Romaĉantyidyes 9
9
Israeltyiꞌ vóshiꞌ in tsimꞌtactyiꞌ Jenꞌyaꞌ in
1Yụ raꞌ jéyac ọij rụijsis p̂eyacdyeꞌ, jam ọij väñädyeꞌ jéyac raꞌ yụ, ĉaĉaij na Cristoty yụ, chimeꞌdye ĉojtyiꞌĉan yụ, mọꞌ bächäbun yụ Jenꞌsiꞌ Ạꞌedyeꞌ muꞌ, muꞌĉan chịj yụ jam väñädyeꞌ ọij p̂eyacdyeꞌ yụ. 2Anic där táracsi chätidyeꞌ yụ muꞌin Israeltyiꞌ vóshiꞌ in, anic fer dyijtucsi yụ, ĉaĉaij na jam méquiꞌ anicyi in. 3Anic yoqui yụ faraj vuꞌ caꞌ yụ́cheꞌ tŝọiꞌ mọꞌ vaꞌtacdyedyes muꞌin, mọꞌ soꞌmacsis raꞌ Jenꞌ, chimeꞌdye vuꞌ caꞌ pạrejtac Cristoyaꞌ yụ muꞌindyes in. 4Muꞌin Israeltyiꞌ vóshiꞌ in, muꞌin ạvatucsi muꞌ Jenꞌ judyeyaꞌ jịꞌcaveyacsi mạijquedyeꞌtumsiꞌ ferdyeꞌ muꞌ. Chimeꞌdye muꞌ daiꞌ quiꞌ yụꞌtyeyacsi p̂eyacdyeꞌ muꞌ, judyeyaꞌ yụꞌtacdyeꞌ muꞌ chimeꞌ soꞌmacsi, judyeyaꞌ soꞌmacsi mọꞌ rụijsis timaꞌcacdyeꞌ acaꞌĉandyesiꞌ muꞌ, judyeyaꞌ jéyacsi chimeꞌ junꞌ chuc raꞌ soꞌmac in, meꞌ meꞌ yụꞌtyeyacsi tsanꞌ muꞌin Israeltyiꞌ vóshiꞌ in. 5Muꞌin nash vóshiꞌ jiquej muꞌin tashchety tsimꞌtactyiꞌ Jenꞌtyiꞌ jiquej muꞌ. Muꞌinĉan naꞌi muꞌ Cristo, ĉaĉaij na muꞌ Israeltyiꞌ vóshiꞌ chimeꞌ muꞌ, muꞌ nash anictyity Jenꞌ muꞌ ayoꞌbuꞌyity räjdyes, mijam raꞌ jụꞌñisĉan mạyedyeꞌ mọtsiꞌ timaꞌcacdyeꞌ muꞌ. ¡Paj meꞌ!
6Meꞌ tsanꞌ muꞌin Israeltyiꞌ vóshiꞌ in jam anicyi in, jam qui namꞌ fibidyes shupquiꞌ mọꞌ Jenꞌsiꞌ p̂eyacdyeꞌ muꞌ, mọꞌ yụꞌtyeyeyacsis jiquej. Jeshaꞌ, muꞌin Israeltyiꞌ vóshiꞌ in jam muꞌin räj tsimꞌtac Jenꞌyaꞌ in. 7Meꞌ tsanꞌ Abrahamtyiꞌ vóshiꞌ in, jam qui namꞌ räj anictyity vóshiꞌ muꞌ, mọꞌdye muꞌ p̂eyeꞌ Jenꞌ, jajiti jiquej muꞌ Abraham: "Yụ nash yụꞌte uts Isaac, muꞌĉandye raꞌ shupqui mítyiꞌ vóshiꞌ in, muꞌin raꞌ anictyity vóshiꞌ mi", jajiti.#9:7 Génesis 21:12 8Ọij sánacdyeꞌ jiꞌchäquiyisinꞌ jam ca raꞌ räj Abrahamtyiꞌ vóshiꞌ in anictyity Jenꞌtyiꞌ ạvaꞌ muꞌ shupqui in. Muꞌin na jịꞌcätseptety in Jenꞌsiꞌ p̂eyacdyeꞌ muꞌ, mọꞌ jayuꞌtyiyitis muꞌ Abraham jiquej, muꞌin mọmoꞌ anictyity Abrahamtyiꞌ vóshiꞌ shupqui in. 9P̂eyacdyeꞌ jayuꞌtyiyitis muꞌ Abraham jiquej, yiꞌ: "Ayij raꞌ tupudyeꞌ, cuvij raꞌ caꞌñibun yụ ĉọ́shadyeye, aty raꞌ muꞌyaꞌ ạvamꞌ Saraty", yi jajitacdyi.#9:9 Génesis 18:10
