2 Wakorinte 11
11
E Pauli nawapostile wawufi
1Nkuwalambilizya ukuti muntechelele, chingatenga kweni natumpa katichi. Nazina ntechelelani! 2Indi nuwuzuwa kwemwemwe ndivino nu Leza-nye ali nuwuzuwa kwemwemwe; Muli ngati wemwali wino wayisunga wino nakowechezile ukuti ayize atwalwe kumonsi wenganye-nsu, e Klistu. 3Indi nintete muno nche imyezo yinu ingachenjezwa muleke ukukunda Klistu nimyezo yinu yonsi—ndivino Eva watumpisilwe numuchenjelo wawufi uwanzoka. 4Amuno mwenji mukateyelezya wensi wino wiza kwemwemwe kukuwawizizya e Yesu winji, wino wasyania nawino sweswe twawawizizya; swinya mukapochelela umuzimu nilandwe lino vyasyania nkaninye nu Muzimu ni Landwe Zima lino mwapochelezi le kwesweswe!
5Nsinakwelengania kuno nemutichi nkani pakwe wawo wane mukutanji awapostile wane mwasuwila! 6Nche pamwi mumivwanjile yane nchili ne mutichi, ukuwa mumano mweni pole; penye tukawanena vyonsinye vyoo ichete ponsi pane tukuwalondololela.
7Ntatela mbalandula chimwi pano nawawizizizye Ilandwe Zima ilyakwe Leza; nayichefizye nemwenecho ukuti mwemwe mukule, Wuzye fwandi nawifizye? 8Pano nawombanga mwakwe mwemwe ama Klezia yanji ayano yandambulanga. Nawapokanga indalama zyawo, alyakuti ndavwanga, ukuti mbavwe mwemwe. 9Impindi yonsi yino nalinji namwe ntatela mbatamye ukuti mumpe indalama; ukuwa awanawitu wane wafumile ku Makedonia awano wandetezile vyonsi vino nalondanga. Wowonye vino chalinji pakutalika, napansizinye awowonye: ntalitela mbavune! 10Muno akusimichila kwakwe Klistu kuno kuli mwakwe nene, nkulapa kuno ntalitela nchite chimwi munsi yawa Griki monsi chino chingandesya ukuyiwanzya ndivino woo! 11Nga navwanzile chonye-choo muno achani? Wuzye amuno ntawakunda? E Leza weni wamanya kuno nawakunda!
12Nandi ndange nkachita chino nkuchita kanonzi, alyakuti ndesye utupostile twinu kukuyiwanzya kuno tukayiwanzya ukuti tukachita imilimo iyiliyonga nayino nkachita. 13Awantunye waa awapostile wavye—awa wufi, wakayipilunkania mumiwombele yawo ukuti waloleka ngati awapostile-postile wakwe Klistu. 14Kweni, chisi achakuzunkuka! Amuno nu Satana-nye angapiluka aloleke ngati amungeli wakuwala! 15Achaleka chisi achintu chikulu ndi awawomvi wakwe wakayipilula ukuti waloleka ngati awa womvi wakusimichila. Pakupelelechezya walipochelela ndimuno imilimo yawo yawela.
Ukuyimba kwakwe Pauli muno awupostile
16Nkunyochelela ukuti: wumwi atize awanjelengania awati nemutumpe. Ukuwa nanti ndi mungelengania wowonye, naponye mumpochelele nuwutumpe wane, alyakuti nani njilumvye katichi. 17Awenche chino nkuvwanga kanonzi chisi achino Imfumu ikasi mvwange; mumwata wonye-woo uwakuyilumvya amuno nkuvwanga ngati nemutumpe. 18Ukuwa vino awavule wakuyilumvizya kuvyamuwili, naninye nandi ndachita wowonye. 19Mwenji mwewamano, achaleka mukupochelela iviwelewele nichimwemwe! 20Mukapechela nawino akuwalyatanjilanye, nawino akuwachenjezya, nanti awino akuwateya ivipingo pamwi wino akawasula kuno musi mwewantu, nawino akuwapama nulupi paminso. 21lndi ninsoni pakuvwanga wonye-woo: amuno swenji twaposilwe ukuchita wowonye!
Ukuwa ndi kuli wumwi wino akuyitumvya kwechimwi—nkuvwanga ngati nemutumpe—naninye nemusinge. 22Wuzye awa Hebere? Naninye fwandi ne mu Hebere. Wuzye awa Israeli? Wuzye awizikulu wakwe Abrahamu? Ye naninye ne weliwe. Ye naninye neweliwe. 23Wuzye awawomvi wakwe Klistu? Nkuvwanga ngati nechipena—ukuwa nemuwomvi muzima ukulusye woliwo! Nawombesya nkaninye, namo muvingololo nanyepwa mwenemo impindi mvule, numwa nalutilizya kutaluvile, ndalo nda nukufwa. 24Mumpindi zisano awa Yuda wanjumanga nivikoti amakumi yatatu nivikoti mufundikambali; 25impindi zinji zitatu awa Roma wa mvwapulanga, swinya impindi yonga wampozile nama we; swinya impindi zitatu uwato wuno nawanga mwenemo wawundwanga, napa impindi yimwi nazuwime muminzi uwanda wonsi umusanya nuwusiku. 26Penye mumisinzo yane nawanga muwulwani wakusendwa nimikuku namuwulwani wakwe wakapoka, nakuwulwani wa wa Yuda wanji nga namakandi; nazananga uwulwani mutwaya, mumavunje, mwakwe wasumbi, nuwulwani kwewano wasi aviwuza vyakusimichila. 27Nawombesyanga mbali nukuyimba; mpindi mvule nanti kuponechela; swinya nalumwanga ninzala nulusala; nalyanga akakulya katichinye, nsowa ichakuvwimbana nanti achakuzwala. 28Nukulusye vyonsi, penye nkatitichizwa nukupangamafa ama Klezia yonsi. 29Ndi pali wumwi wino watontechela, naninye ndanga nemutontechele; ndi wumwi wakolelelwa kuluwembu, nani nkuwanga nichilanda.
30Ndichanzipila ukuti njilumvye, fwandi ngayilumvya kuvyawutontechele wane. 31E Leza Umukwasi wa Mfumu e Yesu—izina lyakwe liwachindamikwa umuyayaya!—awino wamanya kuno nsinakuwipa uwufi. 32Pano nalinji mu Damasika, umulasi wamfumu Areta wawisile wakasunga wampongolo zyakaya ukuti wandeme. 33Ukuwa awansolosezya pansi muchise, pipongololo lyakuluwumba, impusumuka.
Currently Selected:
2 Wakorinte 11: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
