Romaĉantyidyes 8
8
Jenꞌsiꞌ Ạꞌedyeꞌ muꞌ bächäsinꞌ tsun
1Q̂uinꞌ aty jam vaꞌtacdyety yụꞌtac in muꞌin Jesucristoty in, 2ĉaĉaij na Jenꞌsiꞌ Ạꞌedyeꞌ muꞌ, mọꞌsiꞌyaꞌ ferdyeꞌ mọꞌ tsạꞌchusinꞌ tsun ĉaĉaij na aty Jesucristoty tsun. Mọꞌ jiꞌc̣honsinꞌ tsun juchajyaꞌ paj qui mọꞌ juchas ferdyeꞌ mọꞌ jam bächäsinꞌ, paj qui jam sänꞌdyeꞌ yuꞌtyiyisinꞌ tsun. 3Mọꞌ na Jenꞌsiꞌ yụꞌtacdyeꞌ muꞌ, mọꞌ jam tupuj jiꞌc̣honsinꞌ tsun ĉaĉaij na jam méquiꞌ ferdyeꞌ meꞌchujaꞌ tsun, mọꞌdyes qui jam tupuj chiquepja tsun. Jenꞌ qui namꞌ jiꞌc̣honsinꞌ tsun, muꞌ jutaqui ĉụiꞌtyiꞌ Ạvaꞌ muꞌ, muntyiꞌ buꞌyi qui jiꞌcaviti, mijam qui namꞌ méquiꞌ juchajtum muꞌ. Muꞌ jiꞌijati úcheꞌ tsunsidyes juchaj, paj qui mọꞌ juchaj aty jam bächäbusinꞌ aꞌ tsun. 4Meꞌ muꞌ Jenꞌ yi paj qui muntyiꞌ tsun jịꞌcätsepja mọꞌ rụijsis yụꞌtacdyeꞌ muꞌ, cäc̣häꞌchubijaty jụijyaꞌ Jenꞌsiꞌ Ạꞌedyeꞌ muꞌ, jam ĉụiꞌsiꞌ dyijyedyeꞌ cạjaty jụijyaꞌ tsun, meꞌ raꞌ chat jịꞌcätsepja yụꞌtacdyeꞌ muꞌ.
5Tyi chuc dyijtuquity aꞌc̣his dyijyedyeꞌ aꞌsiꞌ muꞌ, mọꞌdye mọmoꞌ cäc̣häꞌchuqui, mọꞌdye jabächäti. Muꞌ na dyijtuptety Jenꞌsiꞌ Ạꞌedyeꞌ muꞌ, mọꞌdye muꞌ cạiꞌ Ạꞌedyeꞌsiꞌ dyijyedyeꞌ muꞌ. 6Tyi chuc meꞌ dyijtuquity aꞌc̣his dyijyedyeꞌ aꞌsiꞌ muꞌ, sänꞌdyeꞌ muꞌ jayuꞌtyiyiti. Muꞌ na dyijtuptety Jenꞌsiꞌ Ạꞌedyeꞌ muꞌ, muꞌ raꞌ soꞌmac maꞌjodyeꞌ ĉojtyiꞌĉandyes muꞌ, Jenꞌ raꞌ jạtsaꞌchuti. 7Muꞌin aꞌc̣his dyijyedyeꞌ aꞌsiꞌ cạquity in, muꞌin meꞌtyity in fáquitity Jenꞌtum in, meꞌ shupqui in. Muꞌindye jam mạꞌjeꞌ chiquepte yụꞌtacdyeꞌ in, mijam junꞌ buꞌyi tupuj chiquepte in ĉaĉaij na itŝiꞌ ferdyeꞌ meꞌchuiꞌ ĉojtyiꞌĉan in. 8Mọꞌdyes muꞌin meꞌtyity in cạquity in aꞌc̣his dyijyedyeꞌ aꞌsiꞌ muꞌin, muꞌin jam junꞌ maꞌjotac Jenꞌyaꞌ in.
