Jị'cavacdye' 11
11
Muꞌin päräꞌ p̂eyaquity Jenꞌdyes in
1Chat qui soꞌmin yụ yiris tuputuquis son jeꞌñes shuruꞌ. Chimeꞌdye soꞌmac p̂eyacdyeꞌ yụ, yiꞌ mọꞌ:
—Sacta tuputucvaꞌ Jenꞌsiꞌ acaꞌ muꞌ judyeyaꞌ chimeꞌ jiꞌcoꞌshayacdyeꞌcheꞌ. Tsicseva chimeꞌ muꞌĉantyiꞌ in muꞌin timaꞌquetety Jenꞌ in. 2Jam na ramꞌ tuputuiꞌ mi mọꞌyaꞌ cäjdäiꞌyaꞌ acas, ĉaĉaij na mọꞌ cäjdäs aty soꞌmac yoctyiꞌ muntyiꞌ in jam judío in. Muꞌin raꞌ meꞌtyeꞌ in räjtumdye Jenꞌsiꞌ bäꞌyedyeꞌ muꞌ, vạjpedyeꞌ quiꞌtac päräꞌ jiyiꞌ ịvaj, meꞌquiꞌ raꞌ meꞌtyeꞌ in. 3Yụ raꞌ jutacsi päräꞌ p̂eyaquity yụ́dyes in, muꞌin raꞌ p̂oc̣hiꞌc̣hiijtyiꞌĉan quịꞌsiꞌ cäti in,#11:3 Muꞌ quịꞌsiꞌ meꞌtyity jịꞌĉoiꞌ tsäquiꞌsis p̂eyacdyeꞌ tuiꞌtyiꞌ in. vạjpedyeꞌ quiꞌtac päräꞌ jiyiꞌ ịvaj, meꞌquiꞌ raꞌ yụꞌtacsi yụ paj qui muꞌin jịꞌchiqueyacsi in mọꞌ p̂eyacdyeꞌ soꞌmacsis yụ, meꞌquiꞌ shupquiꞌ mọꞌ, yiriꞌ mir päräꞌ quiꞌ cien jäbän quiꞌtac mạyedyeꞌ in.
4Muꞌin päräꞌ p̂eyaquity Jenꞌdyes in muꞌin jeñej buꞌyity päräꞌ cätidyeꞌ orivo in judyeyaꞌ jeñej buꞌyi päräꞌ yụꞌtaquis vera in, meꞌ Ayoꞌsiꞌyaꞌ vej muꞌ, muꞌin bäꞌyi in, paj qui muꞌ chiquete in, muꞌ ayoꞌbuꞌyity räjdyes jaccheꞌ bäꞌyity in. 5Pạrej muꞌyaꞌ mạꞌjeꞌ jịꞌñibeꞌcacsi jụijyaꞌ in, muꞌin raꞌ chụꞌĉansiꞌ tŝij jiꞌshupqueꞌ in, mọꞌyaꞌ raꞌ muꞌin jiꞌcoꞌshayacsi in fạ́cacsity in, muꞌin raꞌ meꞌjeyacsi in tyi chuc mạꞌjeꞌ jịꞌñibeꞌcacsity in. 6Muꞌin raꞌ päräꞌtyity in soꞌmac raꞌ ferdyeꞌ in paj qui tupuj jiꞌdyäqueꞌ añej in paj qui jam añeiꞌ junꞌ quiꞌ chuc jadyic jịꞌchiqueyacsi in mọꞌ p̂eyacdyeꞌ soꞌmacsis Jenꞌ, chibin yómodyeꞌ choc, meꞌquiꞌ raꞌ p̂eyaqui in. Chimeꞌdye raꞌ soꞌmac ferdyeꞌ in paj qui chäsh jiꞌmuñeꞌ ojñiꞌ in,#11:6 Exodo 7:17-19 yịjyi raꞌ vaꞌtacdyeꞌ soꞌmeꞌ ọij jac in, junꞌsiꞌ ĉụiꞌ mạꞌjeꞌyaꞌ muꞌin in, meꞌ buꞌyiꞌ raꞌ soꞌmeꞌ vaꞌtacdyeꞌ jac in.
