Romaĉantyidyes 6
6
Tsạꞌ buꞌjaꞌ q̂uinꞌ Jesucristodyes
1Q̂uinꞌ aty rụij yụꞌtac tsun, ¿junꞌ qui bu raꞌ damꞌdye q̂uinꞌ tsun? ¿Tupuj buty yejĉojaꞌ juchayejĉojaꞌ tsun paj qui muꞌ Jenꞌ ñịbeꞌjitidyesyaꞌ muꞌ yejĉoij vayacjibusinꞌ juchaj tsun? 2Mijam junꞌ meꞌ, ĉaĉaij na aty sänjaꞌ buꞌjaꞌ paj qui aty jam junꞌbusinꞌ quivij mọꞌ juchaj, mọꞌdyes ¿tupuj buty yejĉojaꞌ juchayebajshaꞌ tsun? ¡Jam junꞌ! 3¿Jam chịj u miꞌin aty jiꞌsitac Jesucristoyaꞌ tsun, muꞌtumdye qui sänjaꞌ tsun? 4Jiꞌchojtidyeꞌ tsun mọꞌ yiꞌ junꞌ chuc aty jiꞌsitac muꞌyaꞌ tsun, mọꞌdyes qui muꞌtum sänjaꞌ judyeyaꞌ muꞌtumdye nạc chimeꞌ tsun. Aty meꞌsiꞌ muꞌ Jenꞌ därsiꞌyaꞌ ferdyeꞌ muꞌ, muꞌ vañinjibusinꞌ tsun paj qui mụiꞌsistum dyijyedyeꞌ bäꞌbajshaꞌ, yojdyemꞌ muꞌ Jenꞌ u, muꞌ Ạvatusinꞌtyiꞌ tsun, muꞌ vañinjajibun därsiꞌyaꞌ ferdyeꞌ muꞌ Jesucristo, meꞌdye qui tsun chimeꞌ.
5Aty jiꞌsäsdyiĉaꞌyaꞌ Cristoyaꞌ paj qui muꞌtum sänjaꞌ, muꞌtumdye raꞌ vañinyebajshaꞌ chimeꞌ. 6Chị́jaꞌ tsun mọꞌ tashches dyijyedyeꞌ aꞌc̣his tsun, mọꞌ aty ijac croshcheꞌ, paj qui mọtsiꞌ mọꞌ ferdyeꞌ juchas mọꞌ ĉojtyiꞌĉansiꞌ tsun, paj qui jam quivij bächäbusinꞌ mọꞌ juchaj. 7Jeshaꞌ muꞌ säñity muntyiꞌ aty c̣hoñi muꞌ ferdyeꞌyaꞌ juchas mọꞌ, aty jam jabächäbun quivij. 8Anicdye meꞌ aty Cristotum sänjaꞌ mọꞌdyes qui chị́jaꞌ aty muꞌtum bäꞌjaꞌ. 9Chị́jaꞌ tsun muꞌ Cristo säñi jiquej judyeyaꞌ qui vañinyeban, mijam raꞌ junꞌ cuvij sänjan muꞌ, ĉaĉaij na mọꞌ sänꞌdyeꞌ aty raꞌ jam junꞌ cuvij jajunꞌbun. 10Yiriꞌ quimꞌ säñi, sänꞌdyeꞌyaꞌ muꞌ jiꞌpeñeꞌ juchaj, itŝiꞌ yocsiꞌ sänꞌdyeꞌ meꞌchuiꞌ muꞌ, Jenꞌdyes qui bäꞌban q̂uinꞌ. 11Meꞌdye chimeꞌ miꞌin jemoñeꞌ säñi yuꞌti miꞌin, paj qui aty jam junꞌbunac quivij mọꞌ juchaj, judyeyaꞌ chimeꞌ jemoñeꞌ tsạꞌtyiꞌ Jenꞌdyes yuꞌti miꞌin ĉaĉaij na aty Jesucristoty miꞌin.
12Muꞌ Cristo aty jiꞌpeñeꞌ juchaj, mọꞌdyes jam raꞌ jiꞌsässun quivij juchajĉan miꞌin paj qui mọꞌ aty jam bächänac miꞌin, paj qui jam aꞌc̣his dyijyedyeꞌ jẹjcatiñeꞌ miꞌin. 13Mọꞌdyes jam raꞌ soꞌmetiñeꞌ juchaj ĉụiꞌsiꞌ aꞌ miꞌin, paj qui jam aꞌc̣hisĉan bäꞌban miꞌin. Damꞌdye jämꞌ Jenꞌ soꞌmetinte ĉụiꞌsiꞌ aꞌ miꞌin, ĉaĉaij na sänꞌdyeꞌĉan bäꞌyi jiquej miꞌin, q̂uinꞌ aty tsạꞌeban miꞌin. Jemoñeꞌ ĉụiꞌsiꞌ aꞌ miꞌin soꞌmetinte Jenꞌ, paj qui muꞌ yuꞌnac paj qui rụij bäꞌyi muꞌdyes miꞌin. 14Q̂uinꞌ chat aty raꞌ jam cäc̣häꞌchutiñeꞌ mọꞌ yụꞌtacdyeꞌ, mọꞌ jam tupuj jiꞌc̣honnac, muꞌ qui Jenꞌ cäc̣häꞌchutinte, ñịbeꞌjitidyesyaꞌ muꞌ ñútyinac paj qui meꞌquiꞌdye ayoꞌbuꞌyi miꞌincheꞌ mọꞌ juchaj.
