Romaĉantyidyes 1
1
Pablo sáñeꞌ Romaĉantyidyes in
1Yụ Pablo úñity Jesucristoty muꞌ, yụ sáñeꞌ ọij p̂eyacdyeꞌ miꞌindyes. Muꞌdye Jenꞌ meꞌ tsimꞌtyin yụ judyeyaꞌ yuꞌtyin yụ paj qui jutactyiꞌ muꞌ paj qui voroꞌtacsi yụ jämꞌsiꞌ p̂eyacdyeꞌ muꞌ.
2Urucyaꞌ jiquej muꞌ Jenꞌ tashcheꞌ jéyacsi ọij p̂eyacdyeꞌ muꞌin jasoꞌmitity p̂eyacdyeꞌ jiquej in, muꞌin qui sáñeꞌ in mọꞌ tashches sánacdyeꞌ Jenꞌsiꞌ muꞌ. 3-4Mọꞌ p̂eyacdyeꞌ p̂eijte muꞌ Jesucristo Ayoꞌ tsun, muꞌ Jenꞌtyiꞌ Ạvaꞌ muꞌ. Muntyiꞌ jiquej naꞌiꞌ muꞌ, Davidtyiꞌ vóshiꞌ muꞌ. Därsiꞌyaꞌ ferdyeꞌ muꞌ, muꞌ Jenꞌ vañinjajibun, meꞌ Jenꞌsiꞌ Ạꞌedyeꞌ muꞌ jiꞌchäquiyisinꞌ anictyity Jenꞌtyiꞌ Ạvaꞌ muꞌ.
5Jesucristoyaꞌ muꞌ Jenꞌ ñịbeꞌjin yụ yuꞌtyin yụ, paj qui yụ jutactyiꞌ muꞌ paj qui paiꞌ jéyacsi yụ jacchety muntyiꞌ in: "Anicjemac Jesucristo, chiquemac muꞌ." 6-7Miꞌindyes chimeꞌ ọij p̂eyacdyeꞌ Romaĉantyiꞌ miꞌin, miꞌin mạꞌjeyactyiꞌ Jenꞌyaꞌ, muꞌ fayinac miꞌin paj qui Jesucristoty ñuruꞌtyity shupqui miꞌin. Miꞌindyes sáñeꞌ yụ ọij Romaĉan bäꞌyity miꞌin. Yụ cọdyete Jenꞌ, muꞌ Ạvatusinꞌtyiꞌ tsun judyeyaꞌ muꞌ Jesucristo, Ayoꞌ tsun paj qui muꞌ soꞌminac ñịbeꞌjitidyes muꞌ judyeyaꞌ maꞌjodyeꞌ ĉojtyiꞌĉandyes miꞌin.
Pablo cọdyete Jenꞌ, mạꞌjeꞌ Roma ĉọ́queꞌ
8Tashcheꞌ yụ raꞌ jéyac junꞌ chuc yụ cọdyete Jenꞌ Jesucristoscheꞌ tịj muꞌ, yoshoropaij jéte yụ miꞌindyes ĉaĉaij na paiꞌ bäꞌyity in seꞌvaqui in junꞌ chuc miꞌin aty anicjetinte muꞌ Jenꞌ. 9Yụ räj ĉojtyiꞌĉan yụ úñi Jenꞌdyes yụ, meꞌ voroꞌtacsi yụ p̂eyacdyeꞌ muꞌ mọꞌ p̂eijtes Jenꞌtyiꞌ Ạvaꞌ muꞌ. Muꞌ na Jenꞌ chịj junꞌ chuc yụ cọdacdyeꞌĉan räjĉan cọdyete Jenꞌ yụ miꞌindyes. 10Chimeꞌdye yụ cọdyete Jenꞌ paj qui yụ tupuj ĉọcyac miꞌin Jenꞌ yíyaꞌ, 11ĉaĉaij na fer mạꞌjeꞌ cạveyac miꞌin. Mạꞌjeꞌ yụ jịꞌchiyeyac paj qui dadamꞌ fer buꞌyi ĉojtyiꞌĉan miꞌin. 12Meꞌ raꞌ chat vaj meij buꞌjaꞌ ñútyitiĉaꞌ tsun Jenꞌdyes, ĉaĉaij na vaj meꞌ anicjeja Jenꞌ tsun.
13Yụ mạꞌjeꞌ jịꞌchiqueyeyac miꞌin vojity, daiꞌ quiꞌ tsanꞌ mạꞌjeꞌ ĉọcyac yụ, mọꞌyaꞌ qui namꞌ yiris jedyeꞌ mọꞌ tapchun yụ, mọꞌdyes qui yụ jam tupuj ĉọcyac miꞌin. Dyijyi yụ mạꞌjeꞌ jụj jaꞌyacsi yụ miꞌinĉantyiꞌ chimeꞌ in, yojdyemꞌ yụ u paiꞌ jụj jaꞌyacsi yụ muꞌin jam judío in. 14Yụ anic soꞌmac voroꞌtacdyes räj muntyidyes in, jeñej buꞌyi dévetucsi yụ, meꞌ buꞌyiꞌ mọꞌ yụ, jemoñeꞌ jéyacsi yụ muꞌin bäꞌyedyeꞌĉantyiꞌ in, judyeyaꞌ cäjyaꞌ bäꞌyity in, muꞌin jịꞌchiyactyiꞌ in, judyeyaꞌ jam jịꞌchiyactyiꞌ in, jemoñeꞌ räj jéyacsi yụ. 15Miꞌincheꞌ muñiꞌ chimeꞌ, yụ fer mạꞌjeꞌ jéyac voroꞌtyeyac miꞌin Romaĉantyiꞌ miꞌin jämꞌsiꞌ p̂eyacdyeꞌ Jenꞌsiꞌ muꞌ.
