Romaĉantyidyes 16
16
Pablo vorjeyacsi muꞌin Romaĉan bäꞌyity in
1Tiĉunꞌvac mọꞌ vojiꞌ tsun Febe, mọꞌ Cencreaĉan bäꞌyis, mọꞌ mọꞌĉan nọ́tyetacsis muꞌin anicjetety Jenꞌ in. 2Jämꞌ tiĉunꞌvac miꞌin Ayoꞌsiꞌcheꞌ tịj muꞌ, yojdyemꞌ tsun anicjejaty Jenꞌ u vaj meꞌ tiĉunꞌtiĉaꞌ tsun. Nọ́tyevac chimeꞌ jedyeꞌ chuc mọꞌ jemoñeꞌ jụijyaꞌ, mọꞌ soꞌmevac miꞌin, ĉaĉaij na mọꞌ daiꞌ nọ́tyetacsis judyeyaꞌ yụ́mun chimeꞌ ñútyin.
3Yụ nash vorjeꞌ mọꞌ Priscila judyeyaꞌ muꞌ Aquila, muꞌin úñity Jesucristodyes in yụ́tum in. 4Muꞌin nash anic ñutsjityin yụ in, araj ijac in ñutsjitidyeꞌyaꞌ yụ́cheꞌ in. Mọꞌdyes yụ fer yoshoropaij jéyacsi muꞌin in, jam yụ mọmoꞌ meꞌ yoshoropaij jéyacsi, chimeꞌdye muꞌin räj jam judío in, muꞌin ñuruꞌtyity Cristoyaꞌ in, muꞌin yoshoropaij jéyacsi chimeꞌ in. 5Chimeꞌdye yụ vorjeyacsi muꞌin anicjetety Jenꞌ in, vajmuꞌyaijtyiꞌ in muꞌinsiꞌĉan acaꞌ in Priscilasĉan mọꞌ judyeyaꞌ Aquilasĉan. Vorjete yụ chimeꞌ muꞌ Epeneto, muꞌ mạꞌjeyacdyety yụ, muꞌĉan bäꞌyity mọꞌ jacsiꞌ tịj mọꞌ Asia, muꞌ tashcheꞌ anicjete Cristo Asiaĉantyiꞌ. 6Vorjeꞌ yụ mọꞌ María, mọꞌ fer úñis ñútyinacsiꞌ miꞌin. 7Yụ vorjeyacsi chimeꞌ muꞌin chätidyeꞌ yụ judío in, muꞌ Andrónico judyeyaꞌ muꞌ Junias, muꞌin penꞌdyetuntyiꞌ jiquej yụ in ĉärꞌtaquisĉan jiquej. Muꞌin chimeꞌ cạyacsity p̂eyacdyeꞌ Jenꞌsiꞌ in, anic jämꞌ chị́yactyiꞌ in, muꞌin tashcheꞌ anicjete Cristo jiquej in, jäquiꞌve yụ.
8Vorjete yụ muꞌ chimeꞌ Ampliato, muꞌ mạꞌjeyacdyety yụ Jenꞌyaꞌ. 9Chimeꞌdye vorjete yụ muꞌ Urbano, muꞌ nash úñi Cristodyes yụ́tum. Vorjete yụ chimeꞌ muꞌ Estaquis, muꞌ nash chimeꞌ mạꞌjeyacdyety yụ. 10Vorjete yụ chimeꞌ muꞌ Apeles, muꞌ jorojĉan jiꞌcavitity muꞌ nash anictyity cäc̣häꞌchutety Cristo. Chimeꞌdye yụ vorjeyacsi muꞌin chätidyeꞌ in muꞌ Aristóbuloty. 11Vorjete chimeꞌ yụ muꞌ Herodión, judío chimeꞌ chätidyeꞌ yụ. Yụ chimeꞌ räj vorjepte Narcisoty chätidyeꞌ muꞌ ọijcheꞌ voryedyeꞌcheꞌ, muꞌin anicjetety Ayoꞌ in. 12Chimeꞌdye vorjeyacsi yụ mọꞌin Trifena judyeyaꞌ mọꞌ Trifosa, mọꞌin nash úñiꞌ in Ayodyes. Vorjeꞌ yụ chimeꞌ mọꞌ Pérsida mạꞌjeyacdyes yụ, mọꞌ nash fer úñiꞌ Ayodyes. 13Chimeꞌdye vorjete yụ muꞌ Rufo, muꞌ mujuꞌchaꞌ úñity Ayodyes, chimeꞌdye tseꞌ muꞌ vorjepte yụ, mọꞌ nash jeñej buꞌyiꞌ ĉụiꞌsiꞌ tseꞌ yụ, meꞌ mọꞌ ñútyin yụ jiquej. 14Muꞌin chimeꞌ vorjeyacsi yụ Asíncrito, judyeyaꞌ muꞌ Flegonte, muꞌ Hermas, muꞌ Patrobas, muꞌ Hermes, judyeyaꞌ yoctyiꞌ muꞌĉantyiꞌ anicjetety Jenꞌ in penꞌdyetucsity in. 15Chimeꞌdye muꞌin vorjeyacsi yụ muꞌ Filólogo Juliatumdyeꞌ, judyeyaꞌ muꞌ Nereo vojiꞌtumdye muꞌ, judyeyaꞌ Olimpas, judyeyaꞌ räj muꞌin yoctyiꞌ anicjetety Jenꞌ in penꞌdyetucsity muꞌin in.
16Vorjitac vaj meij voryedyeꞌ pụꞌsitidyeꞌ Jenꞌdyes. Muꞌin ñuruꞌtyity Cristoyaꞌ in paiꞌ bäꞌyity in vorjinac chimeꞌ in.