9Miꞌin na aty jam cạqui aꞌc̣his dyijyedyeꞌ aꞌsiꞌ miꞌin, Jenꞌsiꞌ quimꞌ Ạꞌedyeꞌ cäc̣häꞌchubitinte, meꞌchubitinte jụijyaꞌ ĉojtyiꞌĉan miꞌin. Muꞌ na jam meꞌchuptety Cristos Ạꞌedyeꞌ jụijyaꞌ muꞌ, jam muꞌ junꞌ Cristoty muꞌ. 10Miꞌin meꞌchutintety Cristo ĉojtyiꞌĉan miꞌin, meꞌ raꞌ tsanꞌ säñiꞌ aꞌ jụijyaꞌ miꞌin juchadyes miꞌin, Jenꞌsiꞌ qui namꞌ Ạꞌedyeꞌ muꞌ tsạꞌchunac miꞌin ĉaĉaij na aty rụij yụꞌtac Jenꞌyaꞌ miꞌin. 11Jenꞌ vañinjebajte muꞌ Jesucristo säñity jiquej, chimuꞌdye raꞌ vañinjibunac miꞌin, meꞌchubitinte Jenꞌsiꞌ Ạꞌedyeꞌ ĉojtyiꞌĉan jụijyaꞌ miꞌin, mọꞌ raꞌ tsạꞌchubunac sänꞌdyes aꞌ miꞌin.
12Anicdye meꞌ vojity, jemoñeꞌ tsun cäc̣häꞌchupja Jenꞌsiꞌ Ạꞌedyeꞌ muꞌ, aty qui raꞌ jam jemoñeꞌ aꞌc̣his dyijyedyeꞌ aꞌsiꞌ tsun cäc̣häꞌchujaꞌ. 13Cạquity jụijyaꞌ aꞌc̣his dyijyedyeꞌ aꞌsiꞌ miꞌin, sänꞌdyeꞌ raꞌ yuꞌtyiyinac mọꞌ. Jenꞌsiꞌ Ạꞌedyeꞌ cäc̣häꞌchuptinte jụijyaꞌ miꞌin, mọꞌsiꞌyaꞌ qui raꞌ ferdyeꞌ mọꞌ jiꞌsäntiñeꞌ ĉụiꞌsiꞌ dyijyedyeꞌ aꞌc̣his aꞌsiꞌ miꞌin, chat qui raꞌ tsạꞌ Jenꞌdyes miꞌin.
14Tyi chuc cäc̣häꞌchuptety in Jenꞌsiꞌ Ạꞌedyeꞌ muꞌ, muꞌin nash Jenꞌtyiꞌ ạvaꞌ in. 15Jenꞌsiꞌ Ạꞌedyeꞌ muꞌ, mọꞌ soꞌmisinꞌsiꞌ Jenꞌ, mọꞌ jam úñedyeꞌĉan yuꞌsinꞌ tsun, mijam mọꞌ yiꞌ paj qui quijnacdyeꞌtum bäꞌjaꞌ, aty jam jeñej jiquej tsun. Mọꞌdye q̂uinꞌ yuꞌsinꞌ paj qui Jenꞌtyiꞌ ạvaꞌ shupquejaꞌ tsun. Mọꞌsiꞌyaꞌ ferdyeꞌ tupuj jéja Jenꞌ: "Jenꞌ, mi nash tsuntyiꞌ Jenꞌ", tupuj yéjaꞌ tsun. 16Jenꞌsiꞌ Ạꞌedyeꞌ muꞌ p̂eyaquiꞌ tsunsiꞌtum ạꞌedyeꞌ, mọꞌ qui jiꞌjäcsinꞌ tsun in junꞌ chuc aty Jenꞌtyiꞌ ạvaꞌ tsun. 17Tsun aty Jenꞌtyiꞌ ạvaꞌ muꞌ, mọꞌdyes qui raꞌ muꞌ soꞌmisinꞌ tsun ñịbeꞌyedyes mọꞌ jiꞌbisiyisinꞌsiꞌ tsun, mọꞌ raꞌ jasoꞌmiti muꞌ Cristo, tsundyesmun raꞌ chimeꞌ mọꞌ. Ñịbedyes jịꞌĉojtyejaꞌ jụijyaꞌ yojdyemꞌ muꞌ u, muꞌcheꞌdye raꞌ tsun penꞌdyetuja.
