Romaĉantyidyes 7
7
Pablo jeñej buꞌyiꞌ vämedyeꞌ jiꞌshupqueꞌ yụꞌtacdyeꞌ
1Vojity, chị́yetiñeꞌ adac miꞌin yụꞌtacdyeꞌ, junꞌ chuc yirity muntyiꞌ tacaꞌdyemꞌ tsạꞌ jụijyaꞌ muꞌ mọꞌ yụꞌtacdyeꞌ yejĉoiꞌ jabächäti. A qui namꞌ säñi jụijyaꞌ muꞌ muntyiꞌ meꞌquiꞌdye jabächäti. 2Jeshaꞌ, mọꞌ vämis p̂en jam junꞌ tupuj yacchute vämtyiꞌ mọꞌ, tacaꞌdyemꞌ tsạꞌ jụijyaꞌ muꞌ. A qui namꞌ säñiyaꞌ vämtyiꞌ mọꞌ, chat q̂uinꞌdyemꞌ faraj buꞌbanꞌ, shubanꞌ vämtyisĉanvun yụꞌtacdyeꞌ mọꞌ. 3Tacaꞌ na tsạꞌ vämtyiꞌ jụijyaꞌ mọꞌ, yoctyiꞌtum qui sonꞌ ĉọshiꞌ jụijyaꞌ mọꞌ, voꞌvoiꞌ shupquiꞌ mọꞌ. A qui namꞌ säñiyaꞌ vämtyiꞌ mọꞌ, shubanꞌ yụꞌtacdyeꞌĉan mọꞌ, tupuj yoctyiꞌcheꞌ qui sonꞌ vämebanꞌ mạꞌjeꞌ jụijyaꞌ, aty jam juchaj shupquiꞌ mọꞌ.
4Meꞌdye miꞌin chimeꞌ vojity, miꞌin säñi Cristotum jiquej miꞌin, aty säñity buꞌyi miꞌin, mọꞌdyes qui aty shuban yụꞌtacdyeꞌĉantyiꞌ miꞌin. Q̂uinꞌ chat aty Cristoty miꞌin, muꞌ vañinjebajtety Jenꞌ jiquej, paj qui jämꞌ bäꞌyi miꞌin. Meꞌ raꞌ Jenꞌdyes bäꞌjaꞌ tsun. 5Jiquej tsun meꞌchujaꞌdyemꞌ tashches dyijyedyeꞌ aꞌc̣his tsun, mọꞌ yụꞌtacdyeꞌ jiꞌnaꞌiyisinꞌ aꞌc̣his dyijyedyeꞌ ĉojtyiꞌĉan tsun, mọꞌ sänꞌdyeꞌ yuꞌtyiyisinꞌsiꞌ. 6Q̂uinꞌ qui namꞌ aty shubajshaꞌ yụꞌtacdyeꞌĉan tsun ĉaĉaij na aty sänjaty shupquejaꞌ tsun, paj qui mọꞌ yụꞌtacdyeꞌ aty jam bächäbusinꞌ tsun, aty jam mọꞌ cäc̣häꞌchujaꞌ mọꞌ urucyas sánacsiꞌ yụꞌtacdyeꞌ. Q̂uinꞌ chat aty faraj tsun, tupuj qui mụiꞌsis cäc̣häꞌchujaꞌ, Jenꞌsiꞌ Ạꞌedyeꞌ muꞌ cäc̣häꞌchupja q̂uinꞌ.
