Romaĉantyidyes 2
2
Jenꞌ jam cäj vaꞌtacdyeꞌ soꞌmacsi
1Mọꞌdyes miꞌin, meꞌ tsanꞌ judío miꞌin, meꞌ tsanꞌ jam, där tsäquiꞌ shupqui miꞌin dyijtucsebiyaꞌ miꞌin yoctyis juchaj muꞌin, yi jụijyaꞌ miꞌin: "Tupuj vaꞌtacdyeꞌ soꞌmac muꞌ juchajyaꞌ muꞌ." Meꞌ dyijyi miꞌin ĉụiꞌ jiꞌmeꞌyiti juchajyaꞌ miꞌin, meꞌ buꞌyiꞌ shupquiꞌ mọꞌ dyijtucdyeꞌ yoctyis juchaj muꞌ, ĉaĉaij na miꞌindye meꞌ chimeꞌ juchaij. 2Chị́jaꞌ tsun muꞌ Jenꞌ jam raꞌ cäj soꞌmacsi vaꞌtacdyeꞌ muꞌin meꞌ bäꞌyity in, rụijsisyaꞌ raꞌ dyijyedyeꞌ muꞌ soꞌmacsi vaꞌtacdyeꞌ. 3Chimeꞌdye mi, chätidyeꞌ, meꞌ tsanꞌ dyijtucsebim yoctyis juchaj muꞌin, chimeꞌtyitydye qui namꞌ mi juchaj soꞌmete Jenꞌ mi. Meꞌ jụijyaꞌ mi jam raꞌ dyijyi mi c̣hoñi raꞌ ĉútim, mímun raꞌ chimeꞌ soꞌmac vaꞌtacdyeꞌ. 4Jenꞌ jam yiristum vaꞌtacdyeꞌ soꞌmin, muꞌ tacaꞌ dyichjibun juchaj mi ĉaĉaij na muꞌ där ñịbeꞌ ĉun mi. Meꞌ tsanꞌ meꞌ ñịbeꞌ ĉun mi, mi qui namꞌ ĉụiꞌ äcäijjepte Jenꞌsiꞌ mạꞌjitidyes muꞌ, mijam mạꞌjeꞌ jụjjete mi. ¿Jam adac chịj mi muꞌ Jenꞌ jambiꞌ vaꞌtacdyeꞌ soꞌmin mi, ĉaĉaij na muꞌ tacaꞌ bisin paj qui mi camanꞌ farajjebanꞌ juchaj mi? 5Mi yäcäty ĉojtyiꞌ, mijam méquiꞌ mạꞌjeꞌ farajjeꞌ juchaj mi, yejĉoij mọmoꞌ dụriꞌñejijcaiꞌ juchaj mi. Därsiꞌ raꞌ vaꞌtacdyeꞌ tŝútyin mi aty ayijyaꞌ mọꞌ tupudyeꞌ, Jenꞌ soꞌmacsiyaꞌ raꞌ därsiꞌ tsäquiꞌsis muntyidyes in. Muꞌ raꞌ jam cäj soꞌmacsi vaꞌtacdyeꞌ, 6junꞌ junꞌ chuc bäꞌyi jiquej in, meꞌ meꞌ raꞌ soꞌmac in, pạrej raꞌ bijodyeꞌ soꞌmac in, pạrej na raꞌ tsäquiꞌsisĉan jịjcaij in. 7Pạrej muꞌyaꞌ jẹjcaiꞌ rụij bäꞌyi in, fer dyijtuiꞌ jämꞌsiꞌ jedyeꞌ in, mạꞌjeꞌ soꞌmac bijodyeꞌ Jenꞌyaꞌ in, judyeyaꞌ muꞌsiꞌcheꞌ mạijquedyeꞌ bäꞌyi in mạyedyeꞌcheꞌ. Muꞌin meꞌ dyijyity in, Jenꞌ raꞌ yụꞌtacsi paj qui muꞌyaꞌ bäꞌyi in. 8Yoctyiꞌ na jam meꞌ in, muꞌin ĉụiꞌ mọmoꞌ dyijtuti in, judyeyaꞌ vaꞌquequeꞌ in räj rụijsis p̂eyacdyeꞌ in, aꞌc̣his qui cäc̣häꞌchuiꞌ in. Jenꞌ raꞌ fạ́codyeꞌtum