1 John 5
5
Vino twachimvya ivyamunsi
1Wensi wino akusuwila kuno Yesu we Mesaya ye amwanakwe Leza; nawensi wino wakunda yisi atela wakunda numawanakwenye. 2Kwakwe chonye-choo akuno tukamanyila kuno twakunda awanakwe Leza; nditwakunda Leza nukutontela amasundo yakwe. 3Amuno ulukundo luno twakunda Leza akuli kutontela amasundo yakwe. Swinya amasundo yakwe yatatutalila, 4amuno umwanakwe Leza wensinye angachimvya ivyamunsi. Koo akulikuchimvya kuno tukachimvya ivyamunsi: tukachimvya nisuwilo litu. 5Ngaweni angachimvya ivyamunsi? Nkandi wino akasuwila kuno Yesu a Mwanakwe Leza.
Uwukalola kuvyakwe Yesu Klistu
6E Yesu Klistu awino wizile; wizile naminzi yakubatizwa kwakwe nu wazi wamfwa yakwe. Atizile naminzi matupu, ukuwa navyonsi aminzi nuwazi. Umuzimunye nalwakwe awuno wakapanichisya kuno chonye-choo achakusimichila, amuno Umuzimu akusimichila. 7Kuli uwukalola wutatu, 8Umuzimu, aminzi, nga nuwazi; uwukalolanye woo wutatu vikazumilizyania. 9Tukasuwila uwukalola wawantu; uwukalola wakwe Leza weni wakula walusya. Fwandi wonye-woo awuli wukalola wuno Leza wapile Umwanakwe. 10Achaleka wensi wino akusuwila Umwanakwe Leza ali nuwukalola mumwezo wakwe; ukuwa wensi wino asinakusuwila Leza, Leza wamuchita uwuchawufi, amuno atasuwila uwukalola wuno Leza wapanichisya ku vya Mwanakwe. 11Wonyewoo awuli wukalola: Leza watupa uwumi wamuyayaya, uwuminye woo wuli mu Mwanakwe. 12Wensi wino ali nu Mwana atela ali nuwuminye woo; nawensi wino asi nu Mwanakwe Leza atela asi nuwumi.
Uwumi wamuyayaya
13Nawawalichila ivintu vyonye-vyoo alyakuti mumanye kuno muli nuwumi wamuyayaya—mwemwenye mwewantu mukasuwila mwizina lya Mwanakwe Leza. 14Koo akuli kusinama kuno tuli nako pankolelo pakwe Leza amuno twapanichisya kuno akatwivwa ndi tukumulenga chonsi chino angazumila. 15Akatwivwa kwechonsi chino tukumulenga; vino twapanichisya wonye-woo, twamanya kuno akutupanga chonsi chino twamulenga.
16Ndiwumwi akulola umunyina akuchita uluwembu luno lusi alwamfwa, wazipila alambilizya Leza, wino angamupa uwumi. Choo achakwe wano uluwembu luno wachita lutalingana nimfwa. Ukuwa kuli uluwembu luno lwazipila imfwa, lweni nsinakuti mwazipila ukulambilizya kwakwe Leza kuvyakwe lolilo. 17Imilimo miwipe yonsi aluwembu, ukuwa kweni kuli uluwembu luno lusi alwamfwa.
18Twamanyichisya kuno umwanakwe Leza asilandalila nukuwembuka, amuno Umwanakwe Leza akamuchinjilila, nu Muwipe atanga amuchite ichiwipe chimwi.
19Twamanya kuno swewakwe Leza chingatenga awamunsi wonsi wanyepwa nu Muwipe.
20Swinya twamanya kuno Umwanakwe Leza wiza watupa ukwiluka, alyakuti tumanye wino we Leza wakusimichila. Uwumi witu wuli mwakwe Leza wakusimichila—mu Mwanakwe e Yesu Klistu. Wenye-wee we Leza wakusimichila, nawoo awumi wamuyayaya.
21Wanane, yichinjililanji kwe twaleza twawufi!
Currently Selected:
1 John 5: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
