Proverbios 3
3
Nanatydyes jiꞌchäyitidyeꞌ in
1Ạvaꞌ, jam raꞌ farajjem ọij jiꞌchäyitidyeꞌ soꞌmeyes yụ,
dyijtuiꞌ raꞌ ĉojtyiꞌĉan mi ọij jiꞌchäyitidyeꞌ p̂eyacdyeꞌ yụ.
2Mọꞌ raꞌ yiꞌ paj qui anic men úcheꞌ bäꞌyi jaccheꞌ mi,
paj qui maꞌjodyeꞌtum bäꞌyi chimeꞌ mi.
3Jämꞌjeyacsi raꞌ bäꞌyi mi,
mijam raꞌ chimeꞌ farajjem anicsis mạꞌjitidyes.
Mọꞌ raꞌ jeñej buꞌyiꞌ tyicacdyeꞌ tujĉansiꞌ.
Yejĉoij raꞌ meꞌchuiꞌ mi ĉojtyiꞌĉan mi,
meꞌ raꞌ bäꞌyi mi.
4Meꞌ bäꞌyi jụijyaꞌ mi,
chat qui raꞌ muꞌ Jenꞌ maꞌjotyin.
Meꞌdye raꞌ chimeꞌ muntyiꞌ in maꞌjotyin in,
vaj cäts raꞌ jämꞌjin in.
5Ĉúta Ayoꞌcheꞌ räj ĉojtyiꞌtum mi,
paj qui muꞌ ñútyin mi,
mijam raꞌ ĉụiꞌsiꞌcheꞌ dyijyedyeꞌ ĉúti mi.
6Yejĉoij raꞌ dyijtute Ayoꞌ mi,
cäc̣häꞌchubite ram dyijyedyeꞌ muꞌ,
chat qui raꞌ muꞌ bächän,
muꞌ raꞌ jiꞌcaviyin rụijsis majmi.
7Jam raꞌ vaꞌbunyi yi mi:
"Yụ anic dyijyedyeꞌtumtyiꞌ."
Irijyeva Ayoꞌcheꞌ, meijjevaꞌ räj aꞌc̣his dyijyedyeꞌ mi.
8Meꞌ bäꞌyi jụijyaꞌ mi,
chat qui raꞌ mọꞌ ñútyin,
jeñej buꞌyiꞌ pịñidyeꞌ paj qui räsh bäꞌyiꞌ aꞌ mi.
9Dyijtume Ayoꞌ tsun,
pạrejjeyeme querec̣ha muꞌdyety.
Chimeꞌdye sicdyeꞌ vädaqui jụijyam,
chipạrejjeyetedye ram muꞌdyes,
mọꞌ jämꞌjeyacdyeꞌ shupquiꞌ muꞌdyes.
10Meꞌ soꞌmete jụijyam,
muꞌ raꞌ damꞌdye cächjiyin.
Aty vädaĉan jụijyaꞌ mi,
aty qui raꞌ jam tupuj vav acaꞌ mi paj qui jämꞌjeyac mọꞌĉan sicdyeꞌ mi.
11Ạvaꞌ, jam raꞌ ĉụiꞌtuptem fạraꞌyedyeꞌ Ayos muꞌ,
mijam raꞌ yoqui mi jiꞌchäyin jụijyaꞌ vaꞌtacdyeꞌyaꞌ;
12ĉaĉaij na muꞌ Ayoꞌ tsun fạraꞌjeĉúnaqui mạꞌjeyactyiꞌ muꞌ,
yojdyemꞌ yirity muntyiꞌ u fạraꞌjeĉúnaqui ạꞌyaty ạvaꞌ muꞌ.
13Anic maꞌjoij in Jenꞌsiꞌtumtyiꞌ dyijyedyeꞌ rụijsis in.
Muꞌin dyijyedyeꞌ dạqueꞌtyiꞌ in judyeyaꞌ chimeꞌ chicacsi in jedyeꞌ buty cạiꞌ Jenꞌsiꞌ p̂eyacdyeꞌ muꞌ,
anic maꞌjoij muꞌin in.
14Mọjoꞌchaꞌ yaꞌiꞌ rụijsis dyijyedyeꞌ,
uyaꞌyaꞌ muꞌ querec̣ha plata judyeyaꞌ muꞌ oro.
15Mọjoꞌchaꞌ mọꞌ yaꞌiꞌ mọꞌ rụijsis dyijyedyeꞌ,
uyaꞌyaꞌ yaꞌijtyiꞌ mij in,
mọꞌ na dadamꞌ mọjoꞌchaꞌ jämꞌsiꞌ,
ọyaꞌyaꞌ räj jacches jedyeꞌ in,
mọꞌ mạꞌjejas tsun.
16Cäc̣häꞌchujaꞌyaꞌ mọꞌ rụijsis dyijyedyeꞌ,
mọꞌ raꞌ jísinꞌ paj qui men úcheꞌ bäꞌjaꞌ tsun judyeyaꞌ paj qui jämꞌjeyac muntyiꞌyaꞌ tsun.
