1 Timothy 4
4
1Ukuwa Muzimu wavwanga ichilola wati, Mumpindi yino ikwiza, awantu wamwi walilechelezya isuwilo; walipechela imizimu yawufi wakonchelele imisambilizizye yakwe wamuzimu.
2Imisambilizizyenye yoo ikafuma kwewakachenjezya wachawufi wakulu, wane intwitwi zyamelengania yawo azyavye, ngati wochwa nichela chilungule. 3Awantu wanye-waa wakasambilizya ukuti, Chisi achizima ukutwalana swinya awalesya ukulya ivyakulya vimwi. Ukuwa we Leza awino welewuzile ivyakulyanye vyovyo ukuti awasuwizi wane wamanya ukusimichila wawalya, ndi watela wapepa ipepo lyakusalifya. 4Ichintu chonsi chino Leza welewula achizima; pasi chimwi chino chingakanwa, ukuwa vyonsinye vyazipila ukupochelwa nipepo lyakusalifya; 5amuno Izwi lyakwe Leza nipepo avino vikaswefya ichakulya.
Umuwomvi muzima uwakwe Klistu Yesu
6Ndi wati uwasambilizya awanawitu ivintunye vyoo wandi uwe wemuwomvi muzima uwakwe Klistu Yesu, muno ukalelwa namazwi yisuwilo nayamisambilizizye mizima yino ukakonka. 7Ukuwa uwakana imilumbe yino imintamanya Leza ikavwanga, yino itazipa nanti akuvwanga. Yiwelezye ukupita mumyata yawu-Leza. 8Nukuwelezya umuwili nakonye akuzima, ukuwa ukuwelezya ukuchindika Leza kweni kwalusya mwevyonsi, amuno kweni kukaleta uwumi wakanonzi nawuno wuliyizanye, 9Amazwinye yaa ayakusimichila swinya yazipila ukupochelelwa mbali nukuyasuwila. 10Muno achochonye achino tukawombesya nukuyipatichizya konsi, amuno ukulolela kwitu kuli mwakwe Leza mumi, e Katula wawantu wonsi, nkani-nkani kwakwe wane wakasuwila.
11Komelezyanga ivintunye vyoo mbali nukuvisambilizya. 12Atize wumwi awakusula muno wemutichi, ukuwa uwe wechilolelo chawasuwizi, ponsi pano ukuvwanga, mumyikalile, mulukundo, mwisuwilo namuwuzima. 13Wombesyanga impindi zyonsi nsuke njize-njize, tulange ukuwazizya awantu Amazwi Matele, ulang e ukuwawizizya nukuwasambilizya. 14Utize ulechelezye ichawila chakwe Leza chino chili mwakwe wewe, chino wapilwe pano awatumwa wavwanzile nawasongo awawika amakasa yawo pakwe wewe. 15Lemasyanga ukuchita ivintunye vyoo nanti kulechelezya alyakuti ukukula kwako kuloleke kwewonsi. 16Uwayilolela wemwenecho, swinya uwalola nimisambilizizye yako. Uwalandalila ukuwomba vyonye-vyoo, amuno ndi ukuchita wowonye apano ungayitula uyize utule nawanji wano wakukwivwa.
Currently Selected:
1 Timothy 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