Úñity buꞌjaꞌ tsun paj qui rụij bäꞌjaꞌ
15Anicdye meꞌ, q̂uinꞌ aty jam bächäsinꞌ mọꞌ yụꞌtacdyeꞌ, mọꞌ jam jiꞌc̣honsinꞌsiꞌ tsun, q̂uinꞌ qui namꞌ ñịbeꞌjitidyesyamꞌ jiꞌc̣honsinꞌ. ¿Tupuj buty quivij juchayejĉobajshaꞌ? Jam junꞌ. 16¿Jam adac chịj miꞌin, jụꞌñityyaꞌ chuc jiꞌsäsdyi miꞌin paj qui muꞌ chiquetinte miꞌin, muꞌdye raꞌ ayoꞌ shupqui miꞌin? Jiꞌsäsdyi juchajĉan jụijyaꞌ miꞌin, mọꞌdyemꞌ ayoꞌ shupquiꞌ miꞌin, mọꞌ sänꞌdyeꞌĉan yụꞌtacsis. Jenꞌyaꞌ na jiꞌsäsdyi jụijyaꞌ miꞌin, muꞌ ayoꞌ shupqui miꞌin, muꞌ rụij yụꞌtacsity. 17Meꞌ jiquej bäꞌyi miꞌin jiꞌsäsdyidyemꞌ juchajĉan miꞌin, mọꞌ jiquej juchaj ayoꞌbuꞌyi miꞌindyes. Q̂uinꞌ chat yoshoropaij jéja Jenꞌ, ĉaĉaij na aty jam meꞌ miꞌin, q̂uinꞌ miꞌin aty anicjetiñeꞌ ĉojtyiꞌĉan mọꞌ rụijsis jiꞌchäyitidyeꞌ seꞌvetiñes jiquej miꞌin. 18Aty jiꞌshupcac miꞌin juchajsiꞌĉantyiꞌ ferdyeꞌ mọꞌ, meꞌquiꞌdye meꞌtyinac miꞌin. Jenꞌtyiꞌ qui úñity yụꞌtac miꞌin, rụij qui bäꞌyi miꞌin. 19Q̂uinꞌ ọ́cheꞌ yụ jiꞌjäcacsebi muntyis p̂eyacdyeꞌ muꞌin paj qui tupuj chiquetiñeꞌ miꞌin jätäjyiꞌ chuc ọij carijsis p̂eyacdyeꞌ, yi yụ "úñity" judyeyaꞌ "ayoꞌ", paj qui jorojĉan shupquiꞌ mọꞌ. Yódyemꞌ jiquej ĉụiꞌ jiꞌsäsdyi juchajĉan miꞌin, úñity shupqui miꞌin aꞌc̣hisyaꞌ dyijyedyeꞌ, paj qui ac̣hiꞌ bäꞌyi miꞌin, meꞌdye raꞌ q̂uinꞌ miꞌin soꞌmetinte Jenꞌ ĉụiꞌsiꞌ aꞌ miꞌin, paj qui muꞌdyes mọmoꞌ úñi miꞌin, chimeꞌ paj qui muꞌdyes rụij bäꞌyi miꞌin.
20Tacaꞌdyemꞌ mọꞌ juchaj meꞌtyinac jiquej miꞌin, mọꞌ juchaj bächänac jiquej miꞌin, itŝiꞌdyemꞌ méquis rụijsis dyijyedyeꞌ Jenꞌsiꞌ cạptinte miꞌin. 21¿Jụꞌñis caꞌ bijodyeꞌ meꞌchutiñeꞌ miꞌin jiquej meꞌdyemꞌ bäꞌyaque jiquej miꞌin? Mijam méquiꞌ, tsị́cadyeꞌdyemꞌ meꞌchutiñeꞌ miꞌin jiquej, mọꞌ yuꞌtyinac sänꞌdyeꞌĉandyety miꞌin. 22Q̂uinꞌ chat aty jiꞌshupcac miꞌin juchajsiꞌĉantyiꞌ ferdyeꞌ, Jenꞌdyes qui úñi miꞌin. Q̂uinꞌ chat mọꞌyaꞌ meꞌchutiñeꞌ ñịbeꞌbetacdyeꞌ miꞌin, muꞌdyes qui bäꞌyi miꞌin, chat qui raꞌ räjĉan muꞌyaꞌ bäꞌyi miꞌin. 23Mọꞌ yaꞌitacdyeꞌ juchaijtyidyes in, sänꞌdyeꞌ raꞌ soꞌmac in. Mọꞌyaꞌ chimeꞌ mọꞌ ñịbeꞌyedyeꞌ soꞌmisinꞌsiꞌ Jenꞌ Jesucristoty tsun, muꞌ nash Ayoꞌ tsun, muꞌ soꞌmisinꞌ paj qui räjĉan Jenꞌyaꞌ bäꞌjaꞌ tsun.
Currently Selected:
Romaĉantyidyes 6: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