17Vojity, yụ jéyac pạrej muꞌyaꞌ muꞌin queveꞌ in paj qui vaj meij fáquitidyeij bäꞌyi miꞌin anicjetintety Jenꞌ, muꞌin mạꞌjeꞌ jiꞌyacchuyinac in Jenꞌsidyes p̂eyacdyeꞌ muꞌ. Muꞌin fáquibunactyiꞌ jiꞌchäyitidyeꞌ in, mọꞌ seꞌvetiñes. Yụ fercheꞌ jéyac doijrojamꞌ bäꞌjamꞌ paj qui jam seꞌ jaꞌyinac in. Jemoñeꞌ miꞌin meijyi muꞌinyaꞌ in, 18ĉaĉaij na muꞌin jam Jesucristo Ayoꞌ tsun cäc̣häꞌchute in, ĉụiꞌsimꞌ dyijyedyeꞌ aꞌc̣his cäc̣häꞌchuqui in. Meꞌ tsanꞌ cäjsis jiꞌchäyitidyeꞌ muꞌin, anic jämꞌ buꞌyiꞌ dạqueꞌ in mọꞌ p̂eyacdyeꞌ muꞌin, paj qui mọꞌyaꞌ väñätucsi in muꞌin jam chịjtyiꞌ muntyiꞌ in. 19Yụ anic maꞌjotyebiyac mọꞌ dyijyedyeꞌ miꞌin, ĉaĉaij na paiꞌ bäꞌyity in aty chäyinac in junꞌ chuc miꞌin cäc̣häꞌchubitinte mọꞌ jämꞌsiꞌ p̂eyacdyeꞌ Jenꞌsiꞌ muꞌ. Yụ qui namꞌ mạꞌjeꞌ paj qui dyijyedyeꞌtum cäc̣häꞌchutiñeꞌ jämꞌsiꞌ jedyeꞌ, jam mạꞌjeꞌ yụ paj qui aꞌc̣his cäc̣häꞌchutiñeꞌ miꞌin. 20Muꞌ Jenꞌ soꞌmisinꞌtyiꞌ maꞌjodyeꞌ ĉojtyiꞌĉandyes tsun, muꞌ raꞌ cavintum cac̣hjete muꞌ Sọyoꞌ Satanás, meꞌquiꞌdye raꞌ fer buꞌyi miꞌincheꞌ. Yụ cọdyete Jenꞌ paj qui muꞌ Jesucristo Ayoꞌ tsun ñịbeꞌjitidyes soꞌminac miꞌin.
21Uts Timoteo, úñi Jenꞌdyes yụ́tum, muꞌ vorjinac miꞌin. Chimeꞌdye muꞌin vorjinac in muꞌ Lucio judyeyaꞌ muꞌ Jasón judyeyaꞌ muꞌ Sosípater, muꞌin nash chätidyeꞌ yụ judío in, muꞌin vorjinac chimeꞌ in.
22Yụ nash Tercio sáñeꞌtyiꞌ yụ ọij q̂uinꞌ p̂eyacdyeꞌ, Pablo jiꞌsañiyin yụ, yụ nash vorjeyac Ayoꞌsiꞌcheꞌ tịj muꞌ.
23-24Chimeꞌdye uts Gayo vorjinac miꞌin, yóĉandyemꞌ dyäquiĉan q̂uinꞌ uij. Muꞌsiꞌĉan acaꞌ vajmuꞌyaij in muꞌin anicjetety Jenꞌ in. Muꞌ Erasto chimeꞌ vorjinac miꞌin, muꞌ ĉọjcacsebity querec̣ha bäꞌyedyeꞌĉantyity muꞌin. Muꞌ vojity tsun Cuarto muꞌ vorjinac chimeꞌ miꞌin.
Jadyiquis timaꞌcacdyes Jenꞌ
25¡Timaꞌqueja muꞌ Jenꞌ! Muꞌ ferdyeꞌtumtyiꞌ, muꞌ tupuj fer buꞌyi yuꞌtyinac paj qui rụij cäc̣häꞌchubitinte jämꞌsiꞌ p̂eyacdyeꞌ muꞌ, mọꞌ voroꞌtacsis yụ, mọꞌ p̂eijtes Jesucristo. Ọij p̂eyacdyeꞌ jam mụiꞌsis, tạꞌcas jambiꞌ qui namꞌ chị́yac. 26Q̂uinꞌ qui namꞌ muꞌ Jenꞌ aty jiꞌchäquiyisinꞌ muntyiꞌ tsun ọij p̂eyacdyeꞌ muꞌ, muꞌin sáñepte in muꞌin jasoꞌmitity p̂eyacdyeꞌ Jenꞌ in. Muꞌ räjĉan buꞌyity Jenꞌ, muꞌ jutacsi paj qui voroꞌtacsi in paj qui paiꞌ úcheꞌ jaccheꞌ bäꞌyity in seꞌvaqui in paj qui muꞌin chimeꞌ anicyi in judyeyaꞌ chiquete Jenꞌ in.
27¡Timaꞌqueja muꞌ Jenꞌ, itŝij yoctyiꞌ muꞌyaꞌ meꞌtyity, mumꞌ yirity dyijyedyeꞌtumtyiꞌ, muꞌ räj chị́dyeꞌtumtyiꞌ! Muꞌ jutiyisinꞌtyiꞌ Jesucristo, muꞌyaꞌ qui tupuj timaꞌqueja tsun. ¡Paj jam mọtsiꞌ timaꞌcacdyeꞌ muꞌ!
Currently Selected:
Romaĉantyidyes 16: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
