Proverbios 4
4
Mọjoꞌchaꞌ jemonac mọꞌ rụijsis dyijyedyeꞌ
1Ạvaꞌ, seꞌvibutiꞌ ram ọij jiꞌchäyitidyeꞌ soꞌmeyes yụ,
yụ nash jenꞌ mi.
Jämꞌ raꞌ seꞌvaquim paj qui chị́yebim dyijyedyeꞌ mọꞌ tuyinsiꞌ.
2Anic rụijsis ọij jiꞌchäyitidyeꞌ soꞌmeyes yụ,
mọꞌdyes jam raꞌ farajjem.
3-4Miquiꞌdyemꞌ jiquej yụ,
tseꞌ anic mạꞌjin yụ ĉaĉaij na itŝij yoctyiꞌ ạvaꞌ mọꞌ.
Táta yụ anic jämꞌ jiꞌchäyin yụ.
Muꞌ jin yụ:
"Jiꞌsäsbutiꞌ ram ĉojtyiꞌĉan p̂eyacdyeꞌ yụ paj qui mọꞌ yejĉoij chiqueꞌ mi.
Mọꞌ raꞌ tsạꞌchun mi,
paj qui jämꞌyedyeꞌtum bäꞌyi mi.
5Jämꞌ raꞌ dyijyi mi yụꞌtyevaꞌ ferdyeꞌ paj qui chị́yem ọij jiꞌchäyitidyeꞌ soꞌmeyes yụ.
Jam raꞌ yaquintubutim ọij p̂eyacdyeꞌ yụ,
mijam raꞌ muyetyejcabut mi.
6Mạꞌjevaꞌ rụijsis dyijyedyeꞌ jam raꞌ farajjem,
mọꞌ raꞌ jiꞌc̣hoñin mi.
7Mọꞌ tashcheꞌ jemonacsiꞌ mọꞌ nash mọꞌ rụijsis dyijyedyeꞌ,
mọꞌdyes yụꞌtyevaꞌ ferdyeꞌ paj qui chị́yeꞌ mi jedyeꞌ buty mọꞌ cạiꞌ; ọyaꞌyaꞌ jacches jedyeꞌ in.
8Yụꞌtyevaꞌ ferdyeꞌ paj qui dyijyedyeꞌtum bäꞌyi mi,
yi raꞌ mi: "Anic yaꞌiꞌ mọꞌ rụijsis dyijyedyeꞌ."
Meꞌ bäꞌyi jụijyaꞌ mi, jämꞌjeyac raꞌ muntyiꞌyaꞌ mi.
9Räj raꞌ cavibun in mọꞌ jämꞌsiꞌ dyijyedyeꞌ cäc̣häꞌchuiꞌsiꞌ mi,
mọꞌ raꞌ jeñej buꞌyiꞌ jämꞌsiꞌ shásha joꞌnoꞌches mi",
yi táta jin jiquej yụ.
10Ạvaꞌ, seꞌvibutiꞌ ram ọij p̂eyacdyeꞌ yụ,
chat anic raꞌ men úcheꞌ bäꞌyi jaccheꞌ mi.
11Yụ jịꞌchiyeye paj qui rụijsis dyijyedyeꞌ meꞌchuiꞌ mi,
paj qui jämꞌsiꞌ majmi jịjcaiꞌ mi.
12Meꞌ jụijyaꞌ mi jedyeꞌ chuc junꞌtaqui mi jam raꞌ junꞌ tachyi mi,
jämꞌ raꞌ shupquiꞌ mídyes.
13Jämꞌ raꞌ cäc̣häꞌchuiꞌ mi ọij jiꞌchäyitidyeꞌ,
jam raꞌ damꞌ farajjeꞌ mi.
Jemoñeꞌ räjĉan chiqueꞌ mi, mọꞌ raꞌ tsạꞌchun.
14Jam raꞌ cäc̣häꞌchucsebim ac̣hiꞌyitysiꞌ dyijyedyeꞌ muꞌin,
mijam raꞌ ac̣hiꞌ bäꞌyi mi.
15Jam raꞌ jịjcacsebim majmi muꞌin, jeij cajnacsebiva.
16Muꞌin anic fer mạꞌjeꞌ ac̣hiꞌtacsi in,
jambiꞌdyemꞌ aꞌc̣his jämꞌtaqui jụijyaꞌ in,
jam mạꞌjeꞌ jịꞌjutyiti in.
Jambiꞌdyemꞌ tyi areꞌjete jụijyaꞌ in,
fer dyijtuvaꞌqueꞌ in, mijam mạꞌjeꞌ ĉọshi in,
meꞌ buꞌyiꞌ yụꞌtacsiꞌ aꞌc̣his dyijyedyeꞌ muꞌin.
17Anic fer maꞌjotyeꞌ in mọꞌ aꞌc̣his dyijyedyeꞌ,
jämꞌ ĉọiꞌ in, joꞌmesyaꞌ mạꞌjeꞌ ac̣hiꞌtacsi yoctyiꞌ muntyiꞌ in,
mọꞌ jiꞌmaꞌjotacdyes muꞌin jeñej maꞌjotyejas säcsedyeꞌ judyeyaꞌ tyédyeꞌ,
meꞌ buꞌyi mạꞌjeꞌ aꞌc̣his jämꞌtaqui in.
18Muꞌin na rụijtyity in jam muꞌinsiꞌ meꞌ majmi in,
mạijquedyeꞌ muꞌin cäc̣häꞌchuiꞌ in,
meijquejĉoij rụij bäꞌyi in junꞌ quiꞌ chuc nạijjoiꞌ.
19Muꞌin ac̣hiꞌyity in tojmadyeꞌĉan bäꞌyi in,
meꞌdyes qui muꞌin tachyi jọꞌchaij in,
jam qui namꞌ chịj in jedyeꞌcheꞌ buty tachyi in.
20Ạvaꞌ, jämꞌ raꞌ ọij seꞌvibutiꞌ mi p̂eyacdyeꞌ yụ,
21mijam raꞌ farajjeꞌ dyijtuiꞌ mi, jiꞌsisvaꞌ jämꞌ ĉojtyiꞌĉan.
22Ọij p̂eyacdyeꞌ tsạꞌchucsiꞌ raꞌ muꞌin chiqueꞌtyiꞌ in, mọꞌ raꞌ räshchucsiꞌ.
23Jämꞌ raꞌ ĉọjcaqui ĉụiꞌtyiꞌ ĉojtyiꞌ mi,
jämꞌsiꞌ ramꞌ dyijyedyeꞌ meꞌchuiꞌ mi,
ĉaĉaij na junꞌ chuc dyijyejaꞌ ĉojtyiꞌĉan tsun meꞌ raꞌ bäꞌjaꞌ tsun.
24Meijjevaꞌ räj väñädyeꞌ mi,
aty jam raꞌ damꞌ väñäij mi,
mijam raꞌ damꞌ aꞌc̣his p̂eyacdyeꞌ jiꞌshupqueꞌ mi.
25Rụij raꞌ cạvi mi, jam raꞌ yocve dyijyi mi.
26Rụij dyijyeva mi junꞌ chuc raꞌ jämꞌtaqui mi,
meꞌ raꞌ chat tupuj räj jämꞌ shupquiꞌ mídyes.
27Rụij raꞌ jịjcaij mi, jam raꞌ jeijmuñi mi,
mijam raꞌ aꞌc̣hisĉan jịjcaij mi.
Currently Selected:
Proverbios 4: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
