1 Peter 2
2
Iwe lyawumi numwiko wimichile
1Achaleka lekani uwuwipe wonsi, mwewantu mwensi; mutize muwawipa uwufi, nanti akuchenjezya, nanti awuzuwa, nanti akutukana intusi. 2Muwe ngati mwetunya tuna twachikwatwa, muwawa nulusala lwakulondesya iziwa lyamuzimu, alyakuti ndi mwang'wa mukule ngamutulwe. 3Ndivino amawaliko matele yavwanga yati, Mwatoma inkumbu zya-Mfumu.
4Zanji ku Mfumu, weliwe lyawumi lino lyakankamuzilwe nawantu ngati alyavye, napano lyasozilwe nu Leza kuno aliwe lyawuzi wukulu. 5Zanji muwe ndivino amawe yawumi, muwe mwemawe yakuzenjela ing'anda yamuzimu iyakupepela Leza, mwize muwapyunga mwenemo muwe mwewasimapepo wimichile ukuti muwafima mbali nukochela Leza inzuwi mwakwe Yesu Klistu, inzuwi zyamizimu yinu zino alizipochelela. 6Amuno amawaliko matele yavwanga yati,
Nasola iwe lyawuzi wukulu,
lino kanonzi nawika aliwe Iyifunku mwe Zioni;
nawensi wino akasuwila mwakwe weliwe atalitela asonzwe insoni.
7Iwenye lyoo alyawuzi wukulu kwakwe mwemwe mwewantu mukusuwila; ukuwa kwewano wasinakusuwila:
Iwe lino wakazenga walikana
alino lyalolesile aliwe lyamulimo wukulu nkani.
8Namazwi matele yanji yavwanga yati, Iwenye lyoo alino liliwa alyakupunuzya awantu,
liliwa wemfunzi wakupinzya awantu ukuti wapone.
Wapunulanga muno watasuwizile amazwi, chochonye achino Leza wapanzizye kali.
9Ukuwa mwenji mwemwiko wusolwa, mwewasimapepo wa Mfumu, umwiko wimichile, mwewantu wakwe Leza-nye nalwakwe, amwemwenye mwewantu mwasolwa ukuwizya imilimo mikalambane iyakwe Leza, wino wawisile ukufuma mumfinzi ukwinjila mukuwala kwakuzungusya. 10Kali mutalinji mwewantu wakwe Leza, ukuwa kanonzi mwewakwe; kali mutamanyile inkumbu zyakwe Leza, ukuwa kanonzi wawafwila inkumbu.
Muwe mwewazya wakwe Leza
11Nkuwalambilizya, wayaya, mwewantu muli ngati mweweni swinya ngati mwewantu wane wasamala ukuti mupusuke munsi moo! Mutize muwachimba kuvyakulondesya kwamuwili, kuno kukalwisya imyezo penye. 12Lekani imiwele yinu muno mwikala nimintasuwilwa, iwe amizima alyakuti ndi wawavwanjila uluwi wati mwewakawifya awalola imilimo yinu imizima yino mukuchita, wize watumvya Leza pawanda wakwiza kwakwe.
13Mwenji muno a Mfumu, tontelanji wakapanzya wamunsi wonsi: muwatontela nimfumu nkulu, yino ili namaka yakupanzizya, 14muwatontela nawalasi, wane imfumu nkulu ikuwatuma kukwiza sunda wakachila wamasundo nukwiza wanzya wane wakachita ichete. 15Amuno ukulonda kwakwe Leza kuli awoo: akulonda ukuti mumyalalike ukuvwanga kuwipe ukwawantu watumpe muwalanjizye imilimo mizima. 16Muwakwikala ndivino awanangwa; ukuwa mutize muleke uwanangwa winu, wuwe awakuvwimbila uwuwipe wumwi, ukuwa muwakwikala ngati awazya wakwe Leza. 17Muwachindika awantu wonsi, muwakunda awasuwizi wawuyo, tinanji Leza, swinya muwachindika imfumu nkulu.
Ichilolelo chakuyimba kwakwe Klistu
18Mwewawomvi tontelanji wasokulu muwawachindika, awazima nawachimyamya watupu pole, ukuwa nawakalalenye. 19Kwechochonye akuno Leza aliwalambulila, ndi mwazizimichizya kuwulumila wuno wutalingana muno akulonda ukuchita ukulonda kwakwe. 20Ngafwandi ye ukuwanzwa kwinu kuli pachani ndi mwazizimichizya mumilwa kwechino monona? Ukuwa nkandi ndi mwazizimichizya mumilwa kwakwe vino mukachita ichete, peni e Leza awino aliwapepa. 21Leza wawitila chonye-choo; amuno e Klistu-nye nawakwe wawayimbizile wawasila ichilolelo, alyakuti muwakonka mumatampulo yakwe. 22Atatela awembuke kamwi; swinya mumulomo wakwe mutatela mufume uwufi wumwi. 23Walile watukwa intusi ukuwa weni atatela atukane; walile wayimba ukuwa nanti kupanjila wane wamuyimvyanga, ukuwa asuwila ekapanzya wakusimichila. 24E Klistu-nye nalwakwe awino wasenzile uluwembu lwitu mumuwili wakwe alutwala kuwuchinganike, alyakuti naswe tufwile paponye tutetelwe ukuwifya kwitu, nga tuwachita uwulungamane wakwe Leza. Mwapozwa muno akuchisika kwakwe. 25Mwalinji ngati mweng'onzi nsowe; ukuwa kanonzi mwapetulilwa kumuchemi e kasunga wamyezo yinu.
Currently Selected:
1 Peter 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
