Romaĉantyidyes 15
15
Dyijtucsejaꞌ chätidyeꞌ in, jam raꞌ ĉụiꞌ dyijtutiĉaꞌ
1Tsun fer buꞌjaꞌtyiꞌ Jenꞌdyes tsun, jemoñeꞌ tsun nọ́tyetacsejaꞌ in muꞌin jam feryity dyijyedyeꞌĉan in. Jam raꞌ ĉụiꞌ mọmoꞌ dyijtutiĉaꞌ tsun, jedyeꞌ chuc mạꞌjejaꞌ tsun, muꞌin ramꞌ nọ́tacsejaꞌ in paj qui rụij bäꞌyi Jenꞌdyes in. 2Jemoñeꞌ meꞌ bäꞌjaꞌ tsun paj qui vaj meꞌ maꞌjotyisinꞌ in chätidyeꞌ tsun, jemoñeꞌ nọ́tyetacsejaꞌ in paj qui feryi buꞌyi Jenꞌdyes in. 3Muꞌ Cristo jam ĉụiꞌsiꞌ dyijyedyeꞌ meꞌchuiꞌ, Jenꞌ muꞌ dyijtute. Mọꞌ p̂eyeꞌ sánacdyeꞌ yiꞌ: "Ñäñinyaꞌ mi jiquej in, mọꞌ ñäñitidyeꞌ muꞌin yụ́cheꞌ tŝọiꞌ", yiꞌ mọꞌ.
4Räj tashcheꞌmunsiꞌ sánacdyeꞌ in mọꞌ Jenꞌ yụꞌtyeꞌ tsundyes paj qui mọꞌ jiꞌchäyisinꞌ tsun. Ọij sánacdyeꞌ jiĉujshaꞌ yuꞌsinꞌ ĉojtyiꞌĉan tsun judyeyaꞌ jiꞌmaꞌyisinꞌ paj qui dyich buꞌjaꞌ bäꞌjaꞌ tsun, paj qui yejĉojaꞌ bisaĉaꞌ Jenꞌdyes tsun. 5Muꞌ Jenꞌ soꞌmisinꞌtyiꞌ dyichchutidyeꞌ tsun judyeyaꞌ jiꞌmaꞌyisinꞌ chimeꞌ, muꞌdye cọdyete yụ paj qui Jesucristos dyijyedyeꞌ cäc̣häꞌchubitinte miꞌin, paj qui vaj cäts dyijyedyeꞌ cạtiñeꞌ miꞌin, 6paj qui vaj yiriꞌyaꞌ timaꞌquetinte muꞌ Jenꞌ, muꞌ Jesucristoty Jenꞌ muꞌ, Ayoꞌ tsun.
Jam judío voroꞌtac in jämꞌsiꞌ p̂eyacdyeꞌ Jenꞌsiꞌ muꞌ
7Jemoñeꞌ vaj meij tiĉunꞌtidyeij miꞌin yojdyemꞌ muꞌ Cristo tiĉunꞌnac u. Meꞌ jụijyaꞌ miꞌin cavinac raꞌ yoctyiꞌ muntyiꞌ in, chat qui raꞌ muꞌin in chimeꞌ timaꞌquete Jenꞌ in. 8Yụ raꞌ jéyac: muꞌ Jesucristo atsij nọ́tyetacseti muꞌin judío in, muꞌ qui jịꞌcätsepte Jenꞌsiꞌ p̂eyacdyeꞌ muꞌ, mọꞌ yụꞌtyeyacsis tashchety vóshiꞌvun jiquej tsun. Mọꞌ jorojĉanyiꞌ muꞌ Jenꞌ räjĉan jịꞌcätseꞌtyiꞌ p̂eyacdyeꞌ muꞌ. 9Atsij muꞌ, nọ́tyetacseti chimeꞌ muꞌin jam judío in, paj qui muꞌin chimeꞌ timaꞌquete Jenꞌ in, ĉaĉaij na muꞌ Jenꞌ ñịbeꞌ ĉọcsi muꞌin in. Mọꞌdye p̂eyeꞌ sánacdyeꞌ yiꞌ:
"Mọꞌyaꞌ raꞌ yụ timaꞌqueye muꞌintum in jam judíotum in,
muꞌintum raꞌ yụ yoshoropaij jéye."
10Yocsiꞌ sánacdyeꞌ yiꞌ:
"Maꞌjovac jam judío miꞌin Jenꞌtyiꞌtum tsimꞌtactyiꞌ muꞌ,
muꞌintum maꞌjovac miꞌin."
11Yocsiꞌ sánacdyeꞌ yiꞌ:
"Timaꞌquemac Jenꞌ räj miꞌin jam judío miꞌin,
paj räj jacchety muntyiꞌ in timaꞌquete Jenꞌ in."
12Chimeꞌdye muꞌ Isaías yi sánacdyeꞌcheꞌ:
"Naꞌi raꞌ yirity vóshiꞌ muꞌ Isaítyiꞌ,
muꞌ raꞌ ayoꞌbuꞌyi jam judíodyes in,
muꞌcheꞌ raꞌ ĉúti in", yiꞌ sánacdyeꞌ.