10Isaac ca tịj ạvaꞌ naꞌity mọꞌ, muꞌ nash vóshiꞌvun jiquej tsun. Muꞌ qui vämi Rebecacheꞌ, epoj ạvaꞌyi mọꞌ. 11-13Jambiꞌ naꞌi in, jambiꞌdyemꞌ yiris jedyeꞌ jämꞌtaqui in, jambiꞌdyemꞌ ac̣hiꞌ bäꞌyi in, mijambiꞌ rụij bäꞌyi chimeꞌ in, Jenꞌ jäꞌmij tashcheꞌ jéyacsebi tseꞌ muꞌin: "Muꞌ raꞌ tashchety ạvaꞌ mi, muꞌ raꞌ úñi jäquitydyes", jajitiꞌ.#9:11-13 Génesis 25:23 Chimeꞌdye yocsiꞌ sánacdyeꞌ yiꞌ: "Jacob nash mạꞌjete yụ, muꞌ na Esaú jam mạꞌjete yụ", yi muꞌ Jenꞌ. Ọij jiꞌchäquiyisinꞌ junꞌ chuc muꞌ Jenꞌ ĉụiꞌsiꞌyaꞌ dyijyedyeꞌ muꞌ tashcheꞌ tsimꞌtacsi muntyiꞌ in, jam dyijtucsi junꞌ chuc bäꞌyi in, muꞌ ĉụiꞌ mọmoꞌ tsimꞌtacsi.
14¿Tupuj buty yéjaꞌ tsun: "Jam nash rụijsis dyijyedyeꞌ Jenꞌsiꞌ muꞌ?" Jam junꞌ tupuj yéjaꞌ. 15Yi Jenꞌ jajiti Moisés: "Jụꞌñity ĉụiꞌ ramꞌ tsimꞌtacsi yụ, muꞌin ñịbeꞌ ĉọcsity yụ, judyeyaꞌ ñịbeꞌjeyacsi yụ." 16Mọꞌdyes ọij jiꞌchäquiyisinꞌ muꞌ Jenꞌ ĉụiꞌsiꞌyaꞌ dyijyedyemꞌ muꞌ tsimꞌtacsi muntyiꞌ in, tyi chuc tsimꞌtacsiꞌ muꞌin mọmoꞌ ñịbeꞌ ĉọcsi. Meꞌ tsanꞌ fer muꞌ mạꞌjeꞌ muntyiꞌ, meꞌ tsanꞌ jam, jam mọꞌ jedyeꞌ yiꞌ, ĉụiꞌsiꞌyaꞌ dyijyedyeꞌ Jenꞌsiꞌ muꞌ ñịbeꞌ ĉọcsi. 17Mọꞌdye p̂eyeꞌ sánacdyeꞌ muꞌ, Jenꞌ jajiti muꞌ Egiptoĉantyiꞌ ayoꞌ: "Yụ yụꞌtyeye jiquej paj qui ayoꞌbuꞌyi mi paj qui míyaꞌ jịꞌcaveyacsi ferdyeꞌ yụ muntyisyaꞌ vej muꞌin, junꞌ chuc raꞌ soꞌmeye vaꞌtacdyeꞌ, mọꞌyaꞌ qui raꞌ räj úchety muntyiꞌ in chäyin yụ in tyi chuc yụ", jajiti Jenꞌ. 18Mọꞌdyes ọij jiꞌchäquiyisinꞌ, tyi chuc tsimꞌtacsi muꞌ Jenꞌ ĉụiꞌsiꞌyaꞌ dyijyedyeꞌ muꞌ, muꞌdye mọmoꞌ ñịbeꞌ ĉọcsi, meꞌdye muꞌ chimeꞌ tyi chuc tsimꞌtacsi ĉụiꞌsiꞌyaꞌ dyijyedyeꞌ muꞌ, chimuꞌdye meꞌjeyacsi jiꞌyäjcacsebi ĉojtyiꞌ muꞌin.
