Romaĉantyidyes 14
14
Jam raꞌ chọcoꞌtacsejaꞌ vojity tsun
1Pạrej muꞌyaꞌ anicjetety Jenꞌ in jambiꞌ qui namꞌ fer buꞌyi bäꞌyi in, tacaꞌ jayej chị́yepte in jiꞌchäyitidyeꞌ Jenꞌsiꞌ muꞌ. Jemoñeꞌ tiĉunacsi miꞌin muꞌin meꞌ dyijyity in, jam qui na ramꞌ chuti p̂eyacdyeꞌyaꞌ miꞌin muꞌintum in. 2Jeshaꞌ, jam vaj cäts dyijyi anicjetety Jenꞌ in, pạrej muꞌyaꞌ yi in tupuj jebejaꞌ räj säcsedyeꞌ in, jụꞌñis ĉụiꞌ mọmoꞌ, muꞌin na jambiꞌ fer buꞌyi bäꞌyi Jenꞌdyes in, yi in jam tupuj jebejaꞌ shush. 3Yụ raꞌ jéyac, tyi chuc jebeiꞌtyiꞌ shush in, paj jam äcäijjeyacsi in muꞌin jam jebeiꞌtyiꞌ shush in, meꞌdye muꞌin chimeꞌ in jam jebeiꞌtyiꞌ shush in, paj jam äcäijjeyacsi in muꞌin jebeiꞌtyiꞌ shush in, ĉaĉaij na muꞌ jebeiꞌtyiꞌ aty jụjjeyac Jenꞌyaꞌ. 4Miꞌin jam tupuj ñiñebitinte yoctyity úñity muꞌ, ĉụiꞌtyiꞌdye raꞌ ayoꞌ muꞌ cạvacsebi dyijyedyeꞌ muꞌ, areꞌ jämꞌsiꞌ, areꞌ jam. Meꞌdye miꞌin chimeꞌ, jam raꞌ c̣họcoꞌtacsi miꞌin yoctyiꞌ in, jedyeꞌ chuc jebeiꞌ in, muꞌin räj Ayoꞌtyiꞌ úñity muꞌ, muꞌ Ayoꞌ ferdyeꞌtumtyiꞌ, muꞌ raꞌ fer buꞌyi yụꞌtacsi paj qui jam peñi in.
5Chimeꞌdye muꞌyaꞌ pạrej anicjetety Jenꞌ in ạ̈räjjeꞌ in mọꞌ yiris mạyedyeꞌ, pạrej na muꞌyaꞌ in jam ạ̈räjjeꞌ in mọꞌ yiris mạyedyeꞌ, vaj cäts mọmoꞌ ĉọiꞌ in yojdyemꞌ yocsiꞌ mạyedyeꞌ o in. Tupuj tsun ạ̈räjjejaꞌ chimeꞌ mọꞌ yiris mạyedyeꞌ, chimeꞌdye jam ạ̈räjjejaꞌ, jam mọꞌ jedyeꞌ yiꞌ mijam juchaj, jemoñeꞌ qui namꞌ ĉụiꞌsisiꞌ ĉútidyeꞌ ĉojtyiꞌĉansiꞌ dyijyedyeꞌ miꞌin, jam raꞌ yocve dyijyi miꞌin. 6Tyi chuc ạ̈räjjeꞌtyiꞌ mọꞌ mạyedyeꞌ, Ayodyes muꞌ ạ̈räjjeꞌ, muꞌ dyijtute. Meꞌdye chimeꞌ tyi chuc jebeiꞌtyiꞌ shush, Ayodyes säcsi muꞌ, mọꞌyaꞌ muꞌ dyijtute Ayoꞌ, ĉaĉaij na muꞌ yoshoropaij jéte Jenꞌ. Meꞌdye muꞌ chimeꞌ tyi chuc jam jebeiꞌtyiꞌ shush, Ayodyes mọꞌ shupquiꞌ, muꞌ chimeꞌ yoshoropaij jéte Jenꞌ.
