Romaĉantyidyes 3
3
Judío in meꞌ tsanꞌ ñịbeꞌjeyac in peñi qui namꞌ in
1Yụ raꞌ jéyac: ¿Itŝiꞌ buty jämꞌyedyeꞌ judíos muꞌin judyeyaꞌ seiꞌtacdyeꞌ chimeꞌ muꞌin? 2Mọꞌyaꞌ qui namꞌ därsiꞌ jämꞌyedyes muꞌin. Jeshaꞌ mọꞌ tashches jämꞌyedyeꞌ muꞌindyes in, ĉaĉaij na muꞌ Jenꞌ yụꞌtyeyacsi p̂eyacdyeꞌ muꞌ jiquej, paj qui mọꞌ meꞌchupte in. 3Meꞌ tsanꞌ mọꞌ meꞌchuiꞌ in, pạrej qui namꞌ muꞌyaꞌ jam chiqueꞌ in. ¿Mọꞌ adac yiꞌ paj qui muꞌ Jenꞌ jam jịꞌcätseꞌ p̂eyacdyeꞌ muꞌ? 4Jenꞌ jam raꞌ junꞌ farajjeyaqui rụijsis dyijyedyeꞌ muꞌ, meꞌ tsanꞌ räj muntyiꞌ in väväjñity shupqui in, jam mọꞌ chiqueꞌ in, tacaꞌdye qui namꞌ Jenꞌ jịꞌcätseꞌ mọꞌ p̂eyacdyeꞌ muꞌ. Mọꞌdye p̂eyeꞌ sánacdyeꞌ yiꞌ:
"Jorojĉan nash rụijsis p̂eyacdyeꞌ mi,
mọꞌ mọmoꞌ p̂eyeꞌ mi rụijsis,
räj jiꞌpenacsim muꞌin ñäñintyiꞌ in", yiꞌ sánacdyeꞌ.
5Jeshaꞌ pạrej na muꞌyaꞌ anic cäj yi in: "Damꞌdye jämꞌ ac̣hiꞌ bäꞌjaꞌ tsun paj qui mọꞌ jorojĉanjepte Jenꞌsiꞌ jämꞌyedyeꞌ muꞌ, junꞌ chuc muꞌ rụijtyity. Mọꞌ juchaj tsun anic jorojĉanjeyacsiꞌ muntyiꞌ in junꞌ chuc muꞌ mujuꞌchaꞌ rụijtyity. Meꞌ jụijyaꞌ shupquiꞌ juchaj tsun, Jenꞌ raꞌ jam junꞌ tupuj vaꞌtacdyeꞌ soꞌmisinꞌ juchadyes tsun", pạrej meꞌ muntyiꞌ yi in, muntyis dyijyedyeꞌ jiꞌjäcacsebi yụ. 6Jam nash meꞌ, cäj nash mọꞌ. Meꞌ jụijyaꞌ, a vuty jam rụijtyity muꞌ u, a vuty jam vaꞌtacdyeꞌ soꞌmacsi u juchajtumtyiꞌ muntyiꞌ in.
7Chimeꞌdye pạrej meꞌ yi in: "Meꞌ tsanꞌ väñäyejaꞌ jụijyaꞌ tsun, Jenꞌ qui na ramꞌ jam junꞌ jätäjjisinꞌ mijam raꞌ soꞌmisinꞌ vaꞌtacdyeꞌ muꞌ, mọꞌ väñädyeꞌ tsun jorojĉanjepte rụijquedyeꞌ Jenꞌsiꞌ muꞌ, ĉaĉaij na muꞌ anic rụij p̂eyaquity", pạrej meꞌ yi in. 8Chimeꞌdye yi in: "Damꞌdye jämꞌ aꞌc̣his bäꞌjaꞌ paj qui mọꞌ jorojĉanjepte Jenꞌsiꞌ jämꞌyedyeꞌ muꞌ, paj qui timaꞌcac muꞌ", meꞌ yi pạrej vaꞌve p̂eyaqui in. Chimeꞌdye pạrej väñädyeꞌyaꞌ p̂iyin yụ in, yi in: "Muꞌ Pablo meꞌ jịꞌchiyacsi muntyiꞌ in", yi in. Jenꞌ raꞌ soꞌmacsi vaꞌtacdyeꞌ muꞌin väväjñity in muꞌin yity in.
