1 Wakorinte 15
15
Ukuzyulupuka kwakwe Klistu
1Aleni wanawitu, kanonzi nkasi mbizusye, ivyilandwe zima ilyakwe Leza lino nawawizizizye lino mwapochelezile, mwakwe lino isuwilo linu lyasimpa mwenemo. 2Yoyonye ayili mbila, yamazwi yano nawawizizizye. Ndachino mwalilemasya chakala chatindi yemwatulwa—suka ndimwapochelezile ichavye.
3Amuno chino napochelezile achino nawapile, chochonye achili chikulu: kuno Klistu wafwizile uluwembu lwitu, ndivino Amawalika Matele yataka; 4nakuno wazisilwe, nakuno wazyulupuzilwe'pawanda wachititatu, ndivino Amawaliko Matela yataka; 5nakuno walolesile kwe Peter, nga nakuwapostile ikumi nawawili. 6Ngapano aloleka lyonganye kuwasuwizi wane walusizye pamyanda yisano (500), wano awavule awakwe woliwo wachili walipo nilelo, chingatenga wamwi wafwa. 7Ngapano ayiza aloleka kwe Jemusi, ngapansizi aloleka ku wapostile wonsi.
8Pakupelelechezya aloleka kwenene-chingatenga indi ndivino wino wakwatilwa munzila zyamiwele yinji. 9Amuno newakupclelechezya pawapostile wonsi—swinya naponye ntazipila nanti akwitwa ilyawupostile amuno nayimvizye Iklezia lyakwe Leza. 10Ukuwa muno Leza wamfwila inkumbu indi ndivino indi, swinya pakumfwila inkumbu atachisile ichavye. Ukuwa kweni, nawombesya nkani ukulusye awapostile wonsi, chingatenga yatalinji amaka yane, ukuwa ankumbunkumbu zyakwe Leza azino zyalesile ndawomba. 11Achaleka fwandi, ndi landwe zima lyafuma kwenene pamwi kwewoliwo, chonye-choo achino tukawizya, swinya achino mwasuwila.
Ukuzyulupuka kwitu
12Ale, ndi uk uwila kwitu a kwak uti Klistu wazyulupuzilwe k uwafwe, ngamuno chani chino wamwi awakwe mwemwe wakuvwanga wakuti kusi uk uzyulupuka kuwafwe? 13Ndi awantunye waa wakasimichila, fwandi nu Klistunye atazyulupuzilwe; 14achino fwandi ndi Klistu atazyulupuzilwe kuwafwe, ye nukuwila kwitunye akwavye nisuwilo linunye ye alyavye. 15Swinya ukulusye napaponye, ye fwandi twalolwa ngati swewakalola wawufi wakwe Leza, amuno yetwawipizya Leza twati wazyulupuzile Klistu kuwafwe—napano fwandi atamuzyulupuzile, ndi achakusimichila kuno awafwe wasizyulupulwa. 16Amuno fwandi ndi awafwe wasizyulupulwa, fwandi ye nu Klistu-nye atazyulupuzilwe, 17Ndi Klistu atazyuluzilwe ye isuwilo linu alyavye, ye isuwilo linu lyachenjezwa muchili mwasowa muluwembu lwinu. 18Fwandi ye akuli kuti nawasuwizinye awakwe Klistu wane wafwa wasowa. 19Ndi amuwuminye woo ampela amuno twasuwililila Klistu, ye swewalanda ukulusye awantu wonsi munsi nuwukulu.
20Ukuwa nachawuzimanye Klistu wazyulupuzilwe kuwafwe, kokonye akuli kupanichisya kwakuti wano walala mumfwa nawonye walizyulupulwa. 21Amuno pane imfwa yalile iyizila mumuntu, mumwata uwuliwonganye ukuzyulupuka kwawafwe kwizila mumuntu. 22Amuno ndivino mwakwe Adamu wonsi wakafwa, avino namwakwe Klistu-nye wonsi walizulupulwa wawe nuwumi. 23Ukuwa wila muntu mumpindi yakwe: e Klistu, pakutalika; ngapano wano awakwe Klistu, pampindi yakwiza kwakwe. 24Ngapano insilo iyize; Klistu alichimvya izyamfumu zyamizimu zyonsi, nawakapanzya, namaka yawo, alemeke Uwufumu kwe Leza Umukwasi. 25Amuno Klistu alilanga akupanzya asuke Leza ayize achimvye awalwani wonsi awalyatanjile namanama yakwe. 26Umulwani wakupelelechezya ukuchimvwa, amfwa. 27Amuno Amawaliko Matele yavwanga yati, Leza walalika ivintu vyonsi pansi pakwe Klistu. Nachawuzimanye choo achakusimichila, ichamazwi yakuti, ivintu vyonsi yasinakusanzya nu Leza-nye umwenecho, wino akalalika vyonsi pansi pakwe Klislu. 28Ukuwa ndi ivintu vyonsi viza vyapanzwa nu Klistu, ngapano weliwenye Umwana nalwakwe, aliyiwika pansi pakwe Leza, wino walalisile ivintu vyonsi pansi pakwe weliwe; ngapano Leza ayize awapanzya ivintu vyonsi.