Anic fer buꞌyiꞌ Jenꞌsiꞌ p̂eyacdyeꞌ muꞌ
16Yụ jam damꞌ tsị́catyepte Jenꞌsiꞌ p̂eyacdyeꞌ muꞌ, ĉaĉaij nash yụ chị́yepte mọꞌ nash Jenꞌsiꞌ ferdyeꞌ muꞌ, mọꞌ tupuj jiꞌc̣honacsiꞌ tyi chuc anicjeꞌtyiꞌ in, tashcheꞌ muꞌin judío in judyeyaꞌ muꞌin chimeꞌ jam judío in. 17Ọij jämꞌsiꞌ p̂eyacdyeꞌ Jenꞌsiꞌ muꞌ jiꞌchäquiyisinꞌ tsun junꞌ chuc muꞌ Jenꞌ anicyedyeꞌyaꞌ tsun rụij yuꞌsinꞌ muntyiꞌ tsun, anicyedyeꞌyaꞌ mọmoꞌ muꞌ rụij yuꞌsinꞌ. Mọꞌ sánacdyeꞌ yiꞌ: "Muꞌ rụij yụꞌtactyiꞌ anicyedyeꞌyamꞌ, muꞌ raꞌ Jenꞌyaꞌ bäꞌyi."
Juchaj muntyis in
18Muꞌ mạyedyeꞌchety Jenꞌ soꞌmacsi raꞌ muntyiꞌ in tsäquiꞌsis vaꞌtacdyeꞌ, jụꞌñity chuc ac̣hiꞌ bäꞌyity in jam rụijtyity in. Aꞌc̣hisyaꞌ dyijyedyeꞌ muꞌin ñutschupte in ọij rụijsis p̂eyacdyeꞌ Jenꞌsiꞌ muꞌ. 19Muꞌin meꞌtyity in vaꞌtacdyeꞌ raꞌ cạiꞌ in, tupuj tsanꞌ chịj in muꞌyaꞌ muꞌ Jenꞌ ĉaĉaij na muꞌdye jịꞌchiqueyacsi junꞌ chuc muꞌyaꞌ muꞌ.
20Muꞌ nash anictyity Jenꞌ ferdyeꞌtumtyiꞌ, muꞌ jam jụꞌñisĉan mạyedyeꞌ mọtsity. Meꞌ tsanꞌ jam jorojĉan muꞌ, tupuj qui namꞌ chị́yete in junꞌ chuc muꞌ. Yacchutiꞌyaꞌdye jiquej jämꞌtacyaꞌ ọij jac, meꞌdye q̂uinꞌ, mọꞌin jämꞌtacdyeꞌ muꞌ mọꞌin tupuj jiꞌcaviyisinꞌ tsun muꞌyaꞌ muꞌ anictyity Jenꞌ, mọꞌdyes muntyiꞌ jam junꞌ yi in: "Jam chịj tsun vatyquej muꞌyaꞌ Jenꞌ tsun." 21Meꞌ tsanꞌ chị́yete in muꞌyaꞌ muꞌ Jenꞌ, jam qui namꞌ irijyi muꞌcheꞌ in, mijam yoshoropaij jéte chimeꞌ in, jeñejquiyaꞌ itŝij Jenꞌ ĉọ́te in. Anic fibis shupquiꞌ dyijyedyeꞌ muꞌin, anic tojmaij ĉojtyiꞌ muꞌin, itŝity dyijyedyeꞌ shupqui in. 22Dyijyedyeꞌtum ĉụiꞌ ĉúti in, jam na meꞌ, itŝity dyijyedyeꞌ ĉojtyiꞌĉan shupqui in, 23mọꞌdyes qui mijam irijyi anictyitycheꞌ Jenꞌ in, muꞌ jam säñity, meꞌdye qui jämꞌtacdyeꞌchemꞌ cudyiti in. Jeñej sänꞌdyety muntyiꞌ, joꞌmes mọmoꞌ jämꞌtyeꞌ jämꞌtacdyeꞌ in, mọꞌcheꞌ qui cudyiti in, chimeꞌdye jeñej jaijtyiꞌ in, judyeyaꞌ jebacdyeꞌ in judyeyaꞌ nas chimeꞌ in, joꞌmemes jämꞌtyeꞌ muntyiꞌ in, mọꞌcheꞌ qui cudyiti in.
