2 Wakorinte 4
4
Insawo yamuzimu munyungu zyivu
1E Leza, kunkumbu zyakwe, watupa umulimonye woo, achaleka pasi chimwi chino chingatutentemula. 2Twasumbilizya ivyankama vyonsi vino vingatusonzya insoni; Twaleka uwukachenjezya, nanti akuwipilizya amazwi yakwe Leza. Mukuwala kwakusimichila, amuno tukakwikalila paminso yakwe Leza atulanga tukuyilanjizya uwuzima witu kwewonsi wane wali namelengania mazima. 3Amuno ndi Amazwi Matele yano tukawizya yavwama, ye fwandi yafisama kwewalyanye wane wakasowa. 4Wakana ukusuwila muno amana yawo yafitikwa nunankolelo wakwe wane wakukana Leza munsi moo. Akawalesya ukulola ukuwala kuno kukawawalila, ukuwala kuno kukafuma Mumazwi Matele ayawukankala wakwe Klistu, wino vitasyania nu Leza mumilolechele. 5Amuno tusiyiwilila swewenecho; ukuwa tukawizya e Yesu Klistu wino amfumu naswe swenji swewazya winu muno we Yesu. 6E Leza wino watili, Mumfinzi amuno mulifuma ukuwala! awili weyonye wino watuwalila mumyezo yitu, wino wiza watupa ukuswepa kwakumanya uwukankala wakwe Leza, wuno wawalila pampumi yakwe Klistu.
7Ukuwa kweni chingatenga tuli ninsawo yamuzimu, tuli ngati swenyungu zyavye izyivu, ukulanjizya kuno amaka makulu nkani ayakwe Leza; yasi amaka yitu. 8Tukatitichizwa penye, lelo nanti kuvongonyolwa; mpindi zimwi atulanga tukuvwilika, lelo nanti kusumba umwezo; 9tuli nawalwani wavule, lelo naponye tuli niviwuza; chingatenga mpindi zimwi wakatuchisa nkaninye, lelo tusisililichila. 10Penye tukasenda imfwa yakwe Yesu mumiwili yitu yino ikalowa, alyakuti nawo uwumi wakwe wuloleke mumiwili yitu. 11Amuno penye muwumi witu wonsi tukapita muwulwani wafwa muno we Yesu, alyakuti uwumi wakwe wuloleke mumiwili yitu yino ikafwa. 12Akuli kuti imfwa ikawomba mwakwe sweswe; ukuwa uwumi wukawomba mwakwe mwemwe.
13Amawaliko Matele yavwanga
yati, Navwanzile amuno nasuwizile. Awuliwonganye naswenye, tukavwanjila muno twasuwilila. 14Twamanya kuno e Leza, wino wazyulupuzile Imfumu e Yesu, naswenye alituzyulupula apaliponga nu Yesu atulete apaliponga namwe, atutwale kwakwe weliwe. 15Chili awonye-woo amuno amwemwe; swinya pano Leza kunkumbu zyakwe aliyita awantu wanji imyanda namyanda nawo walilanga wakupepa amapepo mavule ayakusalifya ukuchindamikwa kwakwe Leza.
Isuwilo lyenecho
16Muno achonye-choo tusitela tutontechele. Chingatenga imiwele yamiwili yitu ikawola katichi-katichi, ukuwa naponye imiwele yamizimu yitu ikawa ami pya uwanda nuwanda. 17Achaleka intazi zyoo intichi izyampindi ntichi zino tukuyimba zilituletela ukuchindamikwa kusi kwakutaka ukwamuyayaya, kuno kulikula kulusye ukuyimba. 18Amuno swenji tusilwilichila, kuvintu vino vikaloleka, nkandi vino visiloleka. Vino vikaloleka avyampindi ntichi; ukuwa vino visiloleka vyeni vikalandila.
Currently Selected:
2 Wakorinte 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