7Tsạꞌdyemꞌ tsun, jam ĉụiꞌsiꞌ dyijyedyeꞌ cạjaꞌ tsun, mijam ĉụiꞌsiꞌyaꞌ dyijyedyeꞌ chị́yaĉaꞌ sänꞌdyeꞌ tsun, Ayoꞌsimꞌ dyijyedyeꞌ cạpja tsun. 8Tsạꞌdyemꞌ tsun, Ayoꞌsiꞌ dyijyedyeꞌ cạpja tsun, muꞌsiꞌdye raꞌ dyijyedyeꞌ cạpja tsun sänjaꞌyaꞌ. Mọꞌdyes meꞌ tsanꞌ tsạꞌdyemꞌ tsun, sänjaꞌyaꞌ qui na, tacaꞌdye raꞌ muꞌdyety tsun. 9Meꞌdyes muꞌ Cristo ijac jiquej judyeyaꞌ tsạꞌeban muꞌ, paj qui muꞌdye ayoꞌbuꞌban räjdyes muntyiꞌ tsun, tsạꞌ buꞌyity in judyeyaꞌ säñity in.
10Mọꞌdyes ¿junꞌ dash ñinacsi miꞌin vojity miꞌin? ¿Junꞌ dash meꞌ äcäijjeyacsi miꞌin? Räjenꞌdye nash raꞌ jiꞌcavitiĉaꞌ Jenꞌyaꞌ tsun, muꞌ raꞌ cudyityisinꞌ p̂eyacdyeꞌ tsun, junꞌ chuc bäꞌjaꞌ jiquej tsun. 11Yiꞌ sánacdyeꞌ:
Fersiꞌ p̂eyacdyeꞌ ĉụiꞌsiꞌ yụꞌtaqui yụ, yi muꞌ Ayoꞌ:
Räjenꞌ raꞌ muntyiꞌ in dyụtsyi yụ́yaꞌ in,
timaꞌquin raꞌ yụ in, yi raꞌ in:
"Uts anictyity Jenꞌ", yi raꞌ in.
12Muꞌ raꞌ Jenꞌ cäts yirityityij cudyityisinꞌ p̂eyacdyeꞌ tsun junꞌ chuc bäꞌjaꞌ jiquej tsun úcheꞌ jaccheꞌ.
Jam raꞌ jiꞌyocacsejaꞌ paj jam peñi in vojity tsun
13Ọij jísinꞌ aty jam raꞌ vaj meij p̂iijtiĉaꞌ bäꞌjaꞌ tsun, dadamꞌ jämꞌ dyijtujaꞌ paj qui jam jiꞌyocacsejaꞌ vojity tsun, paj qui jam muꞌin peñi in. 14Yụ nash cäc̣häꞌchutety muꞌ Jesús Ayoꞌ tsun, muꞌ jiꞌchäquiyin yụ räj jacches säcsedyeꞌ jämꞌ jibitidyes in. Pạrej na muꞌyaꞌ vojity in yocve dyijyi in, jeñej jam jämꞌ jibitidyes ĉọiꞌ in mọꞌ säcsedyeꞌ in. Muꞌin meꞌ dyijyi in, mọꞌ jebejaꞌ tsun, mọꞌ ac̣hiꞌsinꞌ tsun, yi in. Muꞌin meꞌ dyijyity in, jebeiꞌ jụijyaꞌ in joꞌmes säcsedyeꞌ, mọꞌ ac̣hiꞌtacsiꞌ shupqui in. 15Meꞌ dyijyity yirity jụijyaꞌ vojity miꞌin, miꞌin qui namꞌ jebetiñeꞌ jụijyaꞌ mọꞌ shush, mọꞌyaꞌ raꞌ jiꞌyoquetinte miꞌin. Meꞌ jụijyaꞌ miꞌin, aty jam jịꞌcaveyetinte mạꞌjitidyes muꞌ. Damꞌdye jämꞌ jam jebetiñeꞌ mọꞌ shush miꞌin paj qui muꞌ jam peñi vojity miꞌin, muꞌdyesiꞌ säñi muꞌ Cristo. 16Meꞌ tsanꞌ jämꞌ shupquiꞌ miꞌintum mọꞌ jebetiñeꞌyaꞌ mọꞌ säcsedyeꞌ, muꞌ qui namꞌ jam jämꞌ ĉọiꞌ vojity miꞌin, areꞌĉa ñäñinac miꞌin mọꞌ jebetiñeꞌ jụijyaꞌ miꞌin. 17Jenꞌ ayoꞌbuꞌyiyaꞌ tsundyes, tsun raꞌ jam mọmꞌ dyijtujaꞌ säcsedyeꞌ judyeyaꞌ tyédyeꞌ tsun, jemoñeꞌ mọmꞌ dyijtuc paj qui rụij bäꞌjaꞌ Jenꞌdyes, judyeyaꞌ dyijtujaꞌ chimeꞌ junꞌ chuc aty jämꞌjitiĉaꞌ Jenꞌtum judyeyaꞌ maꞌjodyeꞌtum bäꞌjaꞌ chimeꞌ ĉaĉaij na meꞌ yuꞌsinꞌ Jenꞌsiꞌ Ạꞌedyeꞌ muꞌ. 18Tyi chuc meꞌ chiquete Cristo jụijyaꞌ, aty Jenꞌ jämꞌ jamaꞌjotyiti, meꞌdye chimeꞌ muntyiꞌ in maꞌjotyete in tyi chuc meꞌ úñity in.
