Luku 6:27-49

Mae Jisas ne cheke eghu, “Nu te chekeni iara ka ghotilo te fanomho ka iara gre na. Ghotilo namhadi nomi naoka re. Eghuteuna famane fofodu ka iheire te susuku ghami re. Eghuteuna ghotilo fablahidi iheire te cheke fadiꞌa ghami are, nei taraidi naikno te lalama ghami are eghu. Mae ihei te taponi bakomu iagho na, thosei lhotini nu snakre lao keha phile na ka mana mala ke tathapo mana eghu. Eghuteuna mae ihei te hata nou pohe na, iagho ke snakre lao keha nou phoko na ka mana mala ke hata mana. Mae ihei te tore glepo ka iagho na, iagho toghoni mana. Eghuteuna mae ihei te hata kaisei nou glepo iagho na, thosei ke toreni iagho mala ke hata fapulo mana ka iagho. Unha ghotilo te magnahagheni keha naiknore te eni ranghi ghami na, ghotilo ke enila tuana ranghidi eghu. “Te namhadi kolho ghotilo naikno te namha ghami themi re, God ginauna na theome fablahi ghami ghotilo. Naugna naikno te diꞌare mare namha dila naikno te namhadi mare re! Eghuteuna, God ginauna na theome fablahi ghami ghotilo te toghodi kolho ghotilo naikno te togho ghami themire. Naugna naikno te diꞌare eni la tuana. God ginauna na theome fablahi ghami ghotilo, te tufa glepo kolho ghotilo ka naikno na teke tusu fapulo glepo ka ghotilo. Naugna naikno te diꞌare mare tufa glepo la ka keha naikno te diꞌare. “Nu ghotilo namhadi nomi naokare, nei lolokeli ranghidi. Ghotilo tufa glepo ka keha naikno are, eghuteuna thosei ghathoni nake tughu fapulo mare teuna. Te eghu ghotilo na, God ginauna na taba fabiꞌo ghami ghotilo, naugna puhimi ghotilo re ginauna gaglana fara te goro thugna God ghotilo na. Naugna God na toghodi fabrahu iheire te theome ghatho tahuni mana, nei iheire te diꞌa fara. Ghotilo lolokeli nei kokhonidi eghu naikno te gnafare jateula mae Kmami ghotilo te au kligna te lolokeli nei kokhonidi teu naikno te gnafare.” Mae Jisas ne cheke eghu, “Thosei fateni ihei, na eghunu ke fate ghami God eghu. Thosei fathoroni ihei na, na eghunu ke fathoro ghami God eghu. Eghuteuna ghotilo hata fadelei nakhibodi keha naiknore mala nu ke hata fadelei langau God nakhibomire eghu. Tufa nodi keha naikno are, mala ke tufa nomi God ginauna eghu. Uve, God ginauna tufa glepo ka ghotilo, jateula kaisei mae te famane fafofodu kaisei khara'o ia eghu, kate fodu khara'o na mana na kaokagno nei huta fapari eghu mala fodu salaꞌui. Eghume nafnata puhi te tufa glepo ghotilo ka keha naiknore igne, God ginauna na jaola tufa fapulo glepo ka ghotilo.” Aonu mae Jisas ne chekeni cheke naba igne ka hatimare. “Ba, mae te dofu na tangomana ngau site batui keha mae te dofu la na ia? Theo fara. Te eghu mana na, phiamare ginauna tei snoꞌo ka khora. Jaola, mae ihei te sikolu teuna, mana theome tangomana te uluni nogna mae velepuhi na. Nu kate sikolu te lalase mana na ame tangomana nga mana te jateula nogna mae velepuhi na teuna. “Naugna unha sagho te au gaoghathomu ka nakhibo ikoi te eni mae kheramu fofodu na, eghuteuna theome filo glani nakhibo biꞌo au teu ka themu ana ia? Iagho theome tangomana te cheke eghu ka mae kheramu fofodu na, ‘Ghema, lisa mei sagho ka iara, mala hata fadelei iara nakhibo ikoi te au ka iagho ana.’ Nu iagho theome kulu hata koko ghu nakhibo biꞌo te au teu ka themu ana teuna. Iagho kaisei mae chaichaghi! Kulu hata koko ghu sagho nakhibo biꞌo te au ka themu ana, ame tangomana nga iagho te magnahaghei te hata fadelei nakhibo ikoi te eni mae kheramu fofodu ana eghu!” Mae Jisas ne cheke eghu, “Gaju te keli na theome tangomana te ure sisi te diꞌa na. Jaola gaju te diꞌa na theome tangomana te ure sisi te keli na. Tutuani, gaju te gnafare tahati kafe filo glanidi kau sisidire. Tahati theome tangomana te filodi sisi khoilo ghe sisi khebu te ure phono na. Jateula igne eghu, naikno te keli na, mana fodu ka gaoghatho te keli ka nagnafagna na. Mana edi koba glepo te kelire. Nu naikno te diꞌa na fodu ka gaoghatho te diꞌa ka nagnafa gna na, mana edi koba glepo te diꞌare. Naugna glepo te diꞌare te fodu ka nagnafagna mana tuare ngala te jifla mei ka chekegna mana re.” “Naugna unha ne cheke eghu nga ghotilo ka iara, ‘Lord, Lord,’ nu ghotilo theome edi kolho unha te chekedi iara re? Mae ihei te mei ka iara na, eghuteuna nomhidi chekegu iara re, nei leghuidi teuna, iara na falase arini ka ghotilo unha nafnata naikno mae tuana. Mae tuana jateula ngau kaisei mae te hohoro suga ia eghu. Mana dokha tei pari fara ne babana nogna suga na ke kligna thina. Aonu kate soru nakhete na, eghuteuna mei neu nabritha mala fariuriu paꞌe soruni suga tuana teuna. Nu nabritha na ginauna na theome tangomana te paꞌe soruni suga tuana, naugna suga tuana ne babana fakeli ke kligna thina. Nu mae ihei te nomhidi chekegu iara re, nu theome leghudi teuna, mana jateula ngau kaisei mae te theome dokha te tei pari fara te babana nogna suga na ia eghu. Aonu kate soru nakhete na eghuteuna mei neu nabritha na ka suga tuana, suga tuana na ghosei grofo. Eghuteuna suga tuana ginauna phaꞌe dofini kolho.”