soꞌmacsi tsäquiꞌsis muꞌin meꞌtyity in. 9Jenꞌ raꞌ räj ñịbeꞌ jịꞌcavacsi muꞌin meꞌtyity in, tashcheꞌ raꞌ muꞌin judío in judyeyaꞌ jäquiꞌve raꞌ muꞌin jam judío in. 10Yocdye raꞌ muꞌin rụij bäꞌyity in, Jenꞌ raꞌ muꞌ timaꞌcacsi, muꞌ raꞌ soꞌmacsi jämꞌyedyedyes muꞌin judyeyaꞌ maꞌjodyeꞌ ĉojtyiꞌĉandyes muꞌin, räj raꞌ mọꞌ soꞌmac in, muꞌin chum raꞌ judío in, judyeyaꞌ muꞌin jam judío chimeꞌ in, 11ĉaĉaij na muꞌ Jenꞌ vaj cäts cạvacsi úchety muntyiꞌ in, muꞌ raꞌ vaj cäts jịꞌcäts yụꞌtacsi.
12Muꞌin jam judío in jam meꞌchupte in Jenꞌsiꞌ yụꞌtacdyeꞌ muꞌ, meꞌ tsanꞌ meꞌ juchaij qui namꞌ jụijyaꞌ in, tsäquiꞌsisĉandyety raꞌ in. Meꞌdye chimeꞌ muꞌin judío in, meꞌchuptety tsanꞌ in Jenꞌsiꞌ yụꞌtacdyeꞌ muꞌ, juchaij jụijyaꞌ in, chimeꞌ raꞌ tsäquiꞌsisĉandyety in, mọꞌ yụꞌtacdyeꞌ mọꞌ raꞌ muꞌin jiꞌmeꞌtacsiꞌ. 13Muꞌin seꞌveptety mọmoꞌ in mọꞌ yụꞌtacdyeꞌ muꞌ, mọꞌ jam tupuj rụij yụꞌtacsiꞌ Jenꞌsiꞌyaꞌ vej muꞌ, meꞌdye muꞌin mọmoꞌ chiqueptety in Jenꞌsiꞌ yụꞌtacdyeꞌ muꞌ, muꞌin raꞌ rụij yụꞌtac in. 14Muꞌin jam judío in, meꞌ tsanꞌ jam meꞌchupte in Jenꞌsiꞌ yụꞌtacdyeꞌ muꞌ, muꞌin qui namꞌ ĉụiꞌtyiꞌĉan ĉojtyiꞌ ĉụiꞌ chiquebiꞌ jụijyaꞌ in dyijyedyeꞌ yụꞌtacdyes mọꞌ, mọꞌyaꞌ chị́jaꞌ muꞌin ĉụiꞌ chịj ĉojtyiꞌĉan in jedyeꞌ buty jämꞌ judyeyaꞌ jedyeꞌ buty jam jämꞌ. 15Anicdye meꞌ, ĉaĉaij na rụij bäꞌyi jụijyaꞌ in, jam jiꞌyoquiti ĉojtyiꞌĉan muꞌin, ac̣hiꞌ qui namꞌ bäꞌyi jụijyaꞌ in, jiꞌyoquiti ĉojtyiꞌĉan muꞌin. Mọꞌ anic jorojĉanyiꞌ meꞌ tsanꞌ jam meꞌchupte in Jenꞌsiꞌ sánacdyeꞌ muꞌ, mọꞌyaꞌ qui namꞌ muꞌsiꞌ yụꞌtacdyeꞌ ĉojtyiꞌĉan muꞌin. 16Meꞌ raꞌ mọꞌ shupquiꞌ aty ayijyaꞌ tupudyeꞌ, mọꞌ p̂eyes Jenꞌsiꞌ p̂eyacdyeꞌ muꞌ voroꞌtacsis yụ, mọꞌ yiꞌ junꞌ chuc muꞌ Jesucristo jịꞌcäts yụꞌtacsi räj muntyiꞌ in juchadyeꞌyaꞌ muꞌin, ĉaĉaij na meꞌdye jayuꞌti muꞌ Jenꞌ. Meꞌ tsanꞌ caminsis dyijyedyeꞌ muꞌin, muꞌ qui namꞌ räj chị́yacsebi, mọꞌ raꞌ chimeꞌ jịꞌcäts yụꞌtacsebi.
