1 Timothy 2
2
Imlpepele yawantu wakwe Leza
1Ichakutalichila, nkukukomelezya, ukuti amapepo, namalambilizyo, nukusalifya viwe kwe Leza muno awantu wonsi; 2nukusalifizya izyamfumu nawakapanzya, alyakuti tuwakwikala chimyamya numutende, nuwupefi nukutechela. 3Umwatanye woo awuno Leza wakunda, 4wino akalonda awantu wonsi wize watulwe wamanye ukusimichila. 5Amuno kuli Leza wenganyensu, swinya kuli wenga wino akasunkania Leza nawantu apaliponga, umuntumuntu e Klistu Yesu, 6wino wayipile kukwiza komola awantu wonsi. Choo chalinji achakupanichisya, pampindi yino yayine, ukuti Leza akalonda ukutula awantu wonsi, 7chochonye achino natumizilwe ukuti njize imbe nemusolwe nda-sambilizya amakandi, mbali nukuwizya Ilandwe zima ilyisuwilo nukusimichila. Nsinakuwipa uwufi, nkusimichila!
8Nkulonda ukuti awonsi insi yonsi wapepa, awonsi wane wimichilwa kwe Leza wane wangatumpula amakasa yawn wapepa wane wasi nichinze nimipanzi wasi nayo. 9Swinya nkulonda ukuti awanachi wawe nilango zima ilyakuzwala ichete; swinya nanti kupumpumalika inyele, nanti aviyembo vyakwe golide nanti awukasi nimyinjilo yawuzi wukulu, 10ukuwa wazipila wawe nimiwele mizima, avili vizwalo vizima ivyawanachi awapefi. 11Awanachi wazipila ukusambilila chimyamya nukutechela. 12Insinakuzumilizya ukuti awanachi wangasambilizya nanti akulasa pawonsi; wazipila ukwikala chimyamya. 13Amuno Adamu awino watalichizilwe ukwelewulwa, pakwe Eva. 14Swinya asi we Adamu wino wachenjezizwe, ukuwa umwanachi awino wachenjezizwe ayonona isundo lyakwe Leza. 15Ukuwa umwanachi alitulilwa kukukwata awana, ndiwalandalila nisuwilo mbali nulukundo nuwulungamane, nukutechela.
Currently Selected:
1 Timothy 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