Yụꞌtacdyeꞌ seꞌ jaꞌyisinꞌ juchajĉan
7¿Jätäjyejaꞌ buty raꞌ tsun, ac̣hiꞌyis buty mọꞌ yụꞌtacdyeꞌ Jenꞌsiꞌ muꞌ? Jam junꞌ meꞌ muꞌ, ĉaĉaij na mọꞌ yụꞌtacdyeꞌ jorojĉanjibusinꞌ juchaj tsun. Jam mọꞌyaꞌ jụijyaꞌ yụꞌtacdyeꞌ, a vuty jam junꞌ chị́jaꞌ u jedyeꞌ chuc mọꞌ juchaj. Jeshaꞌ, yiris yụꞌtacdyeꞌ yiꞌ:#7:7 Exodo 20:17 "Jam raꞌ mạꞌjeyacsebi miꞌin yoctyis jedyeꞌ muꞌin", yiꞌ. Jam meꞌ yiꞌ yụꞌtacdyeꞌ jụijyaꞌ, a vuty jam tupuj chịj u yụ meꞌ juchaj shupquiꞌ mạꞌjeyacsebi jụijyaꞌ yụ yoctyis jedyeꞌ muꞌin. 8Seꞌveꞌ qui yụ mọꞌ yụꞌtacdyeꞌ, mọꞌ qui jiꞌnaꞌiyin yụ juchaj yụ ĉojtyiꞌĉan yụ, mọꞌ yụꞌtacdyeꞌ yiꞌ paj qui dadamꞌ mọjoꞌchaꞌ mạꞌjeyacsebi yụ yoctyis jedyeꞌ muꞌin. Itŝiꞌ jụijyaꞌ mọꞌ yụꞌtacdyeꞌ, a vuty jam ferdyeꞌtum juchaj o. 9Meꞌ jiquej yụ, jambiꞌdyemꞌ seꞌveꞌ jiquej yụ mọꞌ yụꞌtacdyeꞌ, ĉụiꞌ bäꞌyi yụ junꞌ chuc mạꞌjeꞌ yụ, jeñej jam juchaij ĉúti yụ. Seꞌveꞌ qui yụ mọꞌ yụꞌtacdyeꞌ, mọꞌ jịꞌtsaꞌibun yụ ĉojtyiꞌĉansiꞌ juchaj yụ, mọꞌ jiꞌdyijvin yụ aꞌc̣his ĉojtyiꞌĉansiꞌ dyijyedyeꞌ yụ, chịmoꞌdye sänꞌdyeꞌ yuꞌtyiyin yụ. 10Mọꞌ yụꞌtacdyeꞌ mọꞌ yụꞌtac jiquej paj qui mọꞌ tsạꞌchusinꞌ tsun, jam qui namꞌ meꞌ shupquiꞌ tsuncheꞌ, meꞌdye sänꞌdyeꞌ mọmoꞌ yuꞌtyiyisinꞌ. 11Juchaj väñädyeꞌyaꞌ seꞌ jaꞌyin yụ, judyeyaꞌ yụꞌtacdyeꞌyaꞌ mọꞌ juchaj tupuj sänꞌdyeꞌ yuꞌtyiyin yụ, ĉaĉaij na meꞌ yiꞌ mọꞌ yụꞌtacdyeꞌ: "Tyi chuc juchaij jụijyaꞌ in muꞌin raꞌ säñi in."
12Mọꞌ jiꞌchäquiyisinꞌ anic rụijsis mọꞌ yụꞌtacdyeꞌ, Jenꞌdye yụꞌtyeꞌ räj mọꞌ yụꞌtacdyeꞌ, muꞌsiꞌdye mọꞌ muꞌ, där jämꞌsiꞌ muꞌ. 13Mọꞌ jämꞌsiꞌ yụꞌtacdyeꞌ muꞌ, ¿mọꞌ buty sänꞌdyeꞌ yuꞌtyiyin yụ? Jam junꞌ meꞌ. Juchaj sänꞌdyeꞌ yuꞌtyiyisinꞌ, mọꞌyaꞌ jämꞌsiꞌyaꞌ yụꞌtacdyeꞌ, mọꞌyaꞌ sänꞌdyeꞌ yuꞌtyiyisinꞌ. Meꞌdyes mọꞌ yụꞌtac yụꞌtacdyeꞌ, mọꞌ qui jiꞌchäquiyisinꞌ jedyeꞌ chuc mọꞌ juchaj, mọꞌyaꞌ yụꞌtacdyeꞌyaꞌ tupuj chị́jaꞌ tsun anic jiyiꞌ där aꞌc̣his mọꞌ juchaj, mọꞌ räj jísinꞌ junꞌ chuc cạiꞌ.
