1 Timothy 3
3
Wanankolelo wamwi Klezia
1Amazwi yaa ayakusimichila yano yati, Ndi umuntu akulonda ukuwa wenankolelo wa mwi Klezia atela akulonda umulimo wuzima nkani. 2Ukuwa kweni enankolelo wamwi Klezia wazipila awa amuntu muzima; uwamwanachi wenga, wino asikolwa, swinya akayisunga, asipungana; ekapochelela waweni mung'anda yakwe; umukampuke pakusambilizya; 3wino asikolwa swinya asi nulombwa, umutechele swinya echimyamya; wino atakundisya indalama; 4wino akapanzya ichiwanza chakwe ichete, wino awanakwe wakamutontela mbali nukumuchindika. 5Amuno ndi umuntu akapotwa ukupanzya ichiwanza chakwe, nga angasayila Iklezia lyakwe Leza wuli? 6Umuntu wino akulonda umulimonye woo, atazipila awe awino wachinjila awowo mwi Klezia; amuno angayitutuwalika nichilumba aponele mwisenteko, ndivino Umuwipe walinji. 7Wazipila awe amuntu wino akachindikwa nawantu wakulonde wane wasi mwi Klezia, alyakuti atize awakwelengulwa nga alemwe muchipingo cha Muwipe.
Wakayamwite wa mwi Klezia
8Nawakayamwitenye nawo wazipila ukuwa awantu wazima swinya awasuwilwa; watize wawang'wa ipala nkani nanti akuyikunda; 9wazipila ukulemasya ukusimichila kwisuwilo nintwitwi zyamelengania mazima. 10Wanyewaa watela awelezwa pakutalika, ngandi wachita ichete, apano wangawomba umulimo wawukayamwite. 11Awuliwonga nawachinye wazipila wawe awamyata mizima, wane wasinichinenia; nanti kukolwa, awasuwilwa mwakwe vyonsi. 12Kayamwite wi Klezia wazipila ukutwala umwanachi wenga, wino wamanya ukupanzya awanawakwe nichiwanza chakwe chonsi ichete. 13Amuno wane wakawomba umulimo wawukayamwite ichete, wakalumbililwa swinya wakavwanga ivyisuwilo lyawo lino lili mwakwe Klistu Yesu nukusinga.
Inkama nkulu
14Pano nkuwawalichila kalatanye wee, nkulolela ukwiza kusyungula nanti kuzimba. 15Ukuwa ndinachelwa ukwiza, ekalatanye wee awino wandi ayize akulanjizye vino twazipila ukuchita mwiwumba lyakwe Leza, lino alili Klezia lyakwe Leza mumi, ulupanda lwakulemya ukusimichila. 16Pasi nanti wenga wino angakana uwukulu wa nkama yamipepele yitu.
Wino walolesile numwata wamuwili,
alanjizwa nu muzimu kuno walinji awakusimichila, aloleka kuwangeli.
Awizwa kumyiko namyiko, asuwilwa nawamunsi, apochelelwa mwiyulu.
Awasambilizya wawufi
Currently Selected:
1 Timothy 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