7Aty raꞌ jadyicyaꞌ jịꞌchiqueyacsi in p̂eyacdyeꞌ Jenꞌsiꞌ muꞌ, chat qui raꞌ muꞌ vajedyedyeꞌ buꞌyity muꞌ shupquity mochĉansiꞌĉantyiꞌ toꞌ, muꞌ raꞌ chuti muꞌintum in päräꞌtyitytum muntyiꞌ in, muꞌ raꞌ jiꞌpenacsi ijacsi. 8Aꞌvun raꞌ muꞌin taĉan raꞌ farajjeyacsebi in cayeĉan därsiꞌĉan bäꞌyedyeꞌ, yóĉandyemꞌ ijacsebi croshcheꞌ jiquej u in muꞌ Ayoꞌ muꞌin. Mọꞌ bäꞌyedyeꞌ jeñej buꞌyiꞌ Sodoma judyeyaꞌ Egipto. 9Mọꞌdyes qui räj raꞌ muntyiꞌ in cạvacsebi aꞌvun muꞌin, yịjyi muntyiꞌ úchety in, yoc yoc p̂eyaquity in, paiꞌ bäꞌyity in, räj raꞌ muꞌin cạvacsebi aꞌvun muꞌin. Chibin mạyedyeꞌ choc meꞌsiꞌ raꞌ cạvacsebi aꞌvun muꞌin in, ĉaĉaij na muꞌyaty in jam yi in paj qui rudyuꞌjeyacsi in. 10Jacchety muntyiꞌ in anic raꞌ maꞌjotacsebi mọꞌ ijacdyeꞌ muꞌin. Anic raꞌ där maꞌjoij in, vaj meij raꞌ ñịbeꞌjitidyeij jedyeꞌ in, meꞌ buꞌyiꞌ raꞌ dyijtucsebi ijacdyeꞌ muꞌin, muꞌin päräꞌtyitysiꞌ p̂eyaquity Jenꞌdyes in, ĉaĉaij na muꞌin vaꞌtacdyeꞌ soꞌmacsi jiquej in.
11A na ramꞌ chibin mạyedyeꞌ choc meꞌ buꞌyiyaꞌ, chat qui Jenꞌ quivij soꞌmacseban jụ́tyedyes muꞌin, tsạꞌeban qui raꞌ in judyeyaꞌ raꞌ sacyeban in. Muꞌin raꞌ meꞌ cạvacsity in jämꞌ raꞌ mụijyayaj tŝọij noiꞌyi in. 12Chat qui muꞌin päräꞌ p̂eyaquity Jenꞌdyes in seꞌveꞌ raꞌ in mạyedyeꞌches p̂eyacdyeꞌ fersiꞌ, yiꞌ raꞌ mọꞌ jéyacsiꞌ: "Atsijamꞌ úcheꞌ jijtujamꞌ." Meꞌdye raꞌ muꞌin bojvi dyicbaꞌbadyeꞌcheꞌ in, mạyedyeꞌcheꞌ raꞌ jịjcaij in, muꞌinsiꞌyaꞌ vej in fạ́cacsityyaꞌ in. 13Cheꞌyedyeꞌĉandye mọmoꞌ, fer vatyquej bubaquiꞌ ọij jac. Där raꞌ muꞌin ñịbeꞌ cạveꞌ Jerusalénĉantyiꞌ in. Yiriꞌtacyis acaꞌ jụijyaꞌ, yiris raꞌ jọꞌchaiꞌ jịjcaiꞌ in, meꞌquiꞌ mụijyayaj tŝọiꞌ in.#11:13 Ọij yiꞌ naposĉan: "la décima parte". Daiꞌ raꞌ jaꞌjati acaꞌ in, yävätidyeꞌ raꞌ mir säñi in. Muꞌin na jiꞌshucdyity in jämꞌ raꞌ muꞌin mụijyayaj tŝọij noiꞌyi in. Chat qui raꞌ muꞌin timaꞌquete in muꞌ ferdyeꞌtumtyiꞌ Jenꞌ mạyedyeꞌcheꞌ bäꞌyity,
14Aty jiyiꞌ päräꞌyis vaꞌtacdyeꞌ, cäꞌc̣häiꞌdye raꞌ yocsiꞌ ayij mọꞌ chibinyis vaꞌtacdyeꞌ.