29Nga awantu wawo wano wabatizizwa muno awantu wanji wano wafwa chili wuli? Wuzye wakalonda ukuchita chani? Ukuwa ndifwandi chino wakataka achakusimichila, kuno awafwe wasizyulupulwa kumfwa, ngafwandi amuno chani chino wakabatizizwa muno awafwe? 30Ngasweswe—chili wuli chino tungalanga tukayitimpika muntazi impindi zyonsi? 31Wanawitu, nkalindilila imfwa amanda yonsi! Ichilumba chino indi nacho mwakwe mwemwe muwumi witu wuno wuli mwakwe Klistu Yesu Imfumu yitu achino chikuleka nkuvwanga choo. 32ukuwa ndachakuti nasuwilanga ivyamunsi vitupu pano nalwisyanga ivinyamana moo mu Efeso, nga changa chimfungulile chani? Ukuwa ndi awafwe wasizyulupulwa kuwafwe, fwandi aleni Tuwalukulya nukung'wa, amuno mutondo tulifwa, ndimuno akamulumbe katachila. 33Mutize muwawipwa. Ukuyisanzya mumawumba yawantu wawipe yakakonona imiwele mizima. 34Yelenganiani ichete muleke ukupita munzila zinu izyaluwembu. Choo achansoni nkaninye: kuno wamwi awakwe mwemwe watamanya Leza.
Ukuzyulupuka kwamuwili
35Ukuwa wumwi angawuzya ati, Nga awafwe wakazyulupulwa wuli? Nga wakakwiza namwata wamuwilichi? 36Welisilu-we! Pano wewenye ukakomela imbeyu mumusili isitunzya ukuwa itela ifwa. 37Nachino ukakomela mumusili ambeyu ntupu, iyamalezi pamwi inkumba, pamwi imbeyu yinji, usikomela chino chakula kali. 38Ukuwa Leza akapa imbeyu umuwili ndimuno akulondela; akupanga imbeyu yonsi umuwili ndimuno yawela.
39Inyama yavyawumi vyonsi isi ayiliyonga: umuwili wawantu wayiwela, nuwanyama wayiwela, nuwanyunyi awunji, nuwanzswi awunji.
40Swinya kuli imiwili yamwiyulu nga nimiwili yamunsi: kuli ukuyemba kwamiwili yavyamwiyulu, nukuyemba kunji ukwamiwili yavyamunsi. 41Ilanzi lili nukuyemba kwakwe, nawo umwezi nukuyemba kunji, nazyo intanda nukuyemba kunji; swinya kuli ukuyemba kulekane-lekane ukwantanda.
42Avino chiliwa pano awafwe wiza wazyulupulwa kumfwa. Ndi umuwili wazikwa wukawola; ndiwazyulupulwa, awuwa awuntawola. 43Ndiwazikwa, wukawa achavye, awuwa awutonte; ndiwazyulupulwa awuyemba swinya awuwa namaka. 44Ndiwazikwa, wukuwanga amuwili wawuntu; ukuwa ndiwazyulupulwa, awuwa amuwili wawuzimu. Nachawuzimanye, kuli umuwili wawuntu, achino fwandi kulile kuwe numuwili wawuzimu. 45Amuno Amawaliko Matele yavwanga yati, E Adamu umuntu wakutalika, welewuzilwe awa amulawa; ukuwa Adamu wakupelelechezya wawile a Muzimu wakupa uwumi. 46Wusi awuzimu awuno wukatalichila, ukuwa amuwili, ngapano uwuzimu. 47E Adamu wakutalichila welewuzilwe ukufuma kwitukumbu lyamunsi: ukuwa Adamu wachitiwili weni wafumile mwiyulu. 48Awamunsi wonsi wakolana nawino welewuzilwe kumusili; nawo awamwiyulu wakolana numuntu wino wafumile mwiyulu. 49Ndivino twakolana numuntu wino welewuzilwe kumusili, wowonye avino tulikolana numuntu wino wafumile mwiyulu.
50Chino nkutaka achoo, wanawitu nkuti: Chino chelewulwa numuwili nuwazi chitanga chipyane Uwufumu wakwe, nanti akulowanye kutanga kupyane ukuntalowa.
51Teyelezyani mbanene Ichankama: tutalifwa swensi, ukuwa mumpindi ntichinye swensinye tulipilulwa, 52ndivino ukukumpansya kwilinso, pano inkangang'ombe yakupelelechezya yiza yalila. Amuno pano yiza yalila, awafwe walizyulupulilwa kukuntafwa, naswe swensi twize tupilulwe. 53Amuno chino chikawola chizwe chipiluke chiwe achintawola; nacho chino chikafwa chize chipiluke chiwe achintafwa. 54Achaleka pano chino chikawola chiza chawa achintawola, napano chino chikafwa chiza chawa achintafwa, apano Amawaliko Matele yalifiswa: yano yati, lmfwa yononwa yalowa-pyu.
55Wemfwa-we, nga ukuchimvya kwako kuli-kwi?
Wemfwa-we, nga amaka yawulumila wako yali-kwi?
56Imfwa ikaluma muno aluwembu, nalo uluwembu luli namaka muno alisundo. 57Ukuwa ukusalifya kuwe kwe Leza wino akutupanga amaka yakuchimvizya mu Mfumu yitu e Yesu Klistu!
58Achaleka fwandi, mwe wanawitu, simpisyani nanti kusyembuka. Mulandalile nukuwombesya mumulimo wa Mfumu amuno mwamanya kuno ukuzunkuntika kwinu mu Mfumu kusi akwavye.
Currently Selected:
1 Wakorinte 15: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