Jenꞌ pạrej vaꞌtacdyeꞌ soꞌmacsi, pạrej na ñịbeꞌ ĉọcsi
19Pạrej muꞌyaꞌ cäj p̂eyaqui in yi in: "Jenꞌdye meꞌ jiꞌyäjquibusinꞌ ĉojtyiꞌ tsun, jätäjjisinꞌdyemꞌ raꞌ tsun meꞌ juchayejaꞌ jụijyaꞌ tsun, ĉaĉaij na muntyiꞌ tsun jam junꞌ tupuj ñutsjeĉunꞌbija dyijyedyeꞌ Jenꞌsiꞌ muꞌ", pạrej cäj yi in. 20Jam raꞌ meꞌ yéjaꞌ, ĉaĉaij na muntyiꞌ tsun jam tupuj jiꞌpenꞌtiĉaꞌ Jenꞌyaꞌ. Jeñej yiris puñuj jämꞌtacdyeꞌ muntyis in, mọꞌ jam junꞌ jiꞌpenꞌtiꞌ jụꞌñis chuc jajämꞌtisyaꞌ, mijam tupuj yiꞌ mọꞌ: "¿Junꞌ dash joꞌmeiꞌ jämꞌtim?" 21Jeshaꞌ, muꞌ jämꞌtyety puñuj tupuj muꞌdye pirij jedyeꞌ chuc jämꞌtyeꞌ muꞌ. Muꞌdye pirij tupuj jämꞌtyeꞌ yiris puñuj yụꞌtacdyes jämꞌsiꞌ jedyeꞌ, judyeyaꞌ yocsiꞌ jam jämꞌsidyes jedyeꞌ.
22Meꞌdye muꞌ chimeꞌ Jenꞌ meꞌ tsanꞌ muꞌ mạꞌjeꞌ ferdyeꞌyaꞌ muꞌ jịꞌcaveyacsi fạ́codyeꞌ muꞌ muꞌin aty vaꞌtacdyety in, dyichjetacsi qui namꞌ jam jätäjjeyacsi vaꞌtacdyety raꞌ in. 23Chimeꞌdye muꞌ Jenꞌ yuꞌsinꞌ tsun paj qui soꞌmac ñịbeꞌjitidyes tsun, mọꞌdyes muꞌ mạꞌjeꞌ paj qui meꞌ jịꞌcaveyacsi räj in mọꞌ därsiꞌ jämꞌyedyeꞌ muꞌ. Meꞌ muꞌ därsiꞌ mạꞌjitidyes muꞌ jiꞌcaviyisinꞌ tsun, muꞌ aty tạꞌcaty tsimꞌsinꞌ jiquej tsun tashcheꞌdye paj qui muꞌyaꞌ tsun Jenꞌyadyety tsun. 24Meꞌdyes muꞌ Jenꞌ fayisinꞌ paj qui meꞌ yụꞌtac tsun, jam muꞌĉantyiꞌ mọmoꞌ fayacsi judíoĉantyiꞌ, chimeꞌdye muꞌĉantyiꞌ jam judíoĉantyiꞌ chimeꞌ fayacsi muꞌ Jenꞌ. 25Meꞌ cạ̈tsiꞌ Oseaĉansiꞌ sánacdyeꞌ, yiꞌ mọꞌ, Jenꞌ raꞌ fayacsi muꞌin jam judío in, yi muꞌ:
"Muꞌin yoctyiꞌdye muntyiꞌ in jam yụ́tyiꞌ in,
yụ raꞌ jéyacsi: Miꞌin nash aty ĉụiꞌtyiꞌ muntyiꞌ yụ.
Muꞌin jam mạꞌjeyacdyety yụ́yaꞌ in, yụ raꞌ jéyacsi:
Miꞌin nash mạꞌjeyacdyety yụ, yi muꞌ Jenꞌ.