Soꞌmac raꞌ tsun fer buꞌyedyeꞌ
18Meꞌ tsanꞌ q̂uinꞌ ñịbedyes jịꞌĉojtyejaꞌ úcheꞌ jaccheꞌ tsun, jam qui namꞌ mọꞌ jiꞌtarisinꞌ, ịtsuꞌquis mọꞌ shupquiꞌ yụ́dyes mọꞌ ñịbedyes jịꞌĉojtyejaꞌsiꞌ q̂uinꞌ tsun, jadyiquisĉan raꞌ tupudyeꞌ dadamꞌ raꞌ mọjoꞌchas fer jämꞌyedyeꞌ soꞌmisinꞌ tsun ạvaꞌ muꞌ mạijquedyeꞌyamꞌ. 19Q̂uinꞌ räj ọij jämꞌtacdyeꞌ Jenꞌsiꞌ muꞌ bisaquiꞌ fercheꞌ in, mọꞌin mạꞌjeꞌ in paj qui muꞌ Jenꞌ jorojĉanjeyacsi ạvaꞌ muꞌ, aty mọꞌ ayijyaꞌ tupudyeꞌ. 20Juchaijyaꞌ jiquej muꞌ tashchety muntyiꞌ, chat qui Jenꞌsiꞌ vaꞌtacdyeꞌ muꞌ räj buꞌyiꞌ ọijcheꞌ jac tŝọiꞌ, räj buꞌyiꞌ jämꞌtacdyeꞌchemꞌ, fibis buꞌyiꞌ qui shupquiꞌ mọꞌ, ĉaĉaij na Jenꞌdye meꞌ dyijyi vaꞌtacdyeꞌ soꞌmeꞌ. Meꞌ tsanꞌ meꞌ, mọꞌyaꞌ qui namꞌ jämꞌsiꞌ Jenꞌsiꞌ dyijyedyeꞌ muꞌ, 21yirisĉan raꞌ mạyedyeꞌ muꞌdye raꞌ jämꞌ yụꞌtacseban cuvij räj jämꞌtacdyeꞌ muꞌ, meꞌquiꞌdye raꞌ chimeꞌ sänjanꞌ jämꞌtacdyeꞌ muꞌ. Mọꞌmun raꞌ chimeꞌ c̣hoñiꞌ, aty ayijyaꞌ tupudyeꞌ paj qui muꞌ Jenꞌ fer buꞌbajshaꞌ yuꞌsinꞌ tsun ạvaꞌ muꞌ. 22Chị́jaꞌ tsun tacaꞌdye q̂uinꞌ räj ọij jämꞌtacdyeꞌ Jenꞌsiꞌ muꞌ yejĉoiꞌ ñịbeꞌ cạveꞌ in, areꞌredyeꞌ jịꞌĉojtyeꞌ in jeñej yiris basdyis raꞌ p̂en, meꞌ buꞌyiꞌdyemꞌ jämꞌtacdyeꞌ muꞌ q̂uinꞌ in. 23Jam mọꞌ mọmoꞌ jämꞌtacdyeꞌ meꞌ muꞌ, tsunmun chimeꞌ Jenꞌsiꞌtumtyiꞌ Ạꞌedyeꞌ, meꞌdye tsun chimeꞌ ñịbedyes jịꞌĉojtyejaꞌ ĉojtyiꞌĉan tsun, mọꞌ bisjaꞌsiꞌ tsun, Jenꞌ raꞌ jiꞌc̣honbusinꞌ aꞌ tsun, yoc qui raꞌ yuꞌbusinꞌ, aty raꞌ ạvatusinꞌyaꞌ muꞌ Jenꞌ, meꞌ raꞌ yuꞌbusinꞌ aꞌ tsun. Jenꞌsiꞌ Ạꞌedyeꞌ muꞌ mọꞌ soꞌmisinꞌsiꞌ, mọꞌ nash yacchutis ñịbeꞌyedyes, mọꞌ jorojĉanyiꞌ jábiyaꞌ raꞌ räj ñịbeꞌjisinꞌ. 24Tsun anicyedyeꞌyaꞌ c̣honjaꞌ tsun, q̂uinꞌ tsun bisvaꞌquejaꞌ paj qui muꞌ jịꞌcätsiyisinꞌ p̂eyacdyeꞌ muꞌ. Aty meꞌchujaꞌ jụijyaꞌ mọꞌ bisvaꞌquejas tsun, tas mọꞌ bisacdyeꞌ tsun, meꞌquiꞌdye bisjaꞌ mọꞌ. 25Q̂uinꞌ na tacaꞌ bisacvaꞌjojaꞌ Jenꞌdyes, mọꞌ jambiꞌ meꞌchujaꞌsiꞌ, mọꞌdyes q̂uinꞌ tyumꞌchutidyeꞌtum bisvaꞌquejaꞌ tsun.
