1 Thessalonians 2
2
Imilimo yakwe Pauli mu Tesalonika
1Wanawitu, mwayimanyila nalwinu, kuno ukwiza kwitu kwakwe mwemwe kutalinji akwavye. 2Mwamanya vino watuchisile uwuwi mbali nukutukwelengula nintusi mu Filipi pano twachilinji ukwiza wasyungula mwe Tesalonika. Ukuwa naponye Leza watusimpisizye ukuti twize tuwalandile Ilandwe lyakwe izima, chingatenga kwalinji ukuzutana. 3Ukuwalambilizya kwitu kusi akwavye pamwi ukwamyata miwipe, nanti nche akulonda ukuwachenjezya. 4Ukuwa, penye tukavwanga ndimuno Leza akalondela, amuno watuzumilizya swinya watulemeka Ilandwe zima. Tusinakulonda ukusechelesya awantu, nkandi e Leza, wino akalola imiwele yitu. 5Mwamanya kuno pano twizile kwemwemwe tutatela twize namazwi yakuwakopeka, nanti akuvwanga amazwi yaa ukuti tuzanile chimwi mwenemo—e Leza awili kalola witu! 6Tutalondanga ukuwanzwa nawantu wamwi nanti amwemwenye, 7chingatenga twazipizile ukuwanzwa amuno swe wapostile wakwe Klistu. Ukuwa naponye twakolopine pano twalinji namwe, twakolopine ndivino nyina wawana akalela awanakwe. 8Ukuwa amuno alukundo luno twawakunzile nkani twayipamvizye ukuti tutize tuwankanie Ilandwe zima tupu ilyakwe Leza ukuwa nkandi nimiwele yitunye. Mwalinji mwewakundikwe nkaninye! 9Wanawitu, nkusuwila mukwizuka, imilimo yitu nukuyimba! Twawombanga uwusiku wonsi numusanya alyakuti tutize tuwavuna wumwi uwakwe mwemwe pane twawawizizyanga Ilandwe zima ilyakwe Leza.
10Mwemwenye mwewakalola witu, nga nu Leza-nye; imiwele yitu yino twalinji nayo kwakwe mwemwe mwewasuwizi yalinji amilungamane, imizima, yino isi nuluwi lumwi. 11Mwamanya vino twawapyunjilanga mwensi ndivino yisi wamuntu akapyunjila awanakwe. 12Twawasimpisyanga, twawasansamusyanga, swinya twawakomelezyanga ukuti muwakwikala mumwata wuno Leza akalonda, wino akuwitila mwemwe mu Wufumu wakuchindamikwa kwakwe.
13Swinya, muno achonye-choo, tukawasalifizya Leza penye. Twalanga pano twawaletela amazwi yakwe Leza, amuyivwa amuyapochelela nukuyapochelela, amuti yatalinji amazwi yamuntu wumwi ukuwa ayakwe Leza. Molimonye! Amuno Leza akuwombela mwakwe mwemwe mwewantu mukusuwila. 14Mwemwenye, wanawitu, mwaponezilwe nivintu ivilivyonga ndivino vyaponezile ama Klezia yakwe Leza yano yali mwe Yudeya vyaponezile na wantu wamwenemo wane wakasuwila Klistu Yesu. Mwayimvile nivintu ivilivyonga vino awakaya wawuyo wawayimvyanga ndivino awa mwe Yudeya nawo wayimvwanga na wa Yuda wawuye, 15wano wakomile Imfumu e Yesu nawatumwa, awatuyimvya naswe. Ye-mwe, vino Leza wawapata! Ye, wakalalizile awantu wuli! 16Swinya watulesyanga ukuwizizya amakandi Ilandwe zima lino lingawatula. Koo akuli kwizulichizya kwaluwembu lwawo luno wakachita-pe. Achaleka kanonzi uwukali wakwe Leza wuli pakwe woliwo!
Pauli awalondesya ukuya wasyungula swinya
17Ukuwa swenji wanawitu, twalile pano twapawunkanwa namwe akapindi katichi—mumelengania yitu pole, nkandi kumiwili kutupu—chatutalizile kutaluvile muno twalondesyanga ukuwalola swinya! 18Twalondanga ukuti twize kwemwemwe swinya. Nenji, ne Pauli nalondesyanga ukwiza kwemwemwe impindi mvule, ukuwa Satana atatela atulechelezye. 19Ukuwa kweni, muno amwemwenye! mwemwenye nalwinu!—mwaleka tukulolela, tuli nichimwemwe, swinya muno amwemwenye tungayitumvizya ukuchimvya kwitu pankolelo pa Mfumu yitu e Yesu pano wiza-wiza. 20Nkusimichilanye tuli nukuyitumvya mbali nichimwemwe amuno amwemwe!
Currently Selected:
1 Thessalonians 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