13Yụ cọdyete muꞌ Jenꞌ muꞌ soꞌmisinꞌtyiꞌ raꞌ mọꞌ bisjaꞌsiꞌ, paj qui muꞌ soꞌminac maꞌjodyeꞌ ĉojtyiꞌĉandyes miꞌin, paj qui anicyedyeꞌyaꞌ Jenꞌcheꞌ miꞌin maꞌjodyeꞌtum bäꞌyi miꞌin. Chimeꞌdye yụ cọdyete muꞌ Jenꞌ paj qui mọꞌ Ạꞌedyeꞌ muꞌ soꞌminac ferdyedyes miꞌin paj qui p̂añi Jenꞌdyes miꞌin räjĉan mạyedyeꞌ.
14Vojity, yụ nash chị́yeyac anic jämꞌyity miꞌin, mijam damꞌ jayej dyijyedyeꞌ miꞌin, chịj miꞌin vaj meij jiꞌchäyitidyeij miꞌin. 15Meꞌ tsanꞌ meꞌ chị́yeyac miꞌin, jam qui namꞌ méquiꞌ jiꞌc̣huꞌc̣hutyeyac yụ ọ́ches sánacdyeꞌches p̂eyacdyeꞌ yụ, yụ quivij jiꞌdyijveyac ọij jiꞌchäyitidyeꞌ. Yụ tupuj meꞌ jéyac miꞌin ĉaĉaij na muꞌ Jenꞌ ñịbeꞌjin yụ judyeyaꞌ meꞌ yuꞌtyin yụ 16paj qui yụ voroꞌtacsi muꞌin jam judío in, meꞌdyes muꞌ jutin yụ muꞌ Jesucristo. Yụ jeñej buꞌyi yirity cudyitity Jenꞌcheꞌ, meꞌ buꞌyi voroꞌtacsi yụ jämꞌsiꞌ p̂eyacdyeꞌ Jenꞌsiꞌ muꞌ. Muꞌin na jam judío in jeñej buꞌyi jiꞌcoꞌshayacdyeꞌ Jenꞌdyes in, mọꞌ soꞌmetes yụ, mọꞌ maꞌjotyes Jenꞌ, meꞌ buꞌyi muꞌin in. Meꞌdye raꞌ muꞌ chimeꞌ tiĉunacsi muꞌin jam judío in, ĉaĉaij na Jenꞌsiꞌ Ạꞌedyeꞌ muꞌ aty c̣hiconꞌtac yụꞌtacsiꞌ muꞌin in.
17Anic maꞌjotyeꞌ yụ carijtacdyeꞌ Jenꞌdyes yụ, ĉaĉaij na aty Jesucristoty yụ 18Meꞌ tsanꞌ meꞌ, jam qui namꞌ timaꞌquiti yụ voroꞌyedyeꞌyaꞌ yụ. Cristosyamꞌ ferdyeꞌ voroꞌtacsi yụ, mọꞌyaꞌ jụj jaꞌyacsi yụ muꞌin jam judío in paj qui muꞌin chiquete Jenꞌ in. Muꞌin seꞌvibun p̂eyacdyeꞌ yụ in, judyeyaꞌ cavibun ferdyeꞌ yụ in, mọꞌ jịꞌcaveyacsis yụ, mọꞌyaꞌ yụ jụj jaꞌyacsi. 19Därsiꞌ ferdyeꞌ soꞌmin yụ Jenꞌsiꞌ Ạꞌedyeꞌ muꞌ paj qui yụ jịꞌcaveyacsi muntyiꞌ in. Paiꞌ voroꞌtacsi yụ jämꞌsiꞌ p̂eyacdyeꞌ Cristos muꞌ, Jerusalénĉan tiyacchuti voroꞌtacsi yụ, räj socoꞌracsi jac yụ paiꞌ muꞌĉaĉan voroꞌtacsi yụ chijämꞌ chaꞌsheꞌ yụ jadyicve jac Iliria, meꞌquiꞌ jịjcaij voroꞌtacsi yụ. 20Mọꞌ nash dyijyedyeꞌ yụ, mạꞌjeꞌ voroꞌtacsi yụ muꞌin jambiꞌ yiriꞌ seꞌveptety in Cristos p̂eyacdyeꞌ muꞌ, aty jam mạꞌjeꞌ voroꞌtacsi yụ muꞌin aty voroꞌtactyiꞌ jiquej in, paj qui jam yoctyischeꞌ voroꞌquedyeꞌ jiꞌjäcacsebi yụ. Meꞌ jụijyaꞌ yụ, jeñej yoctyis carijtacdyeꞌ ĉụiꞌsitucsebi yụ. 21Meꞌ nash mạꞌjeꞌ yụ paj qui jịꞌcätseꞌ sánacdyeꞌ Jenꞌsiꞌ muꞌ, mọꞌ yiꞌ:
"Muꞌin jam yiriꞌ seꞌvaquity in p̂eijteyaꞌ in,
muꞌin raꞌ naijti in,
judyeyaꞌ muꞌin jam yiriꞌ seꞌveptety p̂eyacdyeꞌ in,
muꞌin raꞌ seꞌvepte in,
judyeyaꞌ raꞌ chicacsi in", yiꞌ sánacdyeꞌ.