26Meꞌ tsanꞌ itŝiꞌ ferdyeꞌ tsun, Jenꞌsiꞌ qui namꞌ Ạꞌedyeꞌ muꞌ, mọꞌ räjĉan ñútyisinꞌ, ĉaĉaij na jam chị́jaꞌ junꞌ chuc raꞌ cọdaĉaꞌ Jenꞌcheꞌ tsun. Mọꞌ qui Jenꞌsiꞌ Ạꞌedyeꞌ muꞌ, mọꞌ ñútyisinꞌ cọdacdyeꞌĉan tsun, ĉụiꞌsiꞌĉan dyijyedyeꞌ mọꞌ fercheꞌ cọdaquiꞌ, mijam muntyisĉan p̂eyacdyeꞌ jiꞌjäqueꞌ mọꞌ cọdacdyeꞌ mọꞌ. 27Muꞌ Jenꞌ, muꞌ chäyibusinꞌtyiꞌ dyijyedyeꞌ ĉojtyiꞌĉansiꞌ muntyis tsun, muꞌ nash chị́yebiꞌ dyijyedyeꞌ Ạꞌedyes muꞌ, cọdyeteyaꞌ Jenꞌ tsundyesiꞌ muꞌtyidyes muꞌ, yódyemꞌ mạꞌjeꞌ Jenꞌ u, meꞌ cọdyete Jenꞌ tsundyes.
Tsun jiꞌpenjaꞌ räj aꞌc̣his dyijyedyeꞌ
28Chị́jaꞌ tsun, jedyeꞌ chuc räjĉan jịꞌĉojtyejaꞌ tsun, meꞌ tsanꞌ ñịbeꞌ cạvejaꞌ tsun, muꞌdye qui namꞌ Jenꞌ meꞌ yuꞌtyiyisinꞌ joꞌmes jịꞌĉojtacdyeꞌ paj qui jämꞌjojaꞌve p̂anjaꞌ Jenꞌdyes tsun, tsun mạꞌjejatydyes Jenꞌ, tsun fayactyiꞌ ĉụiꞌsiꞌyaꞌ dyijyedyeꞌ muꞌ, tsundyes räj yuꞌtyiyisinꞌ paj qui jämꞌjojaꞌve. 29Urucyaꞌdye jiquej muꞌ Jenꞌ tạꞌcaty chị́yacsi jụꞌñity chuc raꞌ muꞌdyety in, muꞌindye mọmoꞌ muꞌ pạrejtacsi paj qui jeñej ĉụiꞌtyiꞌ Ạvaꞌ muꞌ meꞌ buꞌyi shupqui in, paj qui vojity Ạvaꞌtyiꞌ muꞌ, paj qui meꞌ buꞌyi in. Daiꞌ raꞌ vojity muꞌ, muꞌ raꞌ tashchety vojity muꞌin, mọꞌ dyijyedyeꞌ Jenꞌsiꞌ jiquej muꞌ. 30Meꞌdye muꞌ Jenꞌ fayacsi pạrejtactyiꞌ muꞌ, muꞌindye muꞌ rụij yụꞌtacsi, muꞌinmundye raꞌ meꞌchupte in Ạvaꞌsiꞌ jämꞌyedyemꞌ mạijquedyeꞌyamꞌ.
