela ichintu chimwi chino chakandamana, apano ndiwapochelela.
18Ndiwa ne'so
namwe muliwa mwewanane awachonsi nawachanachi,
avino Imfumu e Leza wamaka yonsi wavwanga.
Currently Selected:
2 Wakorinte 6: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