Yävätidyeꞌyis boñedyeꞌ
15Yävätidyeꞌyity anjer pejtyeꞌ boñedyeꞌ muꞌ, pạrej fer p̂eyaqui mạyedyeꞌchety in yi in:
"Muꞌ Jenꞌ Ayoꞌ tsun judyeyaꞌ muꞌ jutetety muꞌ Jiꞌc̣honacsity Muntyiꞌ aty qui ayoꞌbuꞌyi in,
aty jiꞌpeñeꞌ Sọyoꞌ,
Jenꞌ qui ayoꞌbuꞌyi räjdyes jacchetydyes muntyiꞌ in,
jam raꞌ jụꞌñisĉan mạyedyeꞌ mọtsiꞌ ayoꞌbuꞌyedyeꞌ muꞌin", yi in.
16Muꞌin päräꞌ quiꞌtac vạjpedyeꞌ jiyity muntyiꞌ in tashcheꞌ buꞌyity in, muꞌin bäꞌyaquischety Jenꞌsiꞌyaꞌ buꞌyity vej in, muꞌin dyụtsyi muꞌyaꞌ in, täjjequeꞌ jac in jáfiyaꞌ muꞌin, meꞌ buꞌyi timaꞌquete Jenꞌ in. 17Yi muꞌin in:
"Tsuntyiꞌ Jenꞌ, mi nash mujuꞌchaꞌ ferdyeꞌtumtyiꞌ Ayoꞌ tsun,
mi nash tạꞌcaty,
mídye mọmoꞌ muꞌyaꞌ q̂uinꞌ.
Tsun yoshoropaij jéyac mi ĉaĉaij na q̂uinꞌ aty därsiꞌyaꞌ ferdyeꞌ mi ĉụiꞌ yuꞌti mi paj qui räjdyes ayoꞌbuꞌyi mi.
18Jacchety muntyiꞌ in anic fáquin in.
Q̂uinꞌ aty ayij tupudyeꞌ vaꞌtacdyedyes muꞌin,
mi raꞌ jịꞌcäts yụꞌtacsi muꞌin säñity in,
judyeyaꞌ raꞌ soꞌmacsi mi bijodyedyes muꞌin úñity mi judyeyaꞌ muꞌin soꞌmacsity p̂eyacdyeꞌ mi,
yósiꞌdyemꞌ muꞌin anicjintyiꞌ u in,
muꞌin irijyity mícheꞌ in,
mujuꞌchaty in judyeyaꞌ uyaꞌyaty in,
meꞌ meꞌ raꞌ soꞌmac bijodyeꞌ míyaꞌ in.
A nash ayij tupudyeꞌ,
paj qui mi räjteyacsi muꞌin ac̣hiꞌtacsity jacchety muntyiꞌ jiquej in", yi in.
19Vanacyiꞌ vatyquej Jenꞌsiꞌ acaꞌ muꞌ mạyedyeꞌches. Jiꞌnaijtiꞌ cajón mọꞌyaꞌ, mọꞌ yụꞌtacdyeꞌtumsiꞌ Jenꞌsiꞌ muꞌ. Meꞌĉandye venaꞌyaqui vatyquej tyeij pururu judyeyaꞌ fer p̂eyacdyeꞌ mạꞌiꞌ in, judyeyaꞌ fer vatyquej bubaquiꞌ ọij jac judyeyaꞌ tsäquiꞌtyity tsafaꞌ jọꞌchaij, anic shach tŝọij jaccheꞌ.
Currently Selected:
Jị'cavacdye' 11: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