31Där jämꞌsiꞌ shupquiꞌ tsundyesiꞌ, mọꞌdyes ¿jätäjyejaꞌ bu raꞌ damꞌdye tsun? Cạvejaꞌ, jam tyi jiꞌpensinꞌ in ĉaĉaij na Jenꞌdye ñútyisinꞌ judyeyaꞌ ĉujcasinꞌ. 32Muꞌ jam damꞌ ĉụiꞌtyiꞌ Ạvaꞌ muꞌ ạ̈räjjityisinꞌ, muꞌ tacjiyisinꞌ mọmoꞌ paj qui muꞌ ijac tsundyes. Anicdye meꞌ, muꞌ ñịbeꞌjisinꞌ tsun yụꞌtaqui Ạvaꞌ muꞌ, chidyemꞌ mọꞌ yocsiꞌ umꞌ, maꞌyity jam junꞌ quijatutyisinꞌ u, räj raꞌ ñịbeꞌjisinꞌ tsun. 33¿Tyi buty tupuj c̣họcoꞌsinꞌ tsun juchajyaꞌ Jenꞌtyiꞌ tsimꞌtactyiꞌ tsun? Jam yirity tupuj, ĉaĉaij na muꞌdye Jenꞌ rụij yuꞌsinꞌ juchajyaꞌ tsun. 34¿Tyi buty ĉaĉaij tupuj vaꞌtacdyeꞌ soꞌmisinꞌ juchadyes tsun? Mijam yirity, ĉaĉaij na muꞌ Cristo aty ijac tsundyes, jam mọꞌ mọmoꞌ, chimeꞌ vañinyeban, mạyedyeꞌcheꞌ qui jịjcaban, tacve buꞌban Jenꞌyaꞌ, muꞌcheꞌ qui cọdaĉan Jenꞌyaꞌ tsundyes. 35¿Jedyeꞌ buty raꞌ tupuj ñutsjityisinꞌ tsun mạꞌjitidyesyaꞌ muꞌ Cristos? ¿Areꞌ ñịbedyes? ¿Areꞌ carijsis jịꞌĉojtyejaꞌsiꞌ? ¿Areꞌ ñịbeꞌtacdyeꞌ, areꞌ dáquis, areꞌ cädädyeꞌ, areꞌ tsäquiꞌsis jedyeꞌ, areꞌ c̣hojvacdyeꞌ? ¿Mọꞌin buty tupuj ñutsjityisinꞌ mạꞌjitidyesyaꞌ muꞌ? Jam junꞌ, mijam yiris jedyeꞌ tupuj ñutsjityisinꞌ Cristoyaꞌ. 36Mọꞌdye p̂eyeꞌ sánacdyeꞌ yiꞌ:
"Jämꞌdyeyaꞌ mídyes mạꞌjeꞌ ijan tsun in ĉaĉaij na mi cäc̣häꞌchuyactyiꞌ tsun.
Tsun jeñej buꞌyi ijacdyes oveca, meꞌ ĉun tsun in", yiꞌ sánacdyeꞌ.
37Räj ọij jịꞌĉojtyejas tsun, meꞌ tsanꞌ meꞌ, jam qui namꞌ méquiꞌ penjaꞌ tsun, muꞌ qui namꞌ mạꞌjisinꞌtyiꞌ Jesucristo, dadamꞌ ferdyeꞌ soꞌmisinꞌ paj qui fer buꞌjaꞌ bäꞌjaꞌ. 38Chịj yụ, mijam yiris jedyeꞌ tupuj pạrejjisinꞌ tsun mạꞌjitidyesyaꞌ Cristos muꞌ. Meꞌ raꞌ tsanꞌ sänjaꞌ jụijyaꞌ tsun, meꞌ raꞌ tsanꞌ yejĉojaꞌ tacaꞌ tsạꞌ buꞌjaꞌ tsun, mọꞌ jịꞌĉojtyejaꞌsiꞌ q̂uinꞌ tsun, mọꞌ raꞌ jịꞌĉojtyejaꞌsiꞌ jábiyaꞌ, mọꞌ raꞌ jam junꞌ pạrejjisinꞌ mạꞌjitidyesyaꞌ Cristos muꞌ. Mijam anjer in, mijam cheꞌves ayoꞌ in fer buꞌyis in, 39mijam muꞌin mạyedyeꞌchety fer buꞌyity in, mijam úchety in, mijam raꞌ yiris jedyeꞌ tupuj pạrejjisinꞌ Jenꞌsiꞌyaꞌ mạꞌjitidyesyaꞌ muꞌ, mọꞌ jiꞌcaviyisinꞌsiꞌ muꞌ Cristo Jesús, Ayoꞌ tsun, mọꞌ raꞌ yejĉoiꞌ tsuncheꞌ buꞌyiꞌ mạꞌjitidyes muꞌ.
Currently Selected:
Romaĉantyidyes 8: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