24Shapudyeꞌyaꞌ muꞌin, Jenꞌ aty jam junꞌ jiꞌdyäcacsebi aꞌc̣his dyijyedyeꞌ muꞌin, farajjeyacsi qui mọmoꞌ paj qui jedyeꞌ ĉụiꞌ mọmoꞌ tsịꞌcas jämꞌtaqui in, där ac̣hiꞌti ĉụiꞌ in yoctyiꞌtum muntyiꞌ in. 25Farajjeꞌ qui in mọꞌ rụijsis p̂eyacdyeꞌ mọꞌ p̂eijtes Jenꞌ, väñädyeꞌ quimꞌ anicjeꞌ in. Aty qui jam cudyibun Jenꞌcheꞌ in, muꞌ räj jämꞌtyety jedyeꞌ, muꞌ räjĉan raꞌ timaꞌcactyiꞌ, muꞌsiꞌcheꞌ qui jämꞌtacdyeꞌ cudyiti in.
26Mọꞌyaꞌ qui tsịcaꞌyis dyijyedyeꞌ muꞌin muꞌ Jenꞌ aty jam junꞌ jiꞌdyäcacsebi dyijyedyeꞌ muꞌin, muꞌ farajjeyacsi mọmoꞌ paj qui jedyeꞌ ĉụiꞌ mọmoꞌ aꞌc̣his jämꞌtaqui in junꞌ chuc mạꞌjeꞌ in. Mọꞌ qui p̂en muꞌin vaꞌquecbite in Jenꞌsiꞌ dyijyedyeꞌ muꞌ, junꞌ chuc jämꞌtac jiquej in, aty qui jam tyushtacsiꞌ sonꞌ in, vaj qui p̂en ĉụiꞌ meꞌtidyeiꞌ in bäꞌyitiꞌ in. 27Meꞌdye muꞌin chimeꞌ sonꞌ in vaꞌquecbite in Jenꞌsiꞌ dyijyedyeꞌ muꞌ, junꞌ chuc jämꞌtac jiquej in, aty qui jam tyushtacsi p̂en in, vaj qui sonꞌ ĉụiꞌ meꞌtidyeij in, jeñejti p̂en in, anic jiyiꞌ aꞌc̣his dyijyedyeꞌ shupquiꞌ muꞌin, vaj sonꞌ mạꞌjitidyeij meꞌtidyeij in. Muꞌin raꞌ ĉụiꞌ vaꞌtacdyety in ĉụiꞌsidyes juchaj muꞌin.
28Muntyiꞌ in jam damꞌ mạꞌjeꞌ dyijtubajte Jenꞌ in, mọꞌdyes qui muꞌ Jenꞌ aty jam junꞌ jiꞌdyäcacsebi aꞌc̣his dyijyedyeꞌ muꞌin, paj qui jedyeꞌ ĉụiꞌ mọmoꞌ aꞌc̣his jämꞌtaqui in. 29Anic jiyiꞌ aꞌc̣his dyijyedyeꞌ muꞌin, yịjyi aꞌc̣his dyijyedyeꞌ muꞌin. Muꞌin mạꞌjeyacsebi yoctyis jedyeꞌ muꞌin, vej meij ac̣hiꞌtidyeij in, judyeyaꞌ jiꞌmeꞌtyeyacsity jedyeꞌ in judyeyaꞌ fạ́cacsity bäꞌyi in. Chimeꞌdye chuchucsaty in, pạrej ijacsity in, judyeyaꞌ väväjñity in. Chimeꞌdye mistacsity in, 30judyeyaꞌ ñiñacsity in, Jenꞌmun chimeꞌ fạ́quete in. Chimeꞌdye muꞌin fạraꞌnacsity in, anic vaꞌbunnaqui in, joꞌmes mọmoꞌ muꞌin dyijtuiꞌ in junaꞌ chuc raꞌ aꞌc̣his jämꞌtaqui in. Chimeꞌdye jam mạꞌjeꞌ chicaqui ĉụiꞌtyiꞌ jenꞌ muꞌin judyeyaꞌ tseꞌ muꞌin. 31Meꞌ yụꞌtaqui p̂eyacdyeꞌ jụijyaꞌ in mijam jịꞌcätsaqui in, mijam chimeꞌ jämꞌjeyacsi muntyiꞌ in, meꞌdye äcäijjeyacsi mọmoꞌ in, jam damꞌ ñịbeꞌ ĉọcsi in, yedyej joꞌmemes aꞌc̣his dyijyedyeꞌ muꞌin. 32Meꞌ tsanꞌ chị́yepte tsanꞌ in Jenꞌsiꞌ dyijyedyeꞌ muꞌ mọꞌ yiꞌsiꞌ: säñi raꞌ muꞌin meꞌ bäꞌyity in, uts na muꞌin jam noiꞌyi in, yejĉoij mọmoꞌ meꞌ bäꞌyi in. Jam memꞌ bäꞌyi in, chimeꞌdye muꞌinmun maꞌjotacsi in muꞌin meꞌ aꞌc̣his bäꞌyity in.
Currently Selected:
Romaĉantyidyes 1: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