19Mọꞌdyes jemoñeꞌ räjĉan dyijtujaꞌ paj qui jämꞌjitiĉaꞌ vojitytum tsun, paj qui vaj cäts ñútyitiĉaꞌ bäꞌjaꞌ paj qui dadamꞌ yejĉojaꞌ p̂anjaꞌ Jenꞌdyes tsun. 20Mọꞌdyes yụ raꞌ jéyac, jam raꞌ jiꞌyocacsi miꞌin säcsedyeꞌyaꞌ miꞌin, paj jam peñi in Jenꞌtyiꞌ ñuruꞌtyity muꞌ. Anicdye meꞌ, räj säcsedyeꞌ jämꞌ tsanꞌ jibitidyes in, jam qui na ramꞌ jiꞌyocacsi miꞌin säcsedyeꞌyaꞌ, mọꞌ jebetiñes. Meꞌ raꞌ jụijyaꞌ miꞌin, cäj raꞌ cạtiñeꞌ mọꞌ. 21Meꞌ jụijyaꞌ dyijyi vojity miꞌin, jam tupuj jebejaꞌ shush, damꞌdye jämꞌ jam jebetiñeꞌ shush miꞌin, mijam raꞌ tyétiñeꞌ vino miꞌin, mijam raꞌ yocsiꞌ jedyeꞌ jämꞌtiñeꞌ chimeꞌ, paj qui jam mọꞌyaꞌ jiꞌyocacsi miꞌin muꞌin meꞌ dyijyity in, paj qui jam peñi muꞌin in. 22Meꞌ raꞌ tsanꞌ chịj miꞌin räj nash säcsedyeꞌ jämꞌ jibitidyes Jenꞌsiꞌyaꞌ vej muꞌ, jam qui na ramꞌ jebetiñeꞌ miꞌin muꞌinsiꞌyaꞌ vej muꞌin meꞌ dyijyityyaꞌ in, paj qui jam peñiꞌ in. Tyi chuc chị́yety in räj mọꞌ säcsedyeꞌ jämꞌ jibitidyes in, mijam yoqui ĉojtyiꞌĉan in mọꞌ jebeiꞌyaꞌ in, muꞌin meꞌ dyijyity in anic maꞌjoij shupqui muꞌin in. 23Muꞌin na jam jibitidyes ĉọiꞌtyiꞌ in, jebeiꞌ qui na ramꞌ jụijyaꞌ in, mọꞌ juchaj shupquiꞌ muꞌindyes in Jenꞌsiꞌyaꞌ vej muꞌ, ĉaĉaij na muꞌin yocve dyijyi ĉojtyiꞌĉan muꞌin mọꞌ jebeiꞌyaꞌ in. Jedyeꞌ chuc jam jämꞌ ĉọ́jaꞌyaꞌ tsun, jämꞌtaĉaꞌ qui namꞌ meꞌ jụijyaꞌ tsun, mọꞌ juchaj shupquiꞌ tsuntum.
Currently Selected:
Romaĉantyidyes 14: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