Mijam yirity rụijtyity muntyiꞌ in
9¿Jätäjyejaꞌ buty raꞌ tsun muntyiꞌ? Tsun na judío tsun, ¿dadamꞌ buty mujuꞌchaꞌ jämꞌ buꞌyi Jenꞌsiꞌyaꞌ vej muꞌ, uyaꞌyaꞌ buty miꞌin jam judío? Jam junꞌ meꞌ. A nash yi yụ räj muntyiꞌ juchajtumtyiꞌ in, paj tsanꞌ judío tsun, paj tsanꞌ jam judío in, räj vaj cuts juchaj meꞌchujaꞌ tsun mọꞌ bächäsinꞌ. 10Yiꞌ sánacdyeꞌ:
"¡Itŝij méquity rụijtyity muꞌyaꞌ muntyiꞌ, mijam yirity!
11Mijam yirity dyijyity Jenꞌcheꞌ,
mijam yirity quevte Jenꞌ.
12Räj muntyiꞌ murujrutyete Jenꞌ in,
mijam yirity rụij bäꞌyity in,
räjenꞌ ac̣hiꞌyacñity in,
mijam yirity vaꞌ in.
13Anic mọmꞌ aꞌc̣his p̂eyacdyeꞌ jiꞌshupqueꞌ in,
mọꞌ chụꞌĉansiꞌ p̂eyacdyeꞌ muꞌin jeñej säñity muntyiꞌ jam rudyuꞌtactyiꞌ ĉụiꞌ focoij,
meꞌ buꞌyiꞌ mọꞌ shupquiꞌ.
Nem muꞌin väñädyeꞌ dạques muꞌin,
anic ĉätiꞌ p̂eyacdyeꞌ muꞌin,
jeñej nassiꞌ ĉätinꞌdyeꞌ muꞌ,
14yedyej aꞌc̣his ñinacdyeꞌ p̂eyeꞌ in.
15Mạꞌjeꞌ q̂uinꞌdye mọmoꞌ chucsi muntyiꞌ in,
mạꞌjeꞌ ijacsi in.
16Junaꞌ ĉụiꞌ jịjcaijyaꞌ in,
joꞌmeiꞌve ñịbeꞌ jịꞌcavacsi in, jiꞌtaracsi in,
17mijam damꞌ jämꞌjibun yụꞌtacsi in,
18mijam chịj irijyi Jenꞌcheꞌ in ĉojtyiꞌĉan muꞌin", yiꞌ sánacdyeꞌ.
19Chị́jaꞌ tsun, mọꞌ yụꞌtacdyeꞌ Jenꞌsiꞌ muꞌ muntyidyes tsun seꞌvepjatydyes tsun, ĉaĉaij na muꞌ Jenꞌ soꞌmisinꞌ tsun. Meꞌ mọꞌ yụꞌtyeꞌ paj qui mọꞌ jiꞌcaviyisinꞌ juchaj tsun räj jacchetysiꞌ muntyiꞌ tsun, paj qui räj c̣huꞌc̣hujaꞌve Jenꞌsiꞌyaꞌ vej muꞌ, meꞌ tsun räj juchajtum shupquejaꞌ Jenꞌsiꞌyaꞌ vej muꞌ, meꞌ meꞌ qui muꞌ Jenꞌ yuꞌtyiyisinꞌ yụꞌtacdyeꞌ muꞌ. 20Meꞌ meꞌ qui jam tyi rụij yụꞌtac Jenꞌsiꞌyaꞌ vej muꞌ, meꞌ tsanꞌ chiqueptety in yụꞌtacdyeꞌ muꞌ, ĉaĉaij na mọꞌ yụꞌtyeꞌ muꞌ Jenꞌ mọꞌ yụꞌtacdyeꞌ paj qui mọꞌ jịꞌchicacdyes mọmoꞌ juchaj tsun.