Judío in judyeyaꞌ Jenꞌsiꞌ yụꞌtacdyeꞌ muꞌ
17Miꞌin vaꞌbunyity miꞌin, yi jítidyeij miꞌin: "Tsun nash judío, tsun meꞌchupja Jenꞌsiꞌ yụꞌtacdyeꞌ muꞌ, anic Jenꞌtyiꞌ tsun", yi miꞌin. 18Chimeꞌdye yi miꞌin: "Tsun judío anic jämꞌ chị́yepja Jenꞌsiꞌ dyijyedyeꞌ muꞌ, tupuj tsun chị́yejaꞌ jedyeꞌ chuc jämꞌsiꞌ judyeyaꞌ jedyeꞌ chuc jam jämꞌsiꞌ, ĉaĉaij na Jenꞌsiꞌ yụꞌtacdyeꞌ muꞌ mọꞌ jiꞌchäquiyisinꞌ tsun", yi miꞌin. 19Chimeꞌdye yi miꞌin: "Tsun tupuj jịꞌchiyacsejaꞌ muꞌin tofej buꞌyity in, jam meꞌchuptety in Jenꞌsiꞌ p̂eyacdyeꞌ muꞌ, tupuj chimeꞌ mạijchucsebijaꞌ ĉojtyiꞌ muꞌin, muꞌin tojmadyeꞌĉan bäꞌyity in. 20Tsun jịꞌchiyacsejaꞌ chimeꞌ muꞌin jam dyijyedyeꞌtumtyiꞌ in judyeyaꞌ muꞌin jam jịꞌchiyactyiꞌ in, ĉaĉaij na tsun räj mọꞌ meꞌchupja Jenꞌsiꞌ yụꞌtacdyeꞌ muꞌ, mọꞌ meꞌchuiꞌsiꞌ rụijsis jiꞌchäyitidyeꞌ", meꞌ yi jítidyeij vaj meij miꞌin. 21Miꞌin meꞌ yoctyiꞌ jịꞌchiyacsi miꞌin, ¿junꞌ dash jam ĉụiꞌ jiꞌchäyiti miꞌin? Miꞌin jéyacsi voroꞌyedyeꞌyaꞌ miꞌin, yi miꞌin: "Jam raꞌ shuꞌaij miꞌin." ¿Junꞌ qui dash ĉaĉaij meꞌ jämꞌtaqui miꞌin shuꞌaij miꞌin? 22Chimeꞌdye jéyacsi muntyiꞌ miꞌin: "Jam raꞌ voꞌvoij miꞌin." ¿Junꞌ qui dash ĉaĉaij meꞌ jämꞌtaqui voꞌvoij miꞌin? Chimeꞌdye äcäijjeyacsebi miꞌin jämꞌtacdyeꞌ muꞌin. ¿Junꞌ qui dash ĉaĉaij meꞌ shuꞌatucsi miꞌin acaꞌĉansiꞌ jedyeꞌ jämꞌtacdyes muꞌin? 23Där vaꞌbunyi miꞌin, yi miꞌin: "Tsun judío tsun nash meꞌchupjaty Jenꞌsiꞌ yụꞌtacdyeꞌ muꞌ", yi miꞌin, ĉụiꞌ mọmoꞌ yi miꞌin jam na chiquetiñeꞌ, meꞌdye jiꞌtaretinte mọmoꞌ Jenꞌ muntyisyaꞌ vej muꞌin, meꞌ buꞌyi mọꞌ shupquiꞌ, anic moch vaꞌquecbitinte yụꞌtacdyeꞌ muꞌ. 24Jeshaꞌ miꞌin mọꞌ jiꞌjäcnac mọꞌ sánacdyeꞌ yiꞌ: "Muꞌin jam judío in ñiñete Jenꞌ in, miꞌindyes jiꞌmeꞌtacdyeꞌ mọꞌ shupquiꞌ", yiꞌ sánacdyeꞌ Jenꞌsiꞌ muꞌ.