Därsiꞌ raꞌ bijodyeꞌ soꞌmac tsun.
17Cäc̣häꞌchujaꞌ mọꞌ rụijsis dyijyedyeꞌ jụijyaꞌ,
meꞌ raꞌ jämꞌyedyeꞌtum bäꞌjaꞌ tsun,
mọꞌ raꞌ soꞌmisinꞌ maꞌjodyeꞌ ĉojtyiꞌĉan.
18Mọꞌ rụijsis dyijyedyeꞌ tsạꞌchusinꞌ tsun meꞌchujaꞌ jụijyaꞌ,
jeñej buꞌyiꞌ mọꞌ tsạꞌchucsis sacacdyeꞌ.
Anic maꞌjoij in muꞌin jam farajjeꞌtyiꞌ in.
19Muꞌ Ayoꞌ dyijyedyeꞌyaꞌ muꞌ jämꞌtyeꞌ ọij jac,
chị́dyeꞌyaꞌ muꞌ jämꞌtyeꞌ räj mạyedyeꞌches jedyeꞌ in.
20Chị́dyeꞌyaꞌ muꞌ yụꞌtyeꞌ mọꞌin mar in,
dyicbaꞌbadyeꞌ chimeꞌ jämꞌtyeꞌ,
mọꞌ yụꞌtyes añej jacchedyes.
21Ạvaꞌ, jam raꞌ damꞌ farajjeꞌ mi mọꞌ rụijsis dyijyedyeꞌ,
yejĉoij raꞌ cäc̣häꞌchupte mi Jenꞌsiꞌ chị́dyeꞌ muꞌ.
22Meꞌ jụijyaꞌ mi,
anic raꞌ jämꞌyedyeꞌtum bäꞌyi mi,
23chat raꞌ jam jedyeij miꞌ
mijam raꞌ tachyi jọꞌchaij mi.
24Jịꞌjutyiti jụijyaꞌ mi, maꞌjodyeꞌtum raꞌ ĉọshi mi,
mijam raꞌ damꞌ noiꞌyi mi.
25Jam raꞌ quijñem jiquijnacdyeꞌ,
mọꞌ tŝọ́tacsis raꞌ muꞌin ac̣hiꞌyity in,
26ĉaĉaij na mi aty ĉúti Ayoꞌcheꞌ,
muꞌ raꞌ ñutsjityin mi paj qui jam jedyeij mi.
27Nọ́tyetacsi ram muꞌin jemoñeꞌtyiꞌ jedyeꞌ in,
jam raꞌ quijatutacsi mi.
28Jam raꞌ jéyacsi mi:
"Nojno raꞌ caꞌñibun mi, chat qui raꞌ yụ soꞌmeye."
Mọꞌyaꞌ jedyeꞌ jụijyaꞌ mi jemoñeꞌ yiristum soꞌmacsim.
29Jam raꞌ dyijyi mi junꞌ buꞌyi chuc raꞌ ac̣hiꞌte mi muꞌ chätidyeꞌ mi ạꞌyaty,
ĉaĉaij na muꞌ jam yocve dyijtun mi. "Uts nash penꞌdyeꞌ yụ", meꞌ jiꞌjäquin.
30Jam raꞌ fibiꞌ ĉụiꞌ fạ́quete chätidyeꞌ mi,
ĉaĉaij na muꞌ jam p̂iyin.
31Jam raꞌ maꞌjotacsim sonꞌ buꞌyi yuꞌtity jụijyaꞌ in,
mijam raꞌ chimeꞌ maꞌjotacsebim dyijyedyeꞌ muꞌin, muꞌin meꞌtyitysiꞌ in.
32Ĉaĉaij na muꞌ Ayoꞌ tsun äcäijjeyacsi muꞌin ac̣hiꞌyity in,
penꞌdyetucsi rụijtyity in.
33Muꞌ raꞌ Ayoꞌ soꞌmacsi vaꞌtacdyeꞌ muꞌin ac̣hiꞌ bäꞌyity in chätidyeꞌtumdye raꞌ tyejoij in,
muꞌin na rụijtyity in muꞌ raꞌ nọ́tyetacsi räjtumdye chätidyeꞌ muꞌin.
34Muꞌ Ayoꞌ äcäijjeyacsi muꞌin dyisactety in,
muꞌin na jam vaꞌbunnaquity in muꞌ ñịbeꞌjeyacsi.
35Muꞌin meꞌchuiꞌtyiꞌ in rụijsis dyijyedyeꞌ muꞌin raꞌ timaꞌcac in,
muꞌin na fạ́quety in mọꞌ rụijsis dyijyedyeꞌ tsị́cadyeꞌ raꞌ cạveꞌ in.
Currently Selected:
Proverbios 3: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