Pablo dyijyi mạꞌjeꞌ Romaĉan jịjcaij
22Daiꞌ quiꞌ tsanꞌ mạꞌjeꞌ ĉọcyac miꞌin, mọꞌ qui namꞌ voroꞌyedyeꞌ yụ tapchun yụ. 23Daiꞌ yómodyeꞌ mạꞌjeꞌ tsanꞌ cạvecyac, q̂uinꞌ chat aty tas ujaij yụ ọ́yas voroꞌyedyeꞌ yụ, 24muꞌve qui raꞌ yụ cạvecyac, meꞌ dyijyi yụ. Ọij dyijyedyeꞌ yụ: mạꞌjeꞌ yụ cạvemcayac miꞌin aty raꞌ Españave jịjcaijyaꞌ yụ, mendye raꞌ miꞌintum bäꞌyi yụ, miꞌintum raꞌ maꞌjoij yụ. Aty raꞌ sacjebanꞌyaꞌ yụ, miꞌin raꞌ ñútyitiĉaꞌ miꞌin paj qui yejĉoij Españave jịjcaij yụ. 25Tashcheꞌ chum raꞌ Jerusalénĉan jịjcaij yụ, jiquiyacsequi raꞌ querec̣ha yụ muꞌin anicjetetydyety Jenꞌ in. 26Muꞌ querec̣ha dyimacdyeꞌ yụꞌtety in muꞌin Macedoniaĉantyiꞌ anicjetety Jenꞌ in judyeyaꞌ muꞌin Acayaĉantyiꞌ in. Muꞌin dyijyi in mạꞌjeꞌ dyimꞌte in Jerusalénĉantyidyety Jenꞌyaꞌ ñuruꞌtyity in, muꞌin jayejjotaquity jedyeꞌ in. 27Uts jam judío in ĉụiꞌsiꞌyaꞌ dyijyedyeꞌ muꞌin yụꞌte in judíodyety in. Anic där jämꞌsiꞌ shupquiꞌ dyijyedyeꞌ muꞌin jam judío in, tupuj muꞌin nọ́tacsi in muꞌin judío in, muꞌin jam judío in tupuj soꞌmacsi in aꞌdyes jedyeꞌ muꞌin judío in, ĉaĉaij na muꞌin judío in tashcheꞌ jiquej nọ́tyetacsi muꞌin jam judío in, soꞌmacsi ạꞌedyedyes jedyeꞌ muꞌin, mọꞌ p̂eyacdyeꞌ Jenꞌsiꞌ muꞌ. 28Muꞌ querec̣ha yụ raꞌ jiquiyacsequi muꞌin Jerusalénĉantyiꞌ in, aty meꞌsiꞌ chat q̂uinꞌdyemꞌ raꞌ sacjebanꞌ yụ Españave qui raꞌ jịjcaij yụ, tupuj raꞌ cạvemcayac miꞌin. 29Chịj yụ aty raꞌ ventyecyac jụijyaꞌ yụ, Cristo raꞌ soꞌmin yụ därsiꞌ nọ́tacdyeꞌ paj qui yụ jiꞌjiyeyac mọꞌ jiꞌchäyitidyeꞌ.
30Vojity, tsun vaj cäts anicjejaty Jesucristo, Ayoꞌ tsun, judyeyaꞌ Ạꞌedyeꞌ muꞌ vaj cäts soꞌmisinꞌ mạꞌjitidyes muꞌ, mọꞌdyes yụ jéyac paj qui yiriꞌyaꞌ yụ́tum miꞌin fercheꞌ cọdyetinte Jenꞌ yụ́dyesiꞌ. 31Cọdyemac miꞌin muꞌ Jenꞌ paj qui muꞌ ñutsjityin yụ, paj qui jam meꞌjin yụ in muꞌin jam anicjetety Jenꞌ in Judeaĉantyiꞌ in. Chimeꞌdye cọdyemac Jenꞌ muꞌindyes in Jerusalénĉantyidyes anicjetety Jenꞌ in, paj qui muꞌin rụijsisyaꞌ dyijyedyeꞌ maꞌjotyete in muꞌ querec̣ha cạyacsity yụ. 32Meꞌ raꞌ, aty raꞌ meꞌsiꞌ jiquiyacsequiyaꞌ yụ, Jenꞌ yíyaꞌ yụ raꞌ maꞌjodyeꞌtum ĉọcyac miꞌin, miꞌinyaꞌ raꞌ damꞌ jịꞌjutyimcabun yụ. 33Yụ nash cọdyete Jenꞌ, muꞌ soꞌmisinꞌtyiꞌ maꞌjodyeꞌ ĉojtyiꞌĉandyes tsun, paj qui muꞌdye räj penꞌdyetunac miꞌin. ¡Paj meꞌ!
Currently Selected:
Romaĉantyidyes 15: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
