1 Thessalonians 5
5
Muwayisengania uwanda wakwiza kwa Mfumu
1Ukuwa kuvyampindi namalanzi, wanawitu, pane ivintunye vyoo vilipona, tutanga tuwawalichile chimwi. 2Amuno mwayimanyila kuno Uwanda wa Mfumu wuliyiza ngati aching'o chino chikakwiza uwusiku. 3Pano awantu wakuti, Amutende vyonsi vilichete, apali pano ukulowa kwakwiwuchizya kukuwaponela! Nanti kupusuka—iwaponela ngati andwala yampapo kumwanachi wino ali mulupanda. 4Ukuwa, mwenji wanawitu, musi mumfinzi, ukuti uwandanye wowo wize wuwiwuchizye ndivino umung'o. 5Mwenji mwensi mwewana wamusanya, wane wakapita umuswepe. Swenji tusi swewana wamuwusiku nanti amumfinzi. 6Achaleka, fwandi aleni tutize tuwaponechela, ndivino wanji; ukuwa tuwalindilila nukutechela. 7Uwusiku awuno awantu wakaponechela; uwusiku awuno awantu wakakolwa. 8Ukuwa swenji swe wamusanya, twazipila ukutechela. Twazipila tuwachinga pachifuwa isuwilo nulukundo ngati ankwela nakumutwe tuwazwala ichisote chakulolela itulwa. 9Leza atatusontolezile kuwukali wakwe, ukuwa akukupochelela itulwa muno a Mfumu yitu e Yesu Klistu, 10wino watufwizile alyakuti twize tukawange apaliponga nawe, nanti wiza watuzana twafwanye nanti swewumi uwandanye wowo. 11Muno achonye-choo, aleni simpisyanianji, muwakwavwana nukwavwana, ndivino mukachita.
Ukukomelezya kwakupelelechezya numulamu
12Tukuwalambilizya, wanawitu, muwachindika wane wakuwomba mwakwe mwemwe, wane Imfumu yalasika ukuwatungulula nukuwasambilizya. 13Muwawachindichisya nulukundo, amuno amilimo yino wakuchita. Yikalanji numutende mwensi.
14Swinya tukuwachinchizya, wanawitu, sundanji awakata, simpisyanji awamyezo mitonte, muwakwavwilizya awatombozyoke, muwatechelela wonsi. 15Muwalola wumwi atize awanyosezya umuwuye iviwipe, ukuwa konkanji ivizima amanda yonsi kumuwuye numuwuye muwalemasya ukuchitilana ivizima, nukuchitila awantu wonsi wowonye,
16Zevyanji amanda yonsi, 17pepanji impindi zyonsi, 18salifyanji mwakwe vyonsi. Konye-koo akuli kulonda kwakwe Leza kwemwemwe pano mukukonka Klistu Yesu.
19Mutachilingania Muzimu Mwimichile; 20mutize muwalechelezya amazwi yakwe Muzimu. 21Yelezyani ivintu vyonsi: lemasyanji ivizima, 22lewukanji iviwipe vyonsi.
23Sivyo e Leza wino akupanga umutende awaswefya mwakwe vyonsi, asunge uwuntu winu wonsi, nimizimu, nimyezo, nimiwili, vichinjililwe kuwuwipe wonsi asuke Imfumu yitu e Yesu Klistu ayize-yize, 24Wino akuwi—taalichita, amuno amusuwilwa.
25Naswenye, tupepelanji wanawitu.
26Lamukani awanawitu wonsi muwakukulana nukukukulana.
27Nkuwasundila mwi zina lya Mfumu, ukuti muwazizye awanawitu wonsi ekalatanye wee.
28Inkumbu-nkumbu zya Mfumu yitu e Yesu Klistu ziwawa namwe. Imfumu yitu e Yesu Klistu awawafwila nkumbu mwensi.
Currently Selected:
1 Thessalonians 5: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
