1 Thessalonians 3
3
1Pakupelelechezya, twasovile ichakuchita. Achaleka atwelengania ukuti tusyale mwe Ateni 2atutuma umwanawitu, e Timoti wino akuwombanga naswe umulimo wakwe Leza uwakuwizya Ilandwe Zima ilyakwe Klistu. Twamutumile ukuti ayize awasimpisye nukuwomya isuwilo linu, 3alyakuti wumwi atize anyochelele kunsizi muno akuyimba kwamwatanye woo. Namwenye nalwinu mwayimanyila kuno nukuyimbanye nako kukatuponela muno akulonda kwakwe Leza. 4Amuno pano twachilinji tuli swensi, twawanenile lyankani kuno tulila tule tuyimbe; ndivino namwenye muyimanyizile-nto, nawuzye avino chalinji. 5Muno achonye-choo achino natumizile Timoti. Naposilwe ukuzizimichizya, achaleka namutumizile kwemwemwe ukuti ayize alole muno isuwilo linu liwezile. Natinanga inti, nche pamwi Satana wawelezizye, nga umulimo witu wonsi awuwa awavye!
6Ukuwa kanonzi pano Timoti wiza kwesweswe wafuma kwemwemwe, watuletela Ilandwe zima ilyisuwilo linu nulukundo lwinu. Watunena nakuno mukutwizuka amanda yonsi, swinya mukuluchila ukutulola ndivino naswenye tukuluchilanga ukuwalola. 7Achaleka, muno achonye-choo, wanawitu, mukuyimba kwitu konsi amwemwenye mukatusimpisya. Alisuwilo linu alino lyatusimpisya, 8amuno kanonzi swewumi ndi mwasimpisya mu Mfumu. 9Kanonzi tukuwasalifizya kwe Leza. Tukuwasalifya kuchimwemwe chino tuli nacho pakwe Leza witu muno amwemwe. 10Tukalambilizya kwe Leza nimyezo yitu yonsi ukuti twize tuwalole ichilingampumi ukuti twize tuwape vino vikusowelwa mwisuwilo linu.
11Sivyo e Leza witu e Tata nalwakwe, nga ni Mfumu yitu e Yesu, atuyanizya inzila yakwizila kwemweme! 12Sivyo Imfumu ileka amuwakundana nukukunda awantu wonsi amuwa nulukundo lukulu ndivino sweswe twawakunda. 13Ndimwawa awonye-woo apano aliwapa imyezo miwome, muwe mwewalungamane swinya awatele pakwe Leza witu e Tata pano Imfumu yitu e Yesu wiza-wiza nawantu wakwe wonsi.
Currently Selected:
1 Thessalonians 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
