2 Wakorinte 3
3
Awawomvi wilayano-pya
1Wuzye choo chikuloleka ngati twatalika ukuyitumvya swinya swewenecho? Wuzye tukuchita ndivino awantu wanji, tuwalonda wakalata wakutuwanzya awakuleta kwemwemwe pamwi awakufumu kwemwemwe? 2Mwemwenye amwewantu mwe kalata witu, wino wawalikwa mumyezo yitu, alyakuti wila muntu amanye awazye nukuwazya. 3Chamanyikwa kuno we Klistu awino wawalisile kalatanye wee atutuma sweswenye. Atawalikwa nuwizyo pamapampa yamawe, ukuwa wawalikwa pamyezo yawantu, nu Muzimu wakwe Leza mumi.
4Chino tukuvwanjila wonye-woo amuno tuli nisuwilo lyonsi mwakwe Leza muno we Klistu. 5Mwakwe sweswe musi ichintu nanti chonga chino tungayiwanzizya tuti twachenjela ukuwomba umulimonye woo. Ukuwa amaka yano tukawombela yakafuma kwe Leza; 6weliwenye nalwakwe awino akaleka tukuwombela ilayano-pya, lino lisi mumasundo yano yawalikwa, nkandi mu Muzimu. Isundo walikwe likaleta imfwa, ukuwa Umuzimu weni wukapa uwumi.
7Amasundo yafolowozilwe amawaliko pamapampa yamawe, ayala amasundonye yaa yapwa uwukankala wakwe Leza awuloleka. Chingatenga ukulangalila kwampumi yakwe Musa kwasizile, kwazimanjikanga katichi katichi, lelo naponye muno akulangalila awa Israeli wapotwanga ukumupanga naminso. Umulimo wamasundonye yayo walinji awakuleta imfwa. Ukuwa ndi amasundo yachindamisilwe nkani pakwiza 8ye, fwandi wakula walusya wuli uwukankala wuno wukakwizila kukuwomba umulimo wa Muzimu! 9Ndifwandi umulimo wuno awantu wakatalila umulandu wachindamisilwe; ye, vino walusya uwukankala wamulimo wuno awantu watulilwa! 10Fwandi tungati, amuno ukuchindamikwa kwakanonzi kwazikimila kwalusya, achaleka uwukankala wuno walinji-po kali wazimanjika. 11Amuno ndi amasundo yampindi ntichi yizile nuwakankala, fwandi ye uwukankala wakwe vino visisila wungawa wuli?
12Muno tuli nisuwilonye lyoo, swe wasingenye. 13Tusi ndivino Musa, wino wavwimbine ichiwalo kumpumi yakwe, alyakuti awa Israeli watize walole pane ukuzikimila kukuzimanjika. 14Nachawuzimanye, amana yiyazilwe; nakanonzinye kaa amano yawo yavwimbwa nichiwalo chilyanye, ponsi pano wakuwazya wakalata wilayano kali. Ichiwalonye chocho chikavwimbulwa ndi umuntu wayisanzya kwe Klistu. 15Nilelonye lyoo, ndiwawazya amasundo yakwe Musa, ichiwalo chikulanga chivwimvile amana yawo. 16Ukuwa chikavwimbulwa, ndivino Amawaliko Matele yavwanga yati, lchiwalo chakwe Musa chavwimbuzilwe pano wapiluluchizile ku Mfumu. 17Mumazwinye yaa, Imfumu a Muzimu; swinya konsi kuno kuli Umuzimu wa Mfumu, akutela kuli uwanangwa. 18Fwandi swensi apaliponga, tuwawalilwa uwukankala wa Mfumu nanti kuvwimbana impumi zitu; nga uwukankalanye wowo, wuno wukafuma ku Mfumu wino we Muzimu, wukatupilula atukolana nawe, nukulandalila mukuchindamikwa.
Currently Selected:
2 Wakorinte 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