26Yóĉandyemꞌ jéyacsi jiquej u yụ:
Jam nash yụ́tyiꞌ muntyiꞌ miꞌin,
chimuꞌĉandye raꞌ yi in:
Muꞌin nash aty Jenꞌtyiꞌ ạvaꞌ in,
muꞌ tsạꞌtyiꞌ Jenꞌ."
27Muꞌ Isaías p̂eyacsi muꞌin Israeltyiꞌ vóshiꞌ in, yiꞌ sánacdyeꞌcheꞌ muꞌ: "Meꞌ tsanꞌ daiꞌ in Israeltyiꞌ vóshiꞌ in jeñejti jáman in, damꞌ qui na raꞌ mọmoꞌ c̣hoñi in, 28ĉaĉaij na Jenꞌ raꞌ räj jịꞌcätseꞌ p̂eyacdyeꞌ muꞌ, cavintum raꞌ vaꞌtacdyeꞌ soꞌmacsi räj buꞌyity jacchety muntyiꞌ in", yiꞌ sánacdyeꞌ. 29Muꞌdye Isaías yi tashcheꞌ jiquej:
"Arajdye tas ijasinꞌ in,
muꞌ mujuꞌchaty Ayoꞌ jam damꞌ jiꞌshucsinꞌ jụijyaꞌ tsun jiquej,
a vuty itŝijaꞌ q̂uinꞌ u,
yojdyemꞌ Sodomaĉantyiꞌ muntyiꞌ u in judyeyaꞌ Gomorraĉantyiꞌ in,
a vuty meꞌ shupquejaꞌ u tsun", yiꞌ sánacdyeꞌ.
Judío in jam anicjepte in jämꞌsiꞌ p̂eyacdyeꞌ Jenꞌsiꞌ muꞌ
30Meꞌ ọij cạiꞌ p̂eyacdyeꞌ, muꞌin jam judío in, meꞌ tsanꞌ jam dyijyi in junꞌ chuc raꞌ rụij yụꞌtac Jenꞌyaꞌ in, muꞌindye q̂uinꞌ aty rụij yụꞌtac in, ĉaĉaij na muꞌin anicjete Jenꞌ in. 31Muꞌin na Israeltyiꞌ vóshiꞌ in tsimꞌtactyiꞌ tsanꞌ Jenꞌyaꞌ in, mọmꞌ cäc̣häꞌchuiꞌ in mọꞌ yụꞌtacdyeꞌ, jeñej aty raꞌ mọꞌ tupuj rụij yụꞌtacsiꞌ ĉúti u in, mọꞌdyes jam rụij yụꞌtac Jenꞌyaꞌ in. 32¿Junꞌ buty meꞌ? Ĉaĉaij na muꞌin judío in jam mạꞌjeꞌ dyijtute Jenꞌ in paj qui muꞌ rụij yụꞌtacsi anicyedyeꞌyaꞌ muꞌin, jeñej aty raꞌ tsanꞌ tupuj c̣hoñi ĉụiꞌsiꞌyaꞌ rụijquedyeꞌ ĉúti u in. Anic cäj cạiꞌ dyijyedyeꞌ in, mọꞌdyes qui muꞌ Cristo jeñej buꞌyi taꞌchitidyety mij, meꞌ buꞌyi shupqui muꞌindyety judíodyety in, ĉaĉaij na muꞌ vaꞌquecte Cristo in. 33Muꞌdye Cristo p̂eijte muꞌ Jenꞌ sánacdyeꞌchemꞌ:
Jeshaꞌ, muꞌĉan Siónĉan yụ yụꞌtyeyeyacsi yirity mij taꞌchitidyety muntyidyety in,#9:33 "Sión" nash yocsiꞌ tịj mọꞌ, mọꞌ bäꞌyedyeꞌ Jerusalénsiꞌ.
paj qui muꞌcheꞌ tach tŝọij in,
meꞌ buꞌyiꞌ raꞌ shupquiꞌ muꞌindyes in,
ĉaĉaij na muꞌin in jam méquiꞌ anicjete in.
Jụꞌñity chuc anicjetety in,
muꞌin raꞌ jam junꞌ fibidyes shupqui in.
Currently Selected:
Romaĉantyidyes 9: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