25Chiquepja Jenꞌsiꞌ yụꞌtacdyeꞌ jụijyaꞌ tsun, chat q̂uinꞌdyemꞌ yaꞌiꞌ shupquiꞌ mọꞌ jiꞌseiꞌtacdyeꞌ aꞌsiꞌ tsun. Jam na jụijyaꞌ meꞌ chiquepja mọꞌ yụꞌtacdyeꞌ muꞌ, jam jedyedyes mọꞌ shupquiꞌ jiꞌseiꞌtacdyeꞌ tsun. 26Jeshaꞌ, muꞌ jam judío, meꞌ tsanꞌ jam seiꞌtactyiꞌ aꞌ jụijyaꞌ muꞌ, chiquepte qui namꞌ Jenꞌsiꞌ yụꞌtacdyeꞌ jụijyaꞌ muꞌ, jeñej buꞌyi seiꞌtactyiꞌ aꞌ, meꞌ buꞌyi shupquiꞌ Jenꞌsiꞌyaꞌ vej muꞌ. 27Muꞌin na judío in, meꞌ tsanꞌ seiꞌtac aꞌ muꞌin judyeyaꞌ chimeꞌ meꞌchupte in mọꞌ yụꞌtacdyeꞌ Jenꞌsiꞌ muꞌ, jam qui namꞌ mọꞌ chiqueꞌ in. Mọꞌdyes muꞌin jam judío in, meꞌ tsanꞌ jam seiꞌtactyiꞌ aꞌ muꞌin, chiqueꞌ qui namꞌ jụijyaꞌ in mọꞌ yụꞌtacdyeꞌ, muꞌin meꞌ jorojĉanjeyacsebi juchaj judíos muꞌin. 28Cạveja, yirity muntyiꞌ meꞌ tsanꞌ judío naꞌi jụijyaꞌ, meꞌ tsanꞌ seiꞌtactyiꞌ aꞌ jụijyaꞌ chimeꞌ, mọꞌ jam junꞌ tupuj paj qui meꞌ anictyity Jenꞌtyiꞌ ạvaꞌ shupqui. 29Muꞌ anictyity Jenꞌtyiꞌ ạvaꞌ muꞌ, muꞌ nash cäc̣häꞌchutety Jenꞌ ĉojtyiꞌĉan muꞌ. Muꞌ anictyity ạvaꞌ muꞌ jam mọꞌ dyijtuiꞌ paj qui seiꞌtac aꞌ muꞌ yojdyemꞌ yiꞌ Jenꞌsiꞌ yụꞌtacdyeꞌ muꞌ, mọꞌ Jenꞌsiꞌ Ạꞌedyeꞌ muꞌ, mọꞌ nash chiquepte ĉojtyiꞌĉan muꞌ. Muꞌin meꞌtyity in jam maꞌjotac muntyisyaꞌ vej in, meꞌdye Jenꞌ mọmoꞌ maꞌjotacsi.
Currently Selected:
Romaĉantyidyes 2: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