Chutidyeꞌ ĉojtyiꞌĉansiꞌ tsun
14Chị́jaꞌ tsun mọꞌ yụꞌtacdyeꞌ anic Jenꞌyas ayij, muntyiꞌ qui namꞌ tsun, tsun úñity juchaty mọꞌ, mọꞌ bächäsinꞌ tsun. 15Yụ jam chịj junꞌ buty meꞌ ac̣hiꞌ bäꞌyi yụ, mạꞌjeꞌ tsanꞌ rụij bäꞌyi ĉútiꞌ yụ, jam qui namꞌ tupuj meꞌ bäꞌyi yụ, ĉaĉaij na mọꞌ aꞌc̣his dyijyedyeꞌ mọmoꞌ jämeꞌ yụ. 16Yụ jam damꞌ maꞌjotaqui mọꞌ aꞌc̣his dyijyedyeꞌ cạiꞌsiꞌ yụ, mọꞌ maꞌjotyeꞌ yụ mọꞌ yụꞌtacdyeꞌ, mọꞌ chat rụijsis. 17Mọꞌ aꞌc̣his cạiꞌsiꞌ yụ jam mọꞌ yụs dyijyedyeꞌ mọꞌ, ĉojtyis juchaj yụ mọꞌ bächän yụ. 18Chịj yụ ĉụiꞌtyiꞌĉan ĉojtyiꞌ yụ, yódyemꞌ räj jacchety muntyiꞌ u in, itŝiꞌ méquis jämꞌsiꞌ dyijyedyeꞌ meꞌchuiꞌ yụ, mijam méquiꞌ mọꞌyaꞌ meꞌchuiꞌ jämꞌyedyeꞌ yụ. Yụ mạꞌjeꞌ tsanꞌ rụij bäꞌyi ĉúti, jam qui namꞌ tupuj meꞌ bäꞌyi yụ. 19Anicdye meꞌ, meꞌ tsanꞌ yụ mạꞌjeꞌ rụij bäꞌyi ĉúti, ac̣hiꞌ qui namꞌ bäꞌyi yụ, mọꞌ jam damꞌ maꞌjotyeꞌ yụ. 20Jeshaꞌ, jämꞌdyeyaꞌ ac̣hiꞌ bäꞌyi yụ, jam qui namꞌ meꞌ mạꞌjeꞌ tsanꞌ yụ, yejĉoij qui namꞌ meꞌ tacaꞌ yụ. Mọꞌ jorojĉanyiꞌ jam yụs mọꞌ dyijyedyeꞌ, ĉojtyis juchaj yụ, mọꞌ bächän yụ.
21Meꞌdyes ọij shupquiꞌ meꞌ tsanꞌ mạꞌjeꞌ rụij bäꞌyi ĉúti yụ, jam qui namꞌ tupuj meꞌ yụ, aꞌc̣his mọmoꞌ jämꞌtaqui yụ. 22Ĉojtyiꞌĉan yụ maꞌjotyepte tsanꞌ yụ Jenꞌsiꞌ yụꞌtacdyeꞌ muꞌ, 23mọꞌyaꞌ qui namꞌ aꞌĉansiꞌ ferdyeꞌ yụ, mọꞌ nash juchaj, mọꞌtum fáquitiꞌ jämꞌsiꞌtum dyijyedyeꞌ yụ. Mọꞌ aꞌĉansiꞌ ferdyeꞌ yụ carijtaqui ĉojtyiꞌĉan yụ, mọꞌ yiꞌ paj qui mọꞌ juchaj yejĉoiꞌ bächän yụ.
24-25Meꞌ shupqui yụ, meꞌ tsanꞌ dyijyedyeꞌĉan yụ mạꞌjeꞌ tsanꞌ paj qui Jenꞌsiꞌ yụꞌtacdyeꞌ muꞌ bächän yụ, aꞌĉansiꞌ qui namꞌ ferdyeꞌ yụ, mọꞌ yiꞌ paj qui mọꞌ juchaj yejĉoiꞌ bächäbun aꞌ yụ.
¡Där ñịbeꞌ cạveꞌ yụ! ¿Tyi buty tupuj ferdyeꞌ soꞌmin yụ paj qui mọꞌ jam bächän yụ ọij sänꞌdyes aꞌ yụ? Yoshoropaij jéte Jenꞌ yụ, muꞌ aty ferdyeꞌ soꞌmin yụ, Jesucristoyaꞌ muꞌ Ayoꞌ tsun.
Currently Selected:
Romaĉantyidyes 7: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
