1 Timothy 1
1
1E kalata wee wafuma kwe Pauli, umupostile wakwe Klistu Yesu muno alisundo lyakwe Leza e Katula witu nu Klistu e Yesu wino tukalolela.
2Kwe Timoti, umwanane wakusimichila wino nasimpika isuwilo mwakwe weliwe.
Sivyo e Leza e Tata nu Klistu e Yesu Imfumu yitu awa ninkumbu nawe, awakulolela uluse, nukukupa umutende.
Ukusochelwa kuvyamisambilizizye yawufi
3Nkulonda ukuti uwakwikala mwe Efeso, uchitile ndimulyanye muno nakukomelezezizye pane nayanga ku Makedonia. Amuno kweneko kuli awantu wamwi wane wakusambilizya imisambilizizye yawufi, ukawakalipile waleke. 4Ukawanene waleke utumilumbelumbe nukutantamika amazina makali ayakwe wayisikulu, amuno ivyamwatanye woo vikuleta imipanzi yavye; visifungula chimwi kuvyawu Leza, vino avyisuwilo. 5Isundo lyonye-lyoo akukatusya ulukundo luno lukafumilila mumwezo wuswepe, uwamelengania mazima, nisuwilo lyenecho, 6Awantu wamwi wapantuka walechelezya ivintunye vyoo wasowa wakonka amazwi yavye. 7Muno nawo wakulonda ukuti wawe awasambilizya wamasundo yakwe Leza, ukuwa watamanya amazwi yano wakavwanga nanti kumanya chino yakusula namuno yayizile.
8Twamanya kuno amasundo yazipa, ndachino yakonkwa ndimuno yatachila. 9Nachawuzimanye, chazipa ukwizuka, kuno amasundo yatachitilwa wano wakayakonka, ukuwa nkandi wano wasitontela, ndivino wasimisoka, imintamanya Leza, wakatinsyania wano watamanya ivyawu-Leza nanti avyamuzimu, wano wakakoma wayisi nawanyina, wawa awachikoma, 10wakazenkenta, na wanyengwa mbipe, wano wakakwiwa awana wakwe wanji, wachawufi wano wakapa uwukalola wawufi awalanga wakuchita chino imisambilizizye mizima isilonda. 11Imisambilizizye yoyo yalingana namazwi matele yano napilwe ukuti mbumbule, mbumbule Ilandwe zima lino lyafuma kwakwe Leza uwawukankala umupepwe.
Ukusalifya Leza kunkumbu zyakwe
12Nkusalifya Klistu Yesu Imfumu yitu, wino wampa amaka yaku wombela. Nkumusalifya muno wandola kuno nazipila, nga wansola ukuti ndamuwombela, 13chingatenga kali namuvwanjilanga ivintu viwipe vitupu, namuyimvyanga swinya nukumukwelengula. Ukuwa Leza weni walinji ninkumba nani, amuno nalinji nemuntasuwila swinya ntamanyile nachino nachitanga. 14Imfumu wamfwila inkumbu mvule wampa isuwilo nulukundo vino avili vitu mwakwe Klistu Yesu. 15Amazwinye yaa amasuwilwa, swinya yazipila ukuyalemasya: ayakuti, Klistu Yesu wizile munsi kukwizatula awawembu. Nenenye nemuwembu mulutilizye wanji wonsi, 16ukuwa muno achonye-choo achaleka Leza wamfwizile inkumbu, alyakuti e Klistu Yesu alanjizye ukupupuzya kwakwe konsi pakunchita ndimuno akulondela, numuwembu umulutilizye awawembu wonsi, alyakuti imbe nechilolelo kwakwe wane waliwamusuwila pansizi alyakuti wize wapochelele uwumi wamuyayaya. 17Kanonzi ku Mfumu yamuyayaya, yino isifwa, nukuloleka asiloleka, e Leza wenganyensu-weliwenye awino awachindikwa nuwukankala wakwe uwape! Amen.
18lye, wemwanane Timoti, nakulemeka isundonye lyoo ukuti ulilemasye. Lyalingana namazwi yano yatumilwe kali-kali kuvyako. Leka amazwinye yayo yawe avyanzo vyako ivyakulwila isumo zima, 19uwawa nisuwilo namelengania mazima. Awantu wamwi wasi nintwitwi nzima izyamelengania, wonona isuwilo lyawo. 20Wamwi awakwe wawonye we Himenesi nu Alekizander, wane nawalemeka mumaka yakwe Satana, alyakuti wasambilizwe waleke ukuvwanjila Leza uluwi.
Currently Selected:
1 Timothy 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