Anicyedyeꞌyaꞌ tsun Jenꞌ rụij yuꞌsinꞌ
21Q̂uinꞌ chat muꞌ Jenꞌ jorojĉanjisinꞌ mọꞌ junꞌ chuc muꞌ rụij yuꞌsinꞌ muntyiꞌ tsun, meꞌ tsanꞌ jam cäc̣häꞌchupjaty yụꞌtacdyeꞌ muꞌ. Mọꞌdye dyijyedyeꞌ p̂eyeꞌ mọꞌ yụꞌtacdyeꞌ judyeyaꞌ muꞌinsiꞌ chimeꞌ sánacdyeꞌ muꞌin jasoꞌmitity p̂eyacdyeꞌ Jenꞌ jiquej in. 22Muꞌdye Jenꞌ rụij yụꞌtacsi muntyiꞌ in anicyedyeꞌyaꞌ Jesucristocheꞌ in, räj muꞌin anicjetety in, räj muꞌ rụij yụꞌtacsi, anic cäts cạvacsi räj muntyiꞌ in, 23ĉaĉaij na räj juchajtum bäꞌjaꞌ úchety tsun, anic moch buꞌjaꞌ, mijam c̣hẹiꞌyaꞌ buꞌjaꞌ Jenꞌyaꞌ muꞌ mạijquedyeꞌtumtyiꞌyaꞌ Jenꞌ. 24Muꞌ na Jenꞌ fibiꞌyaꞌ ñịbeꞌjisinꞌ rụij yuꞌsinꞌ, ĉaĉaij na muꞌ Cristo Jesús jiyaꞌdyiyibusinꞌ juchaj tsun. 25Jenꞌ yuꞌtyiyisinꞌ tsun muꞌ Jesucristo paj qui jiꞌijate tsundyes paj qui chäshyaꞌ muꞌ yaꞌityibusinꞌ juchaj tsun, anicyejaꞌyaꞌ muꞌcheꞌ tsun. Meꞌ yi muꞌ Jenꞌ jiquej paj qui tupuj chị́jaꞌ junꞌ chuc muꞌ Jenꞌ rụij yụꞌtacsi muꞌin anicjetety Jesucristo in. Tashcheꞌ jiquej muꞌ Jenꞌ dyichjeyacsebi juchaj muntyis muꞌin, jam cavintum vaꞌtacdyeꞌ soꞌmacsi. 26Q̂uinꞌ qui namꞌ muꞌ Jenꞌ yụꞌtaqui ĉụiꞌtyiꞌ Ạvaꞌ muꞌ säñi muntyidyes juchaj, mọꞌ jorojĉanyiꞌ muꞌ anic rụijtyity fạ́quety juchaj. Meꞌ tsanꞌ meꞌ rụijtyity muꞌ, rụij qui namꞌ yụꞌtacsi tyi chuc anicjetety Jesucristo in.
27Aty meꞌ shupquejaꞌ jụijyaꞌ tsun, ¿tupuj buty vaꞌbunyejaꞌ Jenꞌsiꞌyaꞌ vej muꞌ? Jam junꞌ, meꞌ tsanꞌ chiquepja yụꞌtacdyeꞌ muꞌ, jam mọꞌ tupuj jiꞌc̣honsinꞌ tsun, anicyedyeꞌyamꞌ tupuj jiꞌc̣honsinꞌ. 28Mọꞌdyes jorojĉan shupquiꞌ junꞌ chuc muꞌ Jenꞌ rụij yụꞌtacsi muꞌin mọmoꞌ anicjetety in, meꞌ tsanꞌ jam cäc̣häꞌchuptety yụꞌtacdyeꞌ in, anicyedyeꞌyamꞌ muꞌ rụij yụꞌtacsi.
29Yụ raꞌ jéyac, ¿judío buty mọmoꞌ dyijtucsi muꞌ Jenꞌ? Jam, muꞌ Jenꞌ taquenꞌ dyijtucsi. 30Anicdye meꞌ, yirity mọmoꞌ muꞌyaꞌ muꞌ Jenꞌ, muꞌ rụij yụꞌtacsi räj muntyiꞌ in anicyedyeꞌyaꞌ muꞌin, muꞌ rụij yụꞌtacsi judío in anicyedyeꞌyaꞌ muꞌin, judyeyaꞌ muꞌin chimeꞌ jam judío in. 31Pạrej muꞌyaꞌ yéjaꞌ tsun: "Aty rụij yụꞌtac tsun anicyedyeꞌyaꞌ, q̂uinꞌ aty jam mọꞌ jedyedyes yụꞌtacdyeꞌ", yéjaꞌ tsun. Jam meꞌ, ĉaĉaij na meꞌ jịꞌchiqueyacsejaꞌ jedyedyes buty yụꞌtyeꞌ muꞌ Jenꞌ mọꞌ yụꞌtacdyeꞌ.
Currently Selected:
Romaĉantyidyes 3: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
