Jị'cavacdye' 10
10
Anjer tuiꞌtyiꞌ miquis sánacdyeꞌ
1Chat qui yoctyiꞌ cạvete yụ anjer ferdyeꞌtumtyiꞌ, mạyedyeꞌcheꞌ jijtuij, comonꞌ buꞌyi dyicbaꞌbadyemꞌ. Joꞌnoꞌcheꞌ namꞌ oꞌpitoꞌ buꞌyiꞌ, vejyaꞌ na mạijyi jeñej muꞌ tsun, mọꞌ na yuj muꞌ jeñej furquis tŝij, meꞌ buꞌyi jiꞌcaviti muꞌ anjer. 2Muꞌ meꞌchuiꞌ unĉan miquis sánacdyeꞌ dajtacsiꞌ. Mọꞌ na tacves yuj muꞌ marcheꞌ buꞌyiꞌ muꞌ, mọꞌ na q̂uimves yuj muꞌ chanamꞌcheꞌ buꞌyimꞌ. 3Fer muꞌ äjyi, jeñej yi pupujriꞌ tärꞌyity, meꞌ p̂eyaqui. Äjyedyeꞌĉandye mọmoꞌ meꞌĉandye muꞌin voryi vatyquej yävätidyeꞌ pururu in, anic uyaꞌquiꞌ yi p̂eyaqui in. 4Aty meꞌsiꞌ seꞌvacsebi yụ p̂eyacdyeꞌ muꞌin, aty raꞌ tsanꞌ yụ sánacsebi p̂eyacdyeꞌ muꞌin. Vátyequej seꞌveꞌ yụ yiris p̂eyacdyeꞌ mạyedyeꞌches, yiꞌ mọꞌ jin yụ:
—Jam raꞌ jịꞌchiqueyacsi mi yoctyiꞌ muntyiꞌ in muꞌinsiꞌ p̂eyacdyeꞌ in yävätidyeꞌyitysiꞌ pururu in, mijam raꞌ sánacsebi mi p̂eyacdyeꞌ muꞌin —yi jin yụ.
5Muꞌ na anjer cạvetety yụ, muꞌ yútyity marcheꞌ judyeyaꞌ chanamꞌcheꞌ, tacves un muꞌ cheꞌjeyaqui c̣họcoꞌyi mạyedyeꞌcheꞌ, 6judyeyaꞌ yụꞌtaqui p̂eyacdyeꞌ muꞌ Jenꞌsiꞌcheꞌ tịj muꞌ, muꞌ räjĉan buꞌyity, muꞌ räj jämꞌtyety mạyedyeꞌ judyeyaꞌ jac judyeyaꞌ mọꞌ mar räjtumdye meꞌchuiꞌsiꞌ in. Jenꞌsiꞌcheꞌ tịj muꞌ, muꞌ anjer yụꞌtaqui p̂eyacdyeꞌ, yiꞌ:
—Jadyic raꞌ tupudyeꞌ. 7Aty raꞌ boñiyaꞌ muꞌ yävätidyeꞌyity anjer meꞌĉandye raꞌ muꞌ Jenꞌ jịꞌcätseꞌ mọꞌ caminves dyijyedyeꞌ muꞌ, mọꞌ jéyacsis jiquej úñity muꞌ, muꞌin jasoꞌmitity p̂eyacdyeꞌ jiquej in —yi muꞌ anjer.
8Cuvij yiꞌ mọꞌ mạyedyeꞌches p̂eyacdyeꞌ, mọꞌ seꞌves jiquej yụ cuvij jin yụ:
—Tạij ĉọcme muꞌ anjer, muꞌ yútyity marcheꞌ judyeyaꞌ chanamꞌcheꞌ, jäctyecme unĉansiꞌ muꞌ mọꞌ miquis sánacdyeꞌ dajtacsiꞌ.
9Meꞌdye yụ ĉọcte muꞌ anjer, jéte yụ:
—Soꞌmitiꞌ miquis sánacdyeꞌ.
Muꞌ vorjin yụ:
—Miyaꞌĉa, jebevaꞌ. Chụꞌĉan raꞌ cạvdyiꞌ ĉọiꞌ mi, a qui na ramꞌ voꞌcoĉan mi bịcuc tŝọiꞌ.
10Meꞌdye unĉansiꞌ jäctyete yụ mọꞌ miquis sánacdyeꞌ judyeyaꞌ qui jebeiꞌ yụ. Anic cạvdyiꞌ ĉọiꞌ chụꞌĉan yụ jeñej coroma, a qui namꞌ venjoiꞌyaꞌ voꞌcoĉan yụ anic bịcuc tŝọiꞌ. 11Chat qui muꞌ jin yụ:
—Cuvij raꞌ jịꞌchiqueyacsi mi mọꞌ p̂eyacdyeꞌ soꞌminsiꞌ Jenꞌ, mọꞌ p̂eyacsis muntyiꞌ in junꞌ chuc raꞌ muꞌin in, muꞌin yịjyi muntyiꞌ in, yoc yoc p̂eyaquity in, paiꞌ bäꞌyity in judyeyaꞌ ayoꞌ muꞌin chimeꞌ, meꞌ meꞌ raꞌ p̂eyacsi mi.
Currently Selected:
Jị'cavacdye' 10: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